Älihan Bökeyhan jäne Nwrswltan Nazarbaev. Foto: QT / Almas Boris

QT redakciyası Strategiyalıq josparlau jäne reformalar agenttiginiñ Wlttıq statistika byurosına Täuelsizdik twsında tuğan «Nwrswltandar» men «Älihandardıñ» sanı jöninde arnayı swrau joldadı. Qañtar tolquı bolğan bıltır tuğan er balalarğa «Älihan» esimi «Nwrswltanğa» qarağanda 60 ese köp berilgen.

Wlttıq statistika byurosınıñ redakciyağa bergen jauabındağı resmi derek qoğamnıñ azamattıq-sayasi közqarasınıñ özgeru dinamikasın ayqındauda balama aqparat boluı mümkin.

Täuelsizdik jariyalanğan jılı «Nwrswltan» esimi öte köp berilgen. 90-şı jıldardıñ işinde aqırındap azaya tüsken. 2000 jılı körsetkiş mıñdıqtan qwlap, HHİ ğasırdıñ alğaşqı jılınan arı qaray qayta artadı. 2007 jılğı dağdarıs twsında qatarınan üş jıl tömendey tüsken. 2010, 2011 jılı ösim bayqaladı. Jañaözen oqiğasınan soñ üşinşi onjıldıqta üzdiksiz kemi bastağan. 2015 jıldan keyin kürt azayğan. Respublikanıñ basım böligin «Şal, ket!» wranımen qamtığan, ayağı qırğınğa aynalğan Qañtar oqiğası bolğan 2022 jılı alğaş märte «jüzdikten» tömendegen.

Älihan esimi Egemendik deklaraciyası qabıldanğan 1990 jıldan keyin eleusiz bolsa da twraqtı türde berilgen. Jüyeli ösim 2005 jılğa qaray mıñdıqqa jetken. men berile bastağan. Tört jılda eki mıñdıqqa, izin ala eki jılda üş mıñdıqqa örley jöneledi. Jılına üş mıñnıñ üstinde Älihandar düniege kelip jattı. Şeteldikterge satılatını turalı zañ jobası şığıp, eldi Jer dauı şarpıp, halıq şeruletken 2016 jılı şirek ğasır mıñdap qoyılğan «Nwrswltan» esimi mıñdıqtan kürt azaydı. Qazaq azamattıq qoğamınıñ Jañaözennen keyingi serpilisi bolğan meşin jılı 873 «Nwrswltan», 4766 «Älihan» tudı. Täuelsizdiktiñ üşinşi onjıldığı ä degennen jılına 6 mıññnan asa «Älihandardıñ» tolısuımen süyinşiledi.

Osılayşa, Qazaqstan memlekettilik tarihında mañızdı röl atqarğan sayasatkerlerdiñ esimi uaqıt keñistiginde eki türli deñgeyde keskindeledi. Uaqıt bağası qoğam pikirinde körinis tabadı degen äleumettanuşı, tarihşılardıñ twjırımın onomastika taldauı rastaydı.

The Qazaq Times