Koronavirus infekciyasınıñ birneşe deregi tirkeluine baylanıstı indettiñ taraluına jol bermeu maqsatında Kerbwlaq audanınıñ Sarıözek kenti karantinge jabıladı. Bwl turalı audannıñ bas memlekettik sanitarlıq därigeri E.Eşkenovtıñ qaulısı qabıldandı, - dep habarlaydı Almatı oblısı äkiminiñ baspasöz qızmeti.

Oblıs aumağında büginge deyin COVID-19 virusın jwqtırğandar sanı 37 adamğa jetken.

Atalğan qaulıda karantin kezindegi şekteuler, sanitarlıq-dezinfekciyalıq şaralar turalı egjey-tegjeyli atap körsetilgen. Qaulı talaptarına säykes Sarıözek twrğındarınıñ üyden şığuına tıyım salınadı. Bir otbasıdan tek bir adamğa ğana künine bir ret azıq-tülikke, därihanağa, birinşi kezektegi qajettilikter aluğa şığuına rwqsat etiledi. Karantin rejimin bwzğan azamattar Qazaqstan Respublikasınıñ zañnamalarına säykes äkimşilik jauapqa tartıladı.

Atap ötsek, Sarıözektegi karantin 17 säuirden 18-ine qarağan tüngi sağat 00.00-den 1 mamırğa deyin sozıladı dep belgilengen.

Esteriñizge salsaq bwğan deyin jwrtşılıq 11 säuir küni sağat  21:00-da Birikken Arab Ämirlikterinde karantinde bolğan  135 jolauşınıñ Taldıqorğan äuejayına kelip qonğandığına narazılıqtarın bildirip, elimiz boyınşa koronavirustıñ taraluı birşama az aymaqqa qater tönui mümkin dep qauiptengen bolatın.

Aygerim Batırhanova

"The Qazaq Times"