Prezident Toqaevtıñ karantin rejimine baylanıstı mälimdemesi jariyalandı. Ol karantin şekteuin birtindep bosañsıtu jäne indettiñ ekinşi tolqını, şarıqtau şegi turalı habarladı.  

"Elimizdegi qazirgi ahualğa baylanıstı jäne Memlekettik komissiyanıñ wsınıstarın negizge alıp, men TJ merzimin 11 mamırğa deyin wzartu turalı jarlıq şığaru jöninde şeşim qabıldadım. Bwl – biz bastan ötkerip jatqan kürdeli kezeñniñ talabı. Zañğa säykes 11 mamırda Tötenşe jağday rejimi ayaqtaladı", – dedi prezident.

İndettiñ ekinşi kezeñi bastaluı ıqtimaldığınan seskengen prezident "jağdaydıñ baqılaudan şığıp ketu qaupi barın" ayttı. Toqaev "Qazaqstan indettiñ şarıqtau şeginen ötken joq", - dedi, sonday-aq äleumettik-ekonomikalıq şekteulerdi aqırındap alu qadamına qarap bosañsımauğa şaqırdı. Osığan baylanıstı prezident sözin "Koronavirusqa jeñil-jelpi qarauğa bolmaydı. Karantin talaptarınan bir sätke bas tartsaq, dertti qaytadan örşitip alamız", – dep jalğağan.

Toqaev öz ündeuinde eldiñ "keybir aymaqtarında, äsirese, Almatıda virus jwqtırğan därigerler jäne medicina qızmetkerleri öte köp" bolğanına ökinişin bildirgen.

"Barlıq qauipsizdik şaraların mwqiyat oylastırıp, aviaciyalıq jäne sanitarlıq qızmetterdiñ özara is-qimıl tärtibin äzirleu mañızdı. Karantin rejimin birtindep jeñildetu degenimiz özimiz üyrengen kündelikti tirşilikke qayta oralu emes ekenin wğınğanımız jön",- deydi prezident.

Alayda Toqaev oyın-sauıq jäne sauda ortalıqtarı, kinoteatrlar, restorandar, sayabaqtar men adam köp jinalatın basqa da orındar äzirge jabıq bolatının habaraldı. Joğarı oqu orındarı, kolledjder, mektepter qaşıqtan oqıtudı jalğastıra beretinin ayttı.

"Men üşin är azamattıñ ömirinen qımbat eşteñe joq. Sonımen qatar Tötenşe jağday rejimin qamtamasız etu jönindegi Memlekettik komissiya karantin talaptarın jeñildetuge dayın. Aldımen, virustıñ taraluın qatañ baqılauda wstap otırğan oblıstar men qalalardan bastauğa boladı. Memlekettik komissiyağa elordanıñ ülgisimen elimizdiñ barlıq aymağında öz jwmıstarına kirisetin mekemelerdiñ tizimin jasau tapsırıldı. Birinşi kezekte önerkäsip käsiporındarı, qwrılıs, jol qwrılısı jäne kölik kompaniyaları, bankter jäne halıqqa qızmet körsetu ortalıqtarı jwmısqa kirisui kerek", – delingen prezident mälimdemesinde.

Jibisudiñ alğaşqı körinisi retinde 1 mamırdan bastap ükimet astana men Almatı reysterin aşatın boladı.

TJ kezinde jıldar boyı qordalanğan medicina salasındağı köptegen mäselelerdiñ beti aşılıp, qızmettik-azamattıq qwqığın talap etken därigerler qatarı köbeydi. Bwdan aynalıp ötpesin bilgendikten bolar Aqordadan jariyalanğan ündeude «dağdarıstan keyin de medicinanı damıtuğa basa män beretinin» atap ötipti. Tipti Toqaev ükimet pen paralamentke ötken kemşilikterdi eskere otırıp "Halıq densaulığı jäne densaulıq saqtau jüyesi turalı" jaña kodeksti tolıqtırıp, sessiya soñına deyyin qabıldauğa tapsırma jüktedi.

Küni şikizattıq öndiriske qarağan Qazaqstanda mwnay arzanday bergende teñge qwnsızdanğandıqtan äri TJ biznes pen memlekettiñ barlıq salasın twralap qoyğandıqtan, indetpen qatar dağdarıs tuıp, bir aynalğanda şır aynaldırğanı belgili. Toqaev düniejüzin şarpığan dağdarıstan keyingi kezeñge qamdanu qajettigi jaylı oyın bildirdi. Memleket basşısı 57 künge sozılatın TJ merzimi ayaqtalğanşa ükimet pen Wlttıq bank birlese otırıp "Ekonomikalıq damudı qalpına keltiru jönindegi keşendi jospar" äzirleui tiis dep şeşipti. Keşendi josparda "dağdarıstan zardap şekken salalarğa qoldau körsetu tetigi qamtıladı" desedi.

"Büginde elimiz damudıñ jaña deñgeyine qadam basıp otır. Şın mäninde, biz endi mülde jaña jağdayda ömir süretin bolamız. Sondıqtan ekonomikağa jäne memlekettik basqaru jüyesine auqımdı äri mañızdı özgerister qajet", – dep sabaqtağan prezident "jaña jağdaydıñ" qalay boların aşıp aytpadı.

Prezidenttiñ sözinşe, ükimet kelesi ayda tabısınan ayırılğan azamattarğa 42500 teñge kölemindegi järdemaqını berudi jalğastıruı tiis. Oğan qaytadan ötinim jiberudiñ qajeti joq.

Ötken senbi prezident televiziyalıq ündeu joldaytını habarlanıp edi. Biraq bwl jönindegi mälimdeme Aqorda portalında mätin küyinde jariyalandı.

İndettiñ örşuine baylanıstı Qazaqstanda TJ rejimi 16 naurızda engizilgen edi. Şekteu kezeñi 11 mamırğa deyin sozıların eskersek, är qazaqstandıq bir mwğalimniñ "eñbek demalısınday" uaqıtqa (zañ jüzinde mwğalim jılına bir märte 56 kün eñbek demalısına şığadı, qwjat/qağaz jüzinde – avt.) oqşaulanadı eken. Bügingi tañda elde tirkelgen keyster sanı 2780-ge jetti. 17 öñirdiñ 10-ında virus jwqtırğandar qatarı jüzden asıp ketti. Eñ köbi Almatı qalasında 850-dey, astanada 530-ğa juıq adam dertke şaldıqqan. Aurudan ayığa almağan 25 adam qaytıs boldı. 

P.S. "Zañğa säykes 11 mamırda TJ rejimi ayaqtaladı" degen mälimet  däl sol sayta "V sootvetstvii s zakonom 11 maya rejim ÇP budet zaverşen, esli, koneçno, ne proizoydet novaya massovaya vspışka epidemii. Nadeyus', çto etogo ne sluçitsya" dep tolığıraq orısşalanğan. Barlıq söylem teñ ülgide berilgende tek osı habardıñ qazaq tilindegi nwsqası nelikten qısqarıp qalğanı belgisiz.

"The Qazaq Times"