Qazaqstandağı sankciyalanbağan mitingilerdiñ birinde. Foto: aşıq derekköz

«El üyde otırğanda belsendilerdi bolmaytın ilikpen wstap jatır» degen jazbalar äleumettik jelilerde köbeydi. Bwğan negiz de joq emes. Säuirdiñ ortañğı onkündiginde azamattıq qoğamğa biraz qwrıq salınğanday boldı. Köbiniñ ayıbı – «bilikti sınauğa» sayadı.

Eldi eleñdetken wstaudıñ biri reforma jasaudı talap etken, «Nwr Otan» partiyasınıñ «kemşilikterin aşıq sınap jürgen» azamattıq belsendi Älnwr Il'yaşevqa qarsı Qılmıstıq kodekstiñ «Tötenşe jağday kezinde jalğan aqparat taratu» (274-bap, 4-tarmaq) babı boyınşa is qozğalıp, tergeu bastaldı. Ötken senbi belsendini eki ayğa qamadı. Oğan «bilik pen Nwr Otan partiyasın sınağanı üşin» bıltır da is qozğağan.

Il'yaşevti qamauğa «negiz bolğan» ayıppen prezident Toqaev qoğam senimin arttıru maqsatında qwrğan Keñestiñ (WQSK) müşesi bolğan, mediamenedjer, Habar jäne KTK arnalarında basşılıq qızmet atqarğan Arman Şoraev ta wstaldı. Sonday-aq policiya onıñ «äleumettik jelilerde birneşe ret şındıqqa janaspaytın jalğan aqparat taratıp, tötenşe jağday kezinde qoğamdıq tärtipke qauip töndirdi äri qoğam men memleket müddesine ziyan tigizdi» dep habarladı. Keşe, 20 säuir küni Şoraev eşqayda ketpeu turalı qolhatpen bosatılğanı aytıldı.

Al «Tötenşe jağday rejimin bwzdı» degen ayıppen basqaru jüyesindegi kemilikti aşıq sınap jürgen belsendi Wlan Şämşetti 18 säuir sayajayında wstap äketip, qamağan körinedi.

Däl osı ayıppen almatılıq azamattıq qoğamnıñ belsendi ökili Gennadiy Krest'yanskiydiñ de üstinen äkimşilik is qozğaldı. İske karantinge jabılğan Almatınıñ blok-beketteriniñ birinde 26 naurız küni tikeley efirge şığıp, qauipizdik şaralarınıñ kemşiligin sınağanı sebep bolğan. Belsendi tağılğan ayıppen kelispeydi. Qwqıq qorğau organdarı almatılıq tağı bir belsendi Danaya Qalievağa Qılmıstıq kodekstiñ «Bilik ökilin qorlau» babımen is qozğap, sotqa joldağan.

Qoğamdı dürliktirgen wstau-jazalau oqiğasınıñ biri Qazaqstanğa belgili «policiya saqşısı» atanıp ketken şımkenttik Ruslan Janpeyisovtiñ isi boldı. Megapolistiñ blok-beketteriniñ birinde özdiginşe tekseris jürgizbek bolğan belsendini sot «Tötenşe jağday kezinde qwqıqtıq tärtipti bwzuğa itermeleytin äreket jasadı» jäne «Tötenşe jağday rejimin bwzdı» degen eki ayıppen 35 künge qamadı.

Tağı bir jazalau şarası säuirdiñ alğaşqı düysenbisi Şu audanındağı «Qazpoşta» mekemesine jinalğan jwrttı körip, tikeley efirde «halıqqa jağday jasalmağanın» aytqan jambıldıq belsendi Bağdat Baqtıbaevqa da qoldanıldı. Azattıqtıñ habarlauınşa, ol Facebook jelisindegi tikeley efiri üşin 10 künge qamalıp şıqtı.

Arman Şoraevtıñ izin ala qazaqstandıq milliarder Marğwlan Seysenbaev ta 20 säuir äleumettik jelidegi akkaunttarı arqılı «özine qauip tönip twrğanın», üyiniñ aynalasın 30-40 şaqtı «komitettegiler» toruıldap jürgenin jariyaladı. Tipti telegram arnasında köpşilikten «negizsiz jalamen wstay qalğan jağdayda özine qatıstı resmi derekterge senbeuin swrap», akkaunttarınıñ kiltin auıstırıp, qamdanğanın habarladı.

Saray mänerinde söyleytin sarapşılardıñ köbi «jılımıq kezdiñ jemisi» turalı aytıp jürse, azamattıq qoğamnıñ belsendileri ärtürli sebeppen jauapqa tartılıp jatır.     

"The Qazaq Times"