رەسمي دەرەك بويىنشا، قازاقستاندا 12 قازان كۇنى 70 ادامنان كوروناۆيرۋس، 4 ادامنان كوروناۆيرۋس پنەۆمونياسى انىقتالدى. ءۇش كۇندە كوروناۆيرۋس پنەۆمونياسى 64 ەسەگە ازايعان، بۇل تەحنيكالىق قاتە بولۋى مۇمكىن. 

#كوروناۆيرۋس  11 قازان كۇنى كورونۆيرۋس جۇقتىرعان 162 ادام ايىعىپ شىقسا، 3 ادام ومىردەن وتكەن. ال جاڭادان تىركەلگەن ناۋقاستاردىڭ ەڭ كوبى – سقو (12) جانە شقو (11). ال اقتوبە، الماتى، ماڭعىستاۋ جانە قىزىلوردا وبلىستارىندا بىردە-ءبىر ناۋقاس انىقتالماعان.

دەنميننىڭ رەسمي مالىمەتىنشە، ەمدەلىپ جاتقان 2927 ادامنىڭ 2103-ءى اۋرۋحانادا. ال قالعان 824 ناۋقاس امبۋلاتورلىق تەراپيادا. ولاردىڭ اراسىندا 77 وسكىنشەك بالا بار. احۋالى ناشار 85 ناۋقاستىڭ اراسىندا 12 ادامنىڭ جاعدايى قاتتى قيىنداعان. جانە 13 ناۋقاس وكپەنى جاساندى جەلدەتۋ اپپاراتىمەن تىنىستاپ جاتىر.

رەسپۋبليكا بويىنشا بارلىعى 108 901 ادام كوروناۆيرۋس ينفەكتسياسىن جۇقتىرسا، ەمدەلىپ جازىلعاندارى – 104 203 ادام. بۇل جالپى ناۋقاستاردىڭ 95%-دان استامى. وتكەن اپتانىڭ سارسەنبىسىنەن بەرى قازاقستاندا كوروناۆيرۋس كوبەيگەن ەدى.

#كوروناۆيرۋس_پنەۆمونياسى سونىمەن قوسا، دۇيسەنبى كۇنى كوروناۆيرۋس پنەۆمونياسىنا شالدىققان 4 ادام، 2 ءولىم جاعدايى تىركەلگەن. تاعى 10 ادام ايىعىپ شىققان. بىراق ولاردىڭ قانشاسى قاي ايماقتان ەكەنى بەلگىسىز. دۇيسەنبى كۇنگى دەرەك دەلىنگەن اقپار شىن مانىندە جەكسەنبىنىكى بولسا كەرەك. جەكسەنبىدە دەنمين جانە اۋرۋحانالار دەمالىسقا بايلانىستى كۇرت كەميتىندىكتەن، سونشالىقتى شىنايى دەۋگە كەلمەيدى. بۇل بىرنەشە اي بويى بايقالعان ترەند. ۆەدومستۆو سەنبى، قازاننىڭ 10-ى 258 كەيس انىقتالعانىن حابارلاعان.

«وتكەن تاۋلىكتە كوروناۆيرۋستىق ينفەكتسيا بەلگىلەرى بار پنەۆمونيانىڭ 4 جاعدايى جانە 2 ءولىم جاعدايى تىركەلدى»، – دەپ جازدى ۇكىمەتتىڭ www.coronavirus2020.kz سايتى.

كۇندەلىكتى ەرتەڭگىلىك «وتكەن كۇنگى» مالىمەتتى بەرەتىن مينيسترلىك مۇندا 12 قازاندى مەڭزەپ تۇر. دەمەك ەلدىڭ ءبارى اۋرۋحاناعا ەمىن-ەركىن باراتىن جۇمىس كۇنى نەبارى 4 جاعداي، ال سەنبى كۇنى 250-دەن استام جاعداي تىركەلۋى اقىلعا سىيىمسىز. وسىنى ەسكەرسەك، ۇكىمەت رەسمي حاباردا جازاتىنداي ءبىر كۇنگە ەمەس، شىنتۋايتىندا ەكى كۇنگە كەشىگىپ جاريالايدى دەپ توپشىلاۋعا بولاتىنداي.

پتر تەستى تەرىس قورىتىندى كورسەتكەنىمەن، كوروناۆيرۋس سالدارىنان قابىنعان اقوكپە اۋرۋىنىڭ ايماقتارعا تارالۋ دەرەگىن تۇراقتى تۇردە جاريالاۋعا ۋادە ەتكەن مينيستر الەكسەي تسوي دا، ونىڭ كومەكشىسى، ۆەدومستۆونىڭ رەسمي وكىلى باعدات قوجاحمەتوۆ تە ءسوزىن بۇرمالاپ، ءار ون كۇن سايىن جاريالاۋعا كوشكەن. كوروناۆيرۋس پنەۆمونياسىنىڭ وڭىرلەردەگى كۇندەلىكتى ديناميكاسى بەلگىسىز. قوعامدا بيىلعى 256 مىڭ پنەۆمونيا جاعدايىن ەسەپكە قوسپاي، جالپى ستاتيستيكانى شىلدەدەگى قىرعىننان كەيىن جۇرگىزە باستاعان ۇكىمەتتىڭ ەسەبىنە كۇمانمەن قارايتىندار كوبەيگەن.

#سويتسە... قازاقستاندا كوروناۆيرۋس ءولىمى ازايماي تۇر. رەسمي دەرەككە سايكەس، قازان ايىنىڭ ون ەكى  تاۋلىگىندە كوروناۆيرۋس جۇقتىرعان 922 ادام انىقتالىپ، 37 ادام قايتىس بولعان. ءدال وسى ۋاقىتتا كوروناۆيرۋس پنەۆمونياسىنا 1935 ادامنىڭ شالدىعىپ، 15 ادام قايتقان. پنەۆمونيادان اۋىرعانداردىڭ سانى كوروناۆيرۋسقا قارعاندا ەكى ەسە كوپ بولعانىمەن، – قايتىس بولعاندار پتر ارقىلى راستالعان كوۆيدتەن 2,6 ەسە از.

وتكەن تامىز جانە قىركۇيەك ايلارىندا قازاقستاندا كوروناۆيرۋس جۇقتىرعاندار 17 مىڭنان، ال كوروناۆيرۋس پنەۆمونياسىنا شالدىققاندار 34 مىڭنان اسقان. ەكەۋىن قوسا ەسەپتەگەندە، كەيىنگى ەكى ايدا ىندەتتەن 600-دەي قازاقستاندىق ومىردەن وتكەن. سونىمەن بىرگە، وسى ارالىقتا (تامىز-قىركۇيەك) جرۆي اۋرۋلارىمەن 418 مىڭنان، پنەۆمونيانىڭ باسقا تۇرلەرىمەن 82 مىڭنان استام جاعداي تىركەلگەن.

7 قازان دەنساۋلىق ساقتاۋ ءمينيسترى الەكسەي تسويدىڭ كوروناۆيرۋس ەپيدەمياسى تۋرالى بولجالدى ستسەناريدىڭ ءۇش نۇسقاسىن تانىستىرعان. ونىڭ  ايتۋىنشا، بولجامعا اپتا سايىن تۇزەتۋلەر ەنگىزىلىپ وتىرادى. الەكسەي تسوي ۇسىنعان پەسسيميستىك ستسەناري بويىنشا، ەگەر جۇرتتىڭ 60 پايىزى عانا ماسكا تاقسا، 2020 جىلدىڭ قازان-جەلتوقسانىندا 190 مىڭ ادام ۆيرۋس جۇقتىرىپ، 65 مىڭ ادامدى اۋرۋحاناعا جاتقىزۋعا «تۋرا كەلەدى». مۇنداي جاعدايدا «جەلتوقساننىڭ ورتاسىندا لوكداۋن ەنگىزىلۋى ىقتيمال».

تاعى ءبىر نۇسقا رەاليستىك ستسەناريگە سايكەس، جۇرت اراقاشىقتىق ساقتاپ، 70 پايىزى ماسكا تاقسا، قازان-جەلتوقساندا 90 مىڭداي ادام ۆيرۋس جۇقتىرىپ، 30 مىڭىن اۋرۋحاناعا جاتقىزۋعا «تۋرا كەلەدى». بۇل جاعدايدا «قاڭتاردا لوكداۋن ەنگىزىلۋى مۇمكىن».

تسوي ەگەر جۇرتتىڭ 100 پايىزى ماسكا تاعىپ جۇرسە، قاتاڭ كارانتين بولمايتىنىن، قازان-جەلتوقساندا شامامەن 40 مىڭ ادامعا ۆيرۋس جۇعىپ، 15 مىڭ ادام اۋرۋحاناعا تۇسەتىنىن ايتادى.

پاندەميا كەزىندەگى مودەراتور ۆەدومستۆونىڭ باسشىسى كارانتيننىڭ باستى ينديكاتورى رەتىندە ەلدەگى اۋرۋحانالاردىڭ 70 پايىزى تولسا، قاتاڭ لوكداۋن جاريالاۋ كەرەكتىگىن مالىمدەدى.

پنەۆمونيانىڭ كوروناۆيرۋستىق تۇرىنەن باسقا اۋرۋلارىمەن اۋىرعاندار سانى 337 مىڭنان استى. تاراتىپ ايتساق، 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 109 مىڭعا، 1 تامىزدان بەرگى كوروناۆيرۋس پنەۆمونياسى 35 مىڭعا جۋىقتاعان. ددسۇ مالىمەتىنشە، قازاقستاندا اۋىرعانداردىڭ سانى 143 مىڭنان اسقان. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.   پاندەميا باستالعالى جالپى جيىنى ۆيرۋس جۇققانداردىڭ 2717-ءسى (كۆي+ / U07.1 – 1 771, كۆي- / U07.2 – 370, ىلەسپە اۋرۋلاردان – 576) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 576 ادامدى جالپى ستاتيستيكاعا قوسىپ ەسەپتەمەيدى. ساراپشىلار بۇعان قارسى. ولاردىڭ ايتۋىنشا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

"The Qazaq Times"