بۇگىن قاسىم-جومارت توقاەۆ حالىققا تەلەۆيزيالىق ۇندەۋ جاسادى. ۇندەۋدە پرەزيدەنت پاندەميا كەزىندە قازاقستان ۇشىراسقان ماسەلەلەر، ەلدە قالىپتاسقان احۋال جونىندە مالىمدەپ، ەل مەديتسيناسى پاندەمياعا دايىن بولماعانىن مويىندادى.

ءوز كەزەگىندە پرەزيدەنت قازاقستان دەنساۋلىق ساقتاۋ سالاسىنىڭ پاندەميانى جەڭۋگە دايىن بولماعانىن تولىقتاي مويىنداپ، تەرگەۋ جۇمىستارى جۇرگىزىلەتىنىن ەسكەرتتى. توقاەۆتىڭ ايتۋىنشا، ەلدەگى احۋالدىڭ كۇرت ناشارلاۋىنا «ەكس-مينيستر قىزمەتىندەگى قاتەلىكتەر، حالىقتىڭ ساقتىق شارالارىن ساقتاماۋى» سەبەپ بولدى. بۇل جونىندە ول: «ىندەتپەن كۇرەستىڭ ناتيجەلى بولۋى ەڭ الدىمەن بارشا جۇرتتىڭ سانالى ارەكەتى مەن جاۋاپكەرشىلىگىنە بالانىستى. بۇل وتە قاۋىپتى، باتپانداپ كىرەتىن، مىسقالداپ شىعاتىن دەرت. كوروناۆيرۋستىڭ تارالۋىنا بايلانىستى دەنساۋلىق ساقتاۋ جۇيەسىنە كوپ اۋىرتپالىق تۇسۋدە. اشىعىن ايتۋ كەرەك، دەنساۋلىق ساقتاۋ جۇيەسى ىندەتكە تويتارىس بەرۋگە دايىن بولعان جوق»، – دەپ مالىمدەدى.

«بۇل ىندەتتى ادامزات جۋىق ارادا جەڭە قويماس. الايدا ۋايىم مەن قايعىعا باتىپ، ءتۇرلى قاۋەسەتتەرگە سەنىپ، ەڭسەمىزدى تۇسىرۋگە تاعى دا بولمايدى. سالماقتى، سابىرلى بولايىق. ءبىزدىڭ جۇمىسىمىز ايقىن، قوعام الدىندا ەش نارسەنى جاسىرماي، اشىق ايتامىز. بولاشاقتا دا سولاي بولادى»، – دەدى.

سونىمەن قاتار توقاەۆ 13 شىلدەنى ۇلتتىق ازا كۇنى دەپ جاريالادى. «مىناۋ الاپات ىندەت ارامىزدان تالاي اسىلدارىمىزدى جۇلىپ اكەتۋدە. بۇگىندە قارا جامىلىپ وتىرعان ازاماتتاردىڭ قايعىسىنا ورتاقتاسىپ، كوڭىل ايتامىن. سول ءۇشىن 13 شىلدەنى ۇلتتىق ازا كۇنى دەپ جاريالايمىن»، – دەدى ول.

الەم بويىنشا كوروناۆيرۋس ينفەكتسياسىن جۇقتىرعاندار سانى 11 ميلليوننان استى. دۇنيەجۇزىلىك دەنساۋلىق ساقتاۋ ۇيىمى قىتايدان تاراعان بۇل ۆيرۋستى «پاندەميا» دەپ جاريالاعان بولاتىن. ۆيرۋستى العاش جۇقتىرعاندار قىتايدىڭ حۋبەي پروۆينتسياسىنىڭ ۋحان قالاسىندا تىركەلدى.

پاندەميا باستالعالى، قازاقستانداعى احۋال كۇرت ناشارلادى. رەسمي مالىمەتتەر بويىنشا، رەسپۋبليكادا كۆي جۇقتىرعانداردىڭ سانى 51 059 ادامعا جەتتى. 264 ادام قايتىس بولدى. مىڭداعان ادام وكپە قابىنۋىنا (پنەۆمونيا) شالدىققان، اجال قۇشقاندار بار. دەنساۋلىق ساقتاۋ مينيسترلىگى پنەۆمونيا دياگنوزى قويىلعان ناۋقاستاردىڭ ءبىرازىنان كوروناۆيرۋس دەرەگى انىقتالعان جوق دەيدى. بىراق ولاردى دا COVID-19 حاتتاماسىمەن ەمدەپ جاتىر.

اۋرۋحانالاردا ناۋقاستارعا ورىن، ءدارىحانالاردا قاجەتتى پرەپاراتتار تاپشىلىعى جاعدايدىڭ ۋشىعۋىنا اكەپ سوققان.

2 شىلدە مەملەكەتتىك كوميسسيا وتىرىسىندا قازاقستانداعى ەپيدەميولوگيالىق احۋالدى تۇراقتاندىرۋ شارالارى قارالىپ، ەلدە 14 كۇنگە كارانتين شەكتەۋلەرى ەنگىزىلگەن. سول كۇنى قازىرگى دەنساۋلىق ساقتاۋ ءمينيسترى الەكسەي تسوي ەلدە COVID-19 دەرتىنەن قايتىس بولعاندار سانى اپتاسىنا ءبىر رەت جاريالانادى دەپ مالىمدەدى. كەي ساراپشىلار مينيسترلىكتىڭ ءولىم-ءجىتىمدى ەسەپتەۋ ءتاسىلىن سىناپ، بۇل ەلدەگى پاندەميا جاعدايىن ناقتى باعالاۋعا كەدەرگى كەلتىرەدى دەپ سانايدى.

"The Qazaq Times"