پرەزيدەنت توقاەۆتىڭ كارانتين رەجيمىنە بايلانىستى مالىمدەمەسى جاريالاندى. ول كارانتين شەكتەۋىن بىرتىندەپ بوساڭسىتۋ جانە ىندەتتىڭ ەكىنشى تولقىنى، شارىقتاۋ شەگى تۋرالى حابارلادى.  

"ەلىمىزدەگى قازىرگى احۋالعا بايلانىستى جانە مەملەكەتتىك كوميسسيانىڭ ۇسىنىستارىن نەگىزگە الىپ، مەن تج مەرزىمىن 11 مامىرعا دەيىن ۇزارتۋ تۋرالى جارلىق شىعارۋ جونىندە شەشىم قابىلدادىم. بۇل – ءبىز باستان وتكەرىپ جاتقان كۇردەلى كەزەڭنىڭ تالابى. زاڭعا سايكەس 11 مامىردا توتەنشە جاعداي رەجيمى اياقتالادى", – دەدى پرەزيدەنت.

ىندەتتىڭ ەكىنشى كەزەڭى باستالۋى ىقتيمالدىعىنان سەسكەنگەن پرەزيدەنت "جاعدايدىڭ باقىلاۋدان شىعىپ كەتۋ قاۋپى بارىن" ايتتى. توقاەۆ "قازاقستان ىندەتتىڭ شارىقتاۋ شەگىنەن وتكەن جوق", - دەدى، سونداي-اق الەۋمەتتىك-ەكونوميكالىق شەكتەۋلەردى اقىرىنداپ الۋ قادامىنا قاراپ بوساڭسىماۋعا شاقىردى. وسىعان بايلانىستى پرەزيدەنت ءسوزىن "كوروناۆيرۋسقا جەڭىل-جەلپى قاراۋعا بولمايدى. كارانتين تالاپتارىنان ءبىر ساتكە باس تارتساق، دەرتتى قايتادان ءورشىتىپ الامىز", – دەپ جالعاعان.

توقاەۆ ءوز ۇندەۋىندە ەلدىڭ "كەيبىر ايماقتارىندا، اسىرەسە، الماتىدا ۆيرۋس جۇقتىرعان دارىگەرلەر جانە مەديتسينا قىزمەتكەرلەرى وتە كوپ" بولعانىنا وكىنىشىن بىلدىرگەن.

"بارلىق قاۋىپسىزدىك شارالارىن مۇقيات ويلاستىرىپ, اۆياتسيالىق جانە سانيتارلىق قىزمەتتەردىڭ ءوزارا ءىس-قيمىل ءتارتىبىن ازىرلەۋ ماڭىزدى. كارانتين رەجيمىن بىرتىندەپ جەڭىلدەتۋ دەگەنىمىز ءوزىمىز ۇيرەنگەن كۇندەلىكتى تىرشىلىككە قايتا ورالۋ ەمەس ەكەنىن ۇعىنعانىمىز ءجون",- دەيدى پرەزيدەنت.

الايدا توقاەۆ ويىن-ساۋىق جانە ساۋدا ورتالىقتارى، كينوتەاترلار، رەستوراندار، ساياباقتار مەن ادام كوپ جينالاتىن باسقا دا ورىندار ازىرگە جابىق بولاتىنىن حابارالدى. جوعارى وقۋ ورىندارى، كوللەدجدەر، مەكتەپتەر قاشىقتان وقىتۋدى جالعاستىرا بەرەتىنىن ايتتى.

"مەن ءۇشىن ءار ازاماتتىڭ ومىرىنەن قىمبات ەشتەڭە جوق. سونىمەن قاتار توتەنشە جاعداي رەجيمىن قامتاماسىز ەتۋ جونىندەگى مەملەكەتتىك كوميسسيا كارانتين تالاپتارىن جەڭىلدەتۋگە دايىن. الدىمەن، ۆيرۋستىڭ تارالۋىن قاتاڭ باقىلاۋدا ۇستاپ وتىرعان وبلىستار مەن قالالاردان باستاۋعا بولادى. مەملەكەتتىك كوميسسياعا ەلوردانىڭ ۇلگىسىمەن ەلىمىزدىڭ بارلىق ايماعىندا ءوز جۇمىستارىنا كىرىسەتىن مەكەمەلەردىڭ ءتىزىمىن جاساۋ تاپسىرىلدى. ءبىرىنشى كەزەكتە ونەركاسىپ كاسىپورىندارى، قۇرىلىس، جول قۇرىلىسى جانە كولىك كومپانيالارى، بانكتەر جانە حالىققا قىزمەت كورسەتۋ ورتالىقتارى جۇمىسقا كىرىسۋى كەرەك", – دەلىنگەن پرەزيدەنت مالىمدەمەسىندە.

ءجىبىسۋدىڭ العاشقى كورىنىسى رەتىندە 1 مامىردان باستاپ ۇكىمەت استانا مەن الماتى رەيستەرىن اشاتىن بولادى.

تج كەزىندە جىلدار بويى قوردالانعان مەديتسينا سالاسىنداعى كوپتەگەن ماسەلەلەردىڭ بەتى اشىلىپ، قىزمەتتىك-ازاماتتىق قۇقىعىن تالاپ ەتكەن دارىگەرلەر قاتارى كوبەيدى. بۇدان اينالىپ وتپەسىن بىلگەندىكتەن بولار اقوردادان جاريالانعان ۇندەۋدە «داعدارىستان كەيىن دە مەديتسينانى دامىتۋعا باسا ءمان بەرەتىنىن» اتاپ ءوتىپتى. ءتىپتى توقاەۆ ۇكىمەت پەن پارالامەنتكە وتكەن كەمشىلىكتەردى ەسكەرە وتىرىپ "حالىق دەنساۋلىعى جانە دەنساۋلىق ساقتاۋ جۇيەسى تۋرالى" جاڭا كودەكستى تولىقتىرىپ، سەسسيا سوڭىنا دەيىن قابىلداۋعا تاپسىرما جۇكتەدى.

كۇنى شيكىزاتتىق وندىرىسكە قاراعان قازاقستاندا مۇناي ارزانداي بەرگەندە تەڭگە قۇنسىزدانعاندىقتان ءارى تج بيزنەس پەن مەملەكەتتىڭ بارلىق سالاسىن تۇرالاپ قويعاندىقتان، ىندەتپەن قاتار داعدارىس تۋىپ، ءبىر اينالعاندا شىر اينالدىرعانى بەلگىلى. توقاەۆ دۇنيەجۇزىن شارپىعان داعدارىستان كەيىنگى كەزەڭگە قامدانۋ قاجەتتىگى جايلى ويىن ءبىلدىردى. مەملەكەت باسشىسى 57 كۇنگە سوزىلاتىن تج مەرزىمى اياقتالعانشا ۇكىمەت پەن ۇلتتىق بانك بىرلەسە وتىرىپ "ەكونوميكالىق دامۋدى قالپىنا كەلتىرۋ جونىندەگى كەشەندى جوسپار" ازىرلەۋى ءتيىس دەپ شەشىپتى. كەشەندى جوسپاردا "داعدارىستان زارداپ شەككەن سالالارعا قولداۋ كورسەتۋ تەتىگى قامتىلادى" دەسەدى.

"بۇگىندە ەلىمىز دامۋدىڭ جاڭا دەڭگەيىنە قادام باسىپ وتىر. شىن مانىندە، ءبىز ەندى مۇلدە جاڭا جاعدايدا ومىر سۇرەتىن بولامىز. سوندىقتان ەكونوميكاعا جانە مەملەكەتتىك باسقارۋ جۇيەسىنە اۋقىمدى ءارى ماڭىزدى وزگەرىستەر قاجەت", – دەپ ساباقتاعان پرەزيدەنت "جاڭا جاعدايدىڭ" قالاي بولارىن اشىپ ايتپادى.

پرەزيدەنتتىڭ سوزىنشە، ۇكىمەت كەلەسى ايدا تابىسىنان ايىرىلعان ازاماتتارعا 42500 تەڭگە كولەمىندەگى جاردەماقىنى بەرۋدى جالعاستىرۋى ءتيىس. وعان قايتادان ءوتىنىم جىبەرۋدىڭ قاجەتى جوق.

وتكەن سەنبى پرەزيدەنت تەلەۆيزيالىق ۇندەۋ جولدايتىنى حابارلانىپ ەدى. بىراق بۇل جونىندەگى مالىمدەمە اقوردا پورتالىندا ءماتىن كۇيىندە جاريالاندى.

ىندەتتىڭ ورشۋىنە بايلانىستى قازاقستاندا تج رەجيمى 16 ناۋرىزدا ەنگىزىلگەن ەدى. شەكتەۋ كەزەڭى 11 مامىرعا دەيىن سوزىلارىن ەسكەرسەك، ءار قازاقستاندىق ءبىر مۇعالىمنىڭ "ەڭبەك دەمالىسىنداي" ۋاقىتقا (زاڭ جۇزىندە مۇعالىم جىلىنا ءبىر مارتە 56 كۇن ەڭبەك دەمالىسىنا شىعادى، قۇجات/قاعاز جۇزىندە – اۆت.) وقشاۋلانادى ەكەن. بۇگىنگى تاڭدا ەلدە تىركەلگەن كەيستەر سانى 2780-گە جەتتى. 17 ءوڭىردىڭ 10-ىندا ۆيرۋس جۇقتىرعاندار قاتارى جۇزدەن اسىپ كەتتى. ەڭ كوبى الماتى قالاسىندا 850-دەي، استانادا 530-عا جۋىق ادام دەرتكە شالدىققان. اۋرۋدان ايىعا الماعان 25 ادام قايتىس بولدى. 

P.S. "زاڭعا سايكەس 11 مامىردا تج رەجيمى اياقتالادى" دەگەن مالىمەت  ءدال سول سايتا "ۆ سووتۆەتستۆي س زاكونوم 11 مايا رەجيم چپ بۋدەت زاۆەرشەن، ەسلي، كونەچنو، نە پرويزويدەت نوۆايا ماسسوۆايا ۆسپىشكا ەپيدەمي. نادەيۋس، چتو ەتوگو نە سلۋچيتسيا" دەپ تولىعىراق ورىسشالانعان. بارلىق سويلەم تەڭ ۇلگىدە بەرىلگەندە تەك وسى حاباردىڭ قازاق تىلىندەگى نۇسقاسى نەلىكتەن قىسقارىپ قالعانى بەلگىسىز.

"The Qazaq Times"