Älem halqın dürliktirgen qaterli derttiñ ötken täuliktegi eñ özekti derekteri jäne Qazaqstannıñ is nasırğa şapqandağı «B» josparın jüzege asıru barısın nazarıñızğa wsınamız.

 

Dertti oşağı Qıtaydan emes, Europadan jwqtırıp qaytqan qazaqstandıqtar sanı

Densaulıq saqtau ministrliginiñ baspasöz qızmetiniñ mälimdeuinşe, elde keşe keşkisin, 18 naurız sağat 08:00-de koronavirus tabılğan nauqastar sanı 35-ke jetti.

Onıñ 17-si Almatıda, 18-i astanada tirkeldi. Bir künde virus jwqtırğan 23 adam anıqtaldı. Bir qızığı, diagnoz qoyılğan nauqastardıñ köbi Europa aumağınan kelgen, al 6 qañtardan beri Qıtay şekarasınan ötken mıñdağan azamattıñ eşbirinen koronavirus jağdayı tirkelmegen.

Seysenbi tüsten keyin Asqar Maminniñ jetekşiligimen ötken prezident janındağı tötenşe jağday rejimin jürgizu jönindegi memlekettik komissiya jiınında astana men Almatıda koronavirus jağdayınıñ uşığuına baylanıstı karantin jariyalandı.

 

Almatı men astana karantin rejimine köşedi

Bügin 19 naurızğa qarağan tüni COVID-19 indetiniñ etek aluı sebepti atalğan eki qalada qatañ qoğamdıq tärtip tetigi iske qosıladı. Naqtılap aytqanda, qosımşa şekteu, aldın alu jäne epidemiyağa qarsı birqatar şeşimder engiziledi.

19 naurız sağat 00:00-den bastap:

  • karantindi engizu jäne auqımdı sanitariyalıq-epidemiyağa qarsı is-şaralardı jüzege asırıladı;
  • karantin aymağın belgileu jäne odan kirip-şığu punkteri anıqtaladı;
  • adamdardıñ jürip twruı, sonday-aq kölik qwraldarınıñ kiruin/şığuı şekteledi;
  • üş sanat boyınşa arnayı emdeu mekemeleriniñ üzdiksiz jwmısın qamtamasız etiledi: jwqtırğandar, infekciyağa küdiktiler, karantindik;
  • halıqtı azıq-tülikpen qamtudı wyımdastıradı jäne qala aumağınıñ şekarasın anıqtaydı;
  • qoğamdıq kölik qozğalısın kündizgi uaqıtta toqtata twradı nemese şekteydi jäne tüngi uaqıtta toqtaydı;
  • azıq-tülikten basqa tauarlar satatın sauda bazarı, iri sauda ortalığı jwmısı toqtaydı, tek därihana jäne azıq-tülik dükeni ğana aşıq boladı;
  • sanitarlıq-epidemiya profilaktikasın küşeyte otırıp, «twtınuşığa jetkizu» qağidatı boyınşa qoğamdıq tamaqtanu ornınıñ jaña jwmıs rejimi belgilenedi;
  • HQKO-nıñ jwmıs rejimi qayta wyımdastırıladı.

Almatı şaharınıñ negizgi qaqpalarına 27 blok-beket ornatılatının habarlağan äkim Baqıtjan Sağıntaev «Qalağa qajetti tauarlar, tamaq, däri-därmekter men medicinalıq maqsattağı bwyımdar, qorğanıs qwraldarı men qorğanıs gigienalıq zattarı üşin «jasıl däliz» qwrılatın boladı», – dedi.

Onıñ sözinşe, blok-beketterde patrul'dik policiya jäne «Granit» polki, JQAJ (SOBR – orısşa),  qorğanıs ministrligi men Wlttıq gvardiya bölimşeleriniñ küşteri jwmıldırılu josparlanğan. Sonday-aq qala köleminde balabaqşalardıñ da jwmısı uaqıtşa toqtaydı.

 

Karantin küşine engen kezde qaladan kimder kirip-şığa aladı?

19 naurız küni sağat 00.00-den bastap engiziletin Almatı qalasınıñ aumağına adamdardıñ kirip-şığuı şekteu kelesi sanattağı twlğalar üşin qoldanılmaydı:

  • bwğan deyin qaladan şığıp ketken astana jäne Almatı qalasınıñ twrğındarı qalağa oralğan jağdayda;
  • bwğan deyin qalağa kirgen basqa öñirlerdiñ twrğındarı qaladan şığatın bolsa;
  • bwğan deyin şetelderge şığıp ketken QR azamattarı (olar QR-ğa oralğan jağdayda);
  • bwğan deyin elden şığu üşin el aumağına kirgen jäne elden şığıp ketu maqsatında äue köligimen şığatın şeteldikterge;
  • şeteldikter (azamattığı joq twlğalar), QR-da twruğa ıqtiyarhatı bar twlğalarğa;
  • bwğan deyin şetel memleketiniñ aumağına şığıp ketken QR azamattarı Qazaqstan Respublikasına oralğan jağdayda;
  • emdelu üşin şetelge şığatın QR azamattarına, olardıñ densaulıq saqtau mekemeleriniñ rastauşı qwjattarı bolğan jağdayda;
  • eldiñ jäne şetel memleketteriniñ diplomatiyalıq qızmetiniñ personalı jäne olardıñ otbası müşelerine, sonday-aq Qazaqstanğa Sırtqı ister ministrliginiñ şaqıruı boyınşa bağıt alğan şetel memleketteriniñ jäne halıqaralıq wyımdardıñ delegaciya müşelerine;
  • poyız jäne lokomativ brigadalarınıñ müşelerine, sonday-aq temirjol tasımalı procesine qatısatın twlğalarğa, äue, teñiz kölikteriniñ ekipajına, halıqaralıq jük tasımalın jüzege asıratın jük avtoköligi qwraldarınıñ jürgizuşilerine;
  • Qazaqstan Respublikası azamattarınıñ otbası müşeleri bolıp sanalatın şeteldikterge (tuıstıq baylanıs faktisi – eri (zayıbı), olardıñ ata-anaları men balaları ekeni rastalğan jağdayda);
  • astana jäne Almatı qalasında jwmıs isteytin, qala mañı aumağında twratın twrğındarğa;
  • äue jäne temir jol tranziti qatınasımen jürgen Qazaqstan azamattarına;
  • basqa da erekşe jağdaylarda, mwnday jağdaylar COVID-19-ben küresu jönindegi qalalıq ştabtarda derbes tärtipte qaraladı.

Apta basında memleket basşısı Toqaev Düniejüzilik densaulıq saqtau wyımınıñ jaña COVID-19 koronavirusınıñ pandemiyağa wlasuın rastağannan respublika şeñberinde 16 naurız ben 15 säuir aralığına tötenşe jağday jariyaladı.

 

Älemdegi ahual

Tötenşe jağday men karantindik rejim tek Qazaqstanda ğana emes, älemniñ köptegen elinde qolğa alınıp jatır. Dadax komerciyalıq emes kompaniyasına qarastı Worldometer statistikalıq aqparattar bazasınıñ soñğı deregi boyınşa, älem jwrtşılığın eleñdetip, ekonomikasın twralatqan COVID-19 indetine şaldıqqandar sanı – 200 mıñğa tayap, qaza bolğandar 8 mıñğa juıqtağan. Ötken täulikte Qıtayda 21 jaña nauqas, 13 ölim jağdayı tirkelgen, al qazirgi tañda onda 3226 adamnıñ häli auır körinedi.

Sonımen qosa keşe eñ köp koronavirus faktisi tirkelgen Italiyada 3526 nauqas, 345 ölim jağdayı anıqtalğan. Jappay karantinge jabılğan eldegi eki mıñday nauqastıñ jağdayı tım qiın deñgeyde.

Üşinşi eñ köp nauqas esepke alınğan el Germaniya. Mwnda da 2100-ge tarta adamğa koronavirus diagnozı qoyılğan, 7-eui köz jwmğan.

Epidemiya bastalğalı beri Qıtayda 3300-dey, Italiyada 2500 jäne Iranda mıñğa tarta adam qaterli indetten qaytıs boldı.

"The Qazaq Times"