Коронавирус инфекциясының бірнеше дерегі тіркелуіне байланысты індеттің таралуына жол бермеу мақсатында Кербұлақ ауданының Сарыөзек кенті карантинге жабылады. Бұл туралы ауданның бас мемлекеттік санитарлық дәрігері Е.Ешкеновтың қаулысы қабылданды, - деп хабарлайды Алматы облысы әкімінің баспасөз қызметі.

Облыс аумағында бүгінге дейін COVID-19 вирусын жұқтырғандар саны 37 адамға жеткен.

Аталған қаулыда карантин кезіндегі шектеулер, санитарлық-дезинфекциялық шаралар туралы егжей-тегжейлі атап көрсетілген. Қаулы талаптарына сәйкес Сарыөзек тұрғындарының үйден шығуына тыйым салынады. Бір отбасыдан тек бір адамға ғана күніне бір рет азық-түлікке, дәріханаға, бірінші кезектегі қажеттіліктер алуға шығуына рұқсат етіледі. Карантин режимін бұзған азаматтар Қазақстан Республикасының заңнамаларына сәйкес әкімшілік жауапқа тартылады.

Атап өтсек, Сарыөзектегі карантин 17 сәуірден 18-іне қараған түнгі сағат 00.00-ден 1 мамырға дейін созылады деп белгіленген.

Естеріңізге салсақ бұған дейін жұртшылық 11 сәуір күні сағат  21:00-да Біріккен Араб Әмірліктерінде карантинде болған  135 жолаушының Талдықорған әуежайына келіп қонғандығына наразылықтарын білдіріп, еліміз бойынша коронавирустың таралуы біршама аз аймаққа қатер төнуі мүмкін деп қауіптенген болатын.

Айгерім Батырханова

"The Qazaq Times"