22 قىركۇيەكتە قازاقستاندا 76 ادامنان كوروناۆيرۋس، 364 ادامنان پنەۆمونيا انىقتالعان. 

دەنمين دەرەگىنشە، كوروناۆيرۋس جاعدايىنىڭ ەڭ كوبى ون كۇن قاتارىنان شىعىس قازاقستان وبلىسىندا 28 ادامنان تابىلعان.  وڭىردەگى جاعداي باسقا ايماقتارعا قاراعاندا ءورشىپ تۇر. استانادا دا 20 ناۋقاس تابىلعان.

قازىرگى تاڭدا ەلدە 3524 ادام ەمدەلىپ جاتىر. ونىڭ 1868-ءى ستاتسيوناردا، 1656-سى امبۋلاتوريادا.
جاعدايى قيىن 101 ناۋقاستىڭ 14-ءىنىڭ  احۋالى قاتتى ناشارلاعان. سونداي-اق، 20 ادام وكپەنى جاساندى جەلدەتۋ اپپاراتىمەن تىنىستاپ جاتىر.​

سونىمەن قوسا، سەيسەنبى كوروناۆيرۋس پنەۆمونياسىنا شالدىققان 364 ادام تىركەلىپتى. بىراق ولاردىڭ قانشاسى قاي ايماقتان ەكەنى بەلگىسىز. پتر تەستى تەرىس شىققانىمەن، كوروناۆيرۋس سالدارىنان اسقىنعان اقوكپە اۋرۋىنىڭ ايماقتارعا تارالۋ دەرەگىن تۇراقتى تۇردە جاريالاۋعا ۋادە ەتكەن مينيستر الەكسەي تسوي دا، ونىڭ كومەكشىسى، ۆەدومستۆونىڭ رەسمي وكىلى باعدات قوجاحمەتوۆ تە سوزىندە تۇرعان جوق. ءالى كۇنگە دەيىن كوروناۆيرۋس پنەۆمونياسىنىڭ وڭىرلەردەگى ديناميكاسىن بىلە الماي كەلەمىز.

ەلدە كوروناۆيرۋس جۇققانى پتر-تەستىمەن راستالعاندار 107 مىڭنان، اقوكپەگە اسقىنعانى 31 مىڭنان استى. ددسۇ مالىمەتىنشە، قازاقستاندا اۋىرعانداردىڭ سانى 139 مىڭعا جۋىقتاعان. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەپ كەلەدى.

پاندەميا باستالعالى جالپى جيىنى ۆيرۋس جۇققانداردىڭ 2,6 مىڭنان ارتىعى (كۆي+ / U07.1 – 1707, كۆي- / U07.2 – 345, ىلەسپە اۋرۋلاردان – 576) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 576 ادامدى جالپى ستاتيستيكاعا قوسىپ ەسەپتەمەيدى. ساراپشىلار بۇعان قارسى. ولاردىڭ ايتۋىنشا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

"The Qazaq Times"