S.Jaswzaqovtıñ ŞIW bas hatşısımen kezdesui. foto: mod.gov.kz

QR Qorğanıs ministrliginde Qazaqstan qorğanıs vedomstvosınıñ basşısı general-polkovnik Säken Jaswzaqovtıñ ŞIW qauipsizdik keñesi hatşılarınıñ otırısına qatısu üşin Astana qalasına kelgen Şanhay Intımaqtastıq Wyımınıñ bas hatşısı Raşid Älimovpen kezdesui ötti. Bwl turalı ministrliktiñ resmi saytında habarlandı.  

Kezdesu barısında ŞIW keñistigindegi qauipsizdik, zamanaui qauip-qaterlerge tötep beru, sonday-aq, ŞIW memleketteri qorğanıs ministrleriniñ aldağı keñesine dayındıq mäseleleri talqılandı. Taraptardıñ aytuınşa, Şanhay Intımaqtastıq Wyımı äskeri-sayasi blok bolıp tabılmaydı. Sonımen birge, qatısuşı memleketter lañkestikpen, ekstremizm jäne separatizmmen küresude tabandılıqtı jäne tolıq kölemde olarğa qarsı twruğa äzirlikti paş etedi. Bwl maqsattarda är eki jıl sayın «Beybit missiya» halıqaralıq lañkestikke qarsı oqu-jattığuı, taulı-eger'lik bölimşelerdiñ birlesken jattığuları, qauipsizdik ayasındağı konferenciyalar men seminarlar ötkizilip twradı. QR Qorğanıs ministri Qazaqstan ŞIW memleketterimen ğana emes, sonımen birge, qauipsizdikti qamtamasız etu müddesinde wyımnıñ seriktesteri jäne baqılauşılarımen nätijeli özara äreket etu üşin aşıq ekenin atap ötti. «Dostıq pen ıntımaqtastıq ruhında seriktestik qarım-qatınastardı damıtu, sonday-aq, barlıq deñgeylerde baylanıstı tereñdetu memleketimiz ben halqımızdıñ aldında twrğan zamanauilıqtıñ köptegen mäselelerin şeşu üşin negiz bolıp tabıladı», - dep atap ötti Qazaqstan qorğanıs vedomstvosınıñ basşısı.

“The Qazaq Times”