Körneki suret. Äliya Nazarbaeva jäne onıñ kitabı. Fotokollaj: aşıq dereköz materialdarı negizinde

Qazaqstanda 30 jıl bilikte bolğan Nwrswltan Nazarbaevtıñ kenje qızı Äliya Nazarbaeva «Mesto silı» degen alğaşqı kitabın basıp şığardı. Kitap twsaukeseri birneşe aydan beri epidahual oñalmay «qızıl aymaqta» twrğan Almatı qalasındağı Abay atındağı Qazaq Memlekettik akademiyalıq opera jäne balet teatrında merekelik keş türinde ötti. Kelgen qonaqtıñ köpşiligi betperde rejimin saqtamağan. Nazarbaeva toy-koncert formatında ötken jiın «sanitarlıq talaptarğa say ötti» degen pikirde. 

Kitabına baylanıstı jariyalağan jazbasında avtor «twsaukeser Almatıda, GATOB-ta (Abay atındağı Qazaq Memlekettik akademiyalıq opera jäne balet teatrı atauınıñ orısşa qısqartılğan atauı – QT)  ötti. Mwnda 30%-ğa deyin toltıruğa boladı jäne Ashyq jüyesi jwmıs isteydi» degen uäj keltiredi.

«Keş qonaqtarı kitaptıñ ideyası men maqsatı, bizdiñ komandanıñ qazirgi jäne josparlanğan jobaları turalı bildi,  «Sazgen Sazı» qazaq halıq aspaptar orkestriniñ şağın koncertin tıñdadı. Däl osı sät keremet boldı, jandı äuen bärin eliktirdi» deydi.

Keşke qonaq retinde şaqırılğan tanımal twlğalar Instagram äleumettik jelisine keş barısınan türli beyne-foto materialdar jüktedi. Reseylik belgili şoumen Maksim Galkin jürgizgen keşte resmi tanıstırılımnan keyin än-sauıq qwrğanı, bilegenin köruge boladı. Keñ dastarhan basındağı qonaqtar eş betperdesiz tığız jayğasqan. Iğı-jığı jürgen jwrttıñ köbi kil ığay men sığay.

Qonaqtar arasında är salada belgili azamattar: Aqan Sataev, Ädil Ahmet, Al'mira Twrsın, Sanjar Mädi, Beybit Qwsayınov, Jansaya Abdulmalik, Nargiz Qwsain, Nwrlan-Aygerim Qoyanbaevtar, Armanjan Baytasov, Säbit Rahımbaev, Däuit Şayhıislamov, Dana Ormanbaeva t.b. körindi. Toyğa barğan sıylı qonaqtar jariyalağan videolarda dayaşıdan özgesi betperde taqpağanın añğaruğa boladı.

Jelide tarağan türli instastoris jazbalarda Äliya Nazarbaevanıñ qonaqtarğa qarata «Osınday uaqıtta, karantin, kovid kezde sizder sonda da qorıqpay qoldau bildiruge kelgenderiñizge raqmet, keş sizderge wnaydı dep ümittenemin» degen.

Redakciya tilşisi Almatı qalasınıñ Sanitariyalıq-epidemiologiyalıq baqılau departamentinen oqiğa turalı pikir swradı. Biraq jauaptı mamandar qanday da bir aqparat bere qoymadı. Bas sanitar däriger Jandarbek Bekşinmen baylanısu mümkin bolmadı, qoñırau şalğanımızda äldebir sebeppen twtqanı birneşe ret öşirip tastadı. Soñğı märte habarlasqanımızda dwrıs estilmey twrğanın aytıp, sözin qısqa qayırdı. Ädette qoğamdıq tamaqtanu orındarı men restorandarda köpşiliktiñ jinalmauın qwramına birneşe qwzırlı mekemeniñ mamandarı kiretin monitoring toptarı tekserip-qadağalaydı. Nazarbaevanıñ avtorlığı jäne  wyımdastıruımen ötken merekelik keştiñ zañdılığı men sanitarlıq talaptardıñ saqtaluı turalı swraqtıñ bası aşıq qaldı. Osı uaqıtqa deyin qalalıq jergilikti atqaruşı bilik ökilderi türli formatta ötken merekelik şaralarğa qatısqan belgili twlğalar men wyımdastıruşılardı karantin erejesin bwzğanı üşin äkimşilik jauapqa tartıp, ayıppwlğa kesken.

Äliya Nazarbaeva jelidegi jazbasında is-şaranıñ  maqsatı «publicistikalıq debyutiniñ» jay tanıstıru ğana emes, «jasıl aumaqtı» damıtuğa arnalğan qayırımdılıq aukcionın ötkize otırıp köptiñ nazarın qorşağan orta mäselesine audaru bolğanın jazadı. Onıñ josparınşa, bässauda men kitap satılımınan tüsken qarjığa Qazaqstan öñirleri men astana mañındağı ormanğa ağaş otırğızılıp, kögaldandırılmaq.

Ekomäseleler turalı jii söz qozğaytın Äliya Nazarbaeva «Küş mekeni» (tüpnwsqa atauı «Mesto silı») kitabınıñ qazaqşa nwsqası Täuelsizdik küni qarsañında jeltoqsan ayında jarıq köretinin jetkizdi.

Qala indettiñ törtinşi tolqınında köptegen twrğınınan ayırıldı, mıñdağan adam auırıp, densaulıq saqtau jüyesine salmaq  tüsti. Epidkartada birneşe aydan beri «qızıl aymaqta» twrğan Almatıda pandemiya bastalğalı 165 mıñnan asa adam auırğan, onıñ 10 mıñğa juığı qırküyek ayınıñ alğaşqı jartısında anıqtalğan. Qazir respublikada anıqtalğan kündelikti eseptiñ şirek böligi Almatı qalasına tiesili bolıp otır.

Azattıq radiosınıñ jariyalağan asa ıqpaldı «Nazarbaev äuletin tügendesek» dep atalatın mul'timediyalı material boyınşa, 41 jasatağı Äliya Nazarbaeva 2018 jılı Ädebiet pen öner salası boyınşa memlekettik sıylıq alğan. Qazaqstan prezidenti äkimşiliginde jalpı bölim keñesşisi bolğan. «Caspian Industries Ltd» (Vita mineraldı suı) kompaniyasınıñ bas direktorı, «Almatıfarm» korporaciyasınıñ prezidenti, «Elitstroy» qwrılıs kompaniyasınıñ direktorlar keñesiniñ törayımı, Almatıdağı «Wellness Club LUXOR» sauıqtıru-sport keşeniniñ iesi. 2011 jıldan Italiyanıñ Damiani zerger üyimen ıntımaqtasıp, Alsara degen ataumen zerger bwyımdarın öndiriske şığarğan. 1998 jılı Qırğızstan prezidenti Asqar Aqaevtıñ wlı Aydar Aqaevqa twrmısqa şıqqan, keyin ajırasıp, 2001 jılı biznesmen Daniyar Hasenovpen twrmıs qwrğan. Keyin onımen de ajırasıp, «Qaztransoyl» kompaniyasınıñ bas direktorı Dimaş Dosanovpen bas qosqan. Tiara (2007), Alsara (2011), Aylana (2018) esimdi üş qızı, Aldiyar (2016) esimdi wlı bar.

The Qazaq Times