22 qırküyekte Qazaqstanda 76 adamnan koronavirus, 364 adamnan pnevmoniya anıqtalğan. 

DenMin dereginşe, koronavirus jağdayınıñ eñ köbi on kün qatarınan Şığıs Qazaqstan oblısında 28 adamnan tabılğan.  Öñirdegi jağday basqa aymaqtarğa qarağanda örşip twr. Astanada da 20 nauqas tabılğan.

Qazirgi tañda elde 3524 adam emdelip jatır. Onıñ 1868-i stacionarda, 1656-sı ambulatoriyada.
Jağdayı qiın 101 nauqastıñ 14-iniñ  ahualı qattı naşarlağan. Sonday-aq, 20 adam ökpeni jasandı jeldetu apparatımen tınıstap jatır.​

Sonımen qosa, seysenbi koronavirus pnevmoniyasına şaldıqqan 364 adam tirkelipti. Biraq olardıñ qanşası qay aymaqtan ekeni belgisiz. PTR testi teris şıqqanımen, koronavirus saldarınan asqınğan aqökpe auruınıñ aymaqtarğa taralu deregin twraqtı türde jariyalauğa uäde etken ministr Aleksey Coy da, onıñ kömekşisi, vedomstvonıñ resmi ökili Bağdat Qojahmetov te sözinde twrğan joq. Äli künge deyin koronavirus pnevmoniyasınıñ öñirlerdegi dinamikasın bile almay kelemiz.

Elde koronavirus jwqqanı PTR-testimen rastalğandar 107 mıñnan, aqökpege asqınğanı 31 mıñnan astı. DDSW mälimetinşe, Qazaqstanda auırğandardıñ sanı 139 mıñğa juıqtağan. Degenmen Ükimet koronavirus pen onıñ pnevmoniyasın eki bölek eseptep keledi.

Pandemiya bastalğalı jalpı jiını virus jwqqandardıñ 2,6 mıñnan artığı (KVI+ / U07.1 – 1707, KVI- / U07.2 – 345, ilespe aurulardan – 576) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingen 576 adamdı jalpı statistikağa qosıp eseptemeydi. Sarapşılar bwğan qarsı. Olardıñ aytuınşa, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

"The Qazaq Times"