تج كەزىندە ازاماتتىق قوعام بەلسەندىلەرىن ۇستاۋ جيىلەي ءتۇستى

«ەل ۇيدە وتىرعاندا بەلسەندىلەردى بولمايتىن ىلىكپەن ۇستاپ جاتىر» دەگەن جازبالار الەۋمەتتىك جەلىلەردە كوبەيدى. بۇعان نەگىز دە جوق ەمەس. ءساۋىردىڭ ورتاڭعى ونكۇندىگىندە ازاماتتىق قوعامعا ءبىراز قۇرىق سالىنعانداي بولدى. كوبىنىڭ ايىبى – «بيلىكتى سىناۋعا» سايادى.

ەلدى ەلەڭدەتكەن ۇستاۋدىڭ ءبىرى رەفورما جاساۋدى تالاپ ەتكەن، «نۇر وتان» پارتياسىنىڭ «كەمشىلىكتەرىن اشىق سىناپ جۇرگەن» ازاماتتىق بەلسەندى ءالنۇر يلياشەۆقا قارسى قىلمىستىق كودەكستىڭ «توتەنشە جاعداي كەزىندە جالعان اقپارات تاراتۋ» (274-باپ، 4-تارماق) بابى بويىنشا ءىس قوزعالىپ، تەرگەۋ باستالدى. وتكەن سەنبى بەلسەندىنى ەكى ايعا قامادى. وعان «بيلىك پەن نۇر وتان پارتياسىن سىناعانى ءۇشىن» بىلتىر دا ءىس قوزعاعان.

يلياشەۆتى قاماۋعا «نەگىز بولعان» ايىپپەن پرەزيدەنت توقاەۆ قوعام سەنىمىن ارتتىرۋ ماقساتىندا قۇرعان كەڭەستىڭ (ۇقسك) مۇشەسى بولعان، مەديامەنەدجەر، حابار جانە كتك ارنالارىندا باسشىلىق قىزمەت اتقارعان ارمان شوراەۆ تا ۇستالدى. سونداي-اق پوليتسيا ونىڭ «الەۋمەتتىك جەلىلەردە بىرنەشە رەت شىندىققا جاناسپايتىن جالعان اقپارات تاراتىپ، توتەنشە جاعداي كەزىندە قوعامدىق تارتىپكە قاۋىپ ءتوندىردى ءارى قوعام مەن مەملەكەت مۇددەسىنە زيان تيگىزدى» دەپ حابارلادى. كەشە، 20 ءساۋىر كۇنى شوراەۆ ەشقايدا كەتپەۋ تۋرالى قولحاتپەن بوساتىلعانى ايتىلدى.

ال «توتەنشە جاعداي رەجيمىن بۇزدى» دەگەن ايىپپەن باسقارۋ جۇيەسىندەگى كەمىلىكتى اشىق سىناپ جۇرگەن بەلسەندى ۇلان شامشەتتى 18 ءساۋىر ساياجايىندا ۇستاپ اكەتىپ، قاماعان كورىنەدى.

ءدال وسى ايىپپەن الماتىلىق ازاماتتىق قوعامنىڭ بەلسەندى وكىلى گەننادي كرەستيانسكيدىڭ دە ۇستىنەن اكىمشىلىك ءىس قوزعالدى. ىسكە كارانتينگە جابىلعان الماتىنىڭ بلوك-بەكەتتەرىنىڭ بىرىندە 26 ناۋرىز كۇنى تىكەلەي ەفيرگە شىعىپ، قاۋىپىزدىك شارالارىنىڭ كەمشىلىگىن سىناعانى سەبەپ بولعان. بەلسەندى تاعىلعان ايىپپەن كەلىسپەيدى. قۇقىق قورعاۋ ورگاندارى الماتىلىق تاعى ءبىر بەلسەندى دانايا قاليەۆاعا قىلمىستىق كودەكستىڭ «بيلىك وكىلىن قورلاۋ» بابىمەن ءىس قوزعاپ، سوتقا جولداعان.

قوعامدى دۇرلىكتىرگەن ۇستاۋ-جازالاۋ وقيعاسىنىڭ ءبىرى قازاقستانعا بەلگىلى «پوليتسيا ساقشىسى» اتانىپ كەتكەن شىمكەنتتىك رۋسلان جانپەيىسوۆتىڭ ءىسى بولدى. مەگاپوليستىڭ بلوك-بەكەتتەرىنىڭ بىرىندە وزدىگىنشە تەكسەرىس جۇرگىزبەك بولعان بەلسەندىنى سوت «توتەنشە جاعداي كەزىندە قۇقىقتىق ءتارتىپتى بۇزۋعا يتەرمەلەيتىن ارەكەت جاسادى» جانە «توتەنشە جاعداي رەجيمىن بۇزدى» دەگەن ەكى ايىپپەن 35 كۇنگە قامادى.

تاعى ءبىر جازالاۋ شاراسى ءساۋىردىڭ العاشقى دۇيسەنبىسى شۋ اۋدانىنداعى «قازپوشتا» مەكەمەسىنە جينالعان جۇرتتى كورىپ، تىكەلەي ەفيردە «حالىققا جاعداي جاسالماعانىن» ايتقان جامبىلدىق بەلسەندى باعدات باقتىباەۆقا دا قولدانىلدى. ازاتتىقتىڭ حابارلاۋىنشا، ول Facebook جەلىسىندەگى تىكەلەي ەفيرى ءۇشىن 10 كۇنگە قامالىپ شىقتى.

ارمان شوراەۆتىڭ ءىزىن الا قازاقستاندىق ميللياردەر مارعۇلان سەيسەنباەۆ تا 20 ءساۋىر الەۋمەتتىك جەلىدەگى اككاۋنتتارى ارقىلى «وزىنە قاۋىپ ءتونىپ تۇرعانىن»، ءۇيىنىڭ اينالاسىن 30-40 شاقتى «كوميتەتتەگىلەر» تورۋىلداپ جۇرگەنىن جاريالادى. ءتىپتى تەلەگرام ارناسىندا كوپشىلىكتەن «نەگىزسىز جالامەن ۇستاي قالعان جاعدايدا وزىنە قاتىستى رەسمي دەرەكتەرگە سەنبەۋىن سۇراپ»، اككاۋنتتارىنىڭ كىلتىن اۋىستىرىپ، قامدانعانىن حابارلادى.

ساراي مانەرىندە سويلەيتىن ساراپشىلاردىڭ كوبى «جىلىمىق كەزدىڭ جەمىسى» تۋرالى ايتىپ جۇرسە، ازاماتتىق قوعامنىڭ بەلسەندىلەرى ءارتۇرلى سەبەپپەن جاۋاپقا تارتىلىپ جاتىر.     

"The Qazaq Times"