Bügin Qasım-Jomart Toqaev halıqqa televiziyalıq ündeu jasadı. Ündeude prezident pandemiya kezinde Qazaqstan wşırasqan mäseleler, elde qalıptasqan ahual jöninde mälimdep, el medicinası pandemiyağa dayın bolmağanın moyındadı.

Öz kezeginde prezident Qazaqstan densaulıq saqtau salasınıñ pandemiyanı jeñuge dayın bolmağanın tolıqtay moyındap, tergeu jwmıstarı jürgiziletinin eskertti. Toqaevtıñ aytuınşa, eldegi ahualdıñ kürt naşarlauına «eks-ministr qızmetindegi qatelikter, halıqtıñ saqtıq şaraların saqtamauı» sebep boldı. Bwl jöninde ol: «İndetpen kürestiñ nätijeli boluı eñ aldımen barşa jwrttıñ sanalı äreketi men jauapkerşiligine balanıstı. Bwl öte qauipti, batpandap kiretin, mısqaldap şığatın dert. Koronavirustıñ taraluına baylanıstı densaulıq saqtau jüyesine köp auırtpalıq tüsude. Aşığın aytu kerek, densaulıq saqtau jüyesi indetke toytarıs beruge dayın bolğan joq», – dep mälimdedi.

«Bwl indetti adamzat juıq arada jeñe qoymas. Alayda uayım men qayğığa batıp, türli qauesetterge senip, eñsemizdi tüsiruge tağı da bolmaydı. Salmaqtı, sabırlı bolayıq. Bizdiñ jwmısımız ayqın, qoğam aldında eş närseni jasırmay, aşıq aytamız. Bolaşaqta da solay boladı», – dedi.

Sonımen qatar Toqaev 13 şildeni Wlttıq aza küni dep jariyaladı. «Mınau alapat indet aramızdan talay asıldarımızdı jwlıp äketude. Büginde qara jamılıp otırğan azamattardıñ qayğısına ortaqtasıp, köñil aytamın. Sol üşin 13 şildeni wlttıq aza küni dep jariyalaymın», – dedi ol.

Älem boyınşa koronavirus infekciyasın jwqtırğandar sanı 11 millionnan astı. Düniejüzilik densaulıq saqtau wyımı Qıtaydan tarağan bwl virustı «pandemiya» dep jariyalağan bolatın. Virustı alğaş jwqtırğandar Qıtaydıñ Hubey provinciyasınıñ Uhan' qalasında tirkeldi.

Pandemiya bastalğalı, Qazaqstandağı ahual kürt naşarladı. Resmi mälimetter boyınşa, respublikada KVI jwqtırğandardıñ sanı 51 059 adamğa jetti. 264 adam qaytıs boldı. Mıñdağan adam ökpe qabınuına (pnevmoniya) şaldıqqan, ajal qwşqandar bar. Densaulıq saqtau ministrligi pnevmoniya diagnozı qoyılğan nauqastardıñ birazınan koronavirus deregi anıqtalğan joq deydi. Biraq olardı da COVID-19 hattamasımen emdep jatır.

Auruhanalarda nauqastarğa orın, därihanalarda qajetti preparattar tapşılığı jağdaydıñ uşığuına äkep soqqan.

2 şilde Memlekettik komissiya otırısında Qazaqstandağı epidemiologiyalıq ahualdı twraqtandıru şaraları qaralıp, elde 14 künge karantin şekteuleri engizilgen. Sol küni qazirgi densaulıq saqtau ministri Aleksey Coy elde COVID-19 dertinen qaytıs bolğandar sanı aptasına bir ret jariyalanadı dep mälimdedi. Key sarapşılar ministrliktiñ ölim-jitimdi esepteu täsilin sınap, bwl eldegi pandemiya jağdayın naqtı bağalauğa kedergi keltiredi dep sanaydı.

"The Qazaq Times"