الەم حالقىن دۇرلىكتىرگەن قاتەرلى دەرتتىڭ وتكەن تاۋلىكتەگى ەڭ وزەكتى دەرەكتەرى جانە قازاقستاننىڭ ءىس ناسىرعا شاپقانداعى «ب» جوسپارىن جۇزەگە اسىرۋ بارىسىن نازارىڭىزعا ۇسىنامىز.

 

دەرتتى وشاعى قىتايدان ەمەس، ەۋروپادان جۇقتىرىپ قايتقان قازاقستاندىقتار سانى

دەنساۋلىق ساقتاۋ مينيسترلىگىنىڭ ءباسپاسوز قىزمەتىنىڭ مالىمدەۋىنشە، ەلدە كەشە كەشكىسىن، 18 ناۋرىز ساعات 08:00-دە كوروناۆيرۋس تابىلعان ناۋقاستار سانى 35-كە جەتتى.

ونىڭ 17-ءسى الماتىدا، 18-ءى استانادا تىركەلدى. ءبىر كۇندە ۆيرۋس جۇقتىرعان 23 ادام انىقتالدى. ءبىر قىزىعى، دياگنوز قويىلعان ناۋقاستاردىڭ كوبى ەۋروپا اۋماعىنان كەلگەن، ال 6 قاڭتاردان بەرى قىتاي شەكاراسىنان وتكەن مىڭداعان ازاماتتىڭ ەشبىرىنەن كوروناۆيرۋس جاعدايى تىركەلمەگەن.

سەيسەنبى تۇستەن كەيىن اسقار ءماميننىڭ جەتەكشىلىگىمەن وتكەن پرەزيدەنت جانىنداعى توتەنشە جاعداي رەجيمىن جۇرگىزۋ جونىندەگى مەملەكەتتىك كوميسسيا جيىنىندا استانا مەن الماتىدا كوروناۆيرۋس جاعدايىنىڭ ۋشىعۋىنا بايلانىستى كارانتين جاريالاندى.

 

الماتى مەن استانا كارانتين رەجيمىنە كوشەدى

بۇگىن 19 ناۋرىزعا قاراعان ءتۇنى COVID-19 ىندەتىنىڭ ەتەك الۋى سەبەپتى اتالعان ەكى قالادا قاتاڭ قوعامدىق ءتارتىپ تەتىگى ىسكە قوسىلادى. ناقتىلاپ ايتقاندا، قوسىمشا شەكتەۋ، الدىن الۋ جانە ەپيدەمياعا قارسى بىرقاتار شەشىمدەر ەنگىزىلەدى.

19 ناۋرىز ساعات 00:00-دەن باستاپ:

  • كارانتيندى ەنگىزۋ جانە اۋقىمدى سانيتاريالىق-ەپيدەمياعا قارسى ءىس-شارالاردى جۇزەگە اسىرىلادى;
  • كارانتين ايماعىن بەلگىلەۋ جانە ودان كىرىپ-شىعۋ پۋنكتەرى انىقتالادى;
  • ادامداردىڭ ءجۇرىپ تۇرۋى، سونداي-اق كولىك قۇرالدارىنىڭ كىرۋىن/شىعۋى شەكتەلەدى;
  • ءۇش سانات بويىنشا ارنايى ەمدەۋ مەكەمەلەرىنىڭ ۇزدىكسىز جۇمىسىن قامتاماسىز ەتىلەدى: جۇقتىرعاندار، ينفەكتسياعا كۇدىكتىلەر، كارانتيندىك;
  • حالىقتى ازىق-تۇلىكپەن قامتۋدى ۇيىمداستىرادى جانە قالا اۋماعىنىڭ شەكاراسىن انىقتايدى;
  • قوعامدىق كولىك قوزعالىسىن كۇندىزگى ۋاقىتتا توقتاتا تۇرادى نەمەسە شەكتەيدى جانە تۇنگى ۋاقىتتا توقتايدى;
  • ازىق-تۇلىكتەن باسقا تاۋارلار ساتاتىن ساۋدا بازارى، ءىرى ساۋدا ورتالىعى جۇمىسى توقتايدى، تەك ءدارىحانا جانە ازىق-تۇلىك دۇكەنى عانا اشىق بولادى;
  • سانيتارلىق-ەپيدەميا پروفيلاكتيكاسىن كۇشەيتە وتىرىپ، «تۇتىنۋشىعا جەتكىزۋ» قاعيداتى بويىنشا قوعامدىق تاماقتانۋ ورنىنىڭ جاڭا جۇمىس رەجيمى بەلگىلەنەدى;
  • حقكو-نىڭ جۇمىس رەجيمى قايتا ۇيىمداستىرىلادى.

الماتى شاھارىنىڭ نەگىزگى قاقپالارىنا 27 بلوك-بەكەت ورناتىلاتىنىن حابارلاعان اكىم باقىتجان ساعىنتاەۆ «قالاعا قاجەتتى تاۋارلار، تاماق، ءدارى-دارمەكتەر مەن مەديتسينالىق ماقساتتاعى بۇيىمدار، قورعانىس قۇرالدارى مەن قورعانىس گيگيەنالىق زاتتارى ءۇشىن «جاسىل ءدالىز» قۇرىلاتىن بولادى»، – دەدى.

ونىڭ سوزىنشە، بلوك-بەكەتتەردە پاترۋلدىك پوليتسيا جانە «گرانيت» پولكى، جقاج (سوبر – ورىسشا),  قورعانىس مينيسترلىگى مەن ۇلتتىق گۆارديا بولىمشەلەرىنىڭ كۇشتەرى جۇمىلدىرىلۋ جوسپارلانعان. سونداي-اق قالا كولەمىندە بالاباقشالاردىڭ دا جۇمىسى ۋاقىتشا توقتايدى.

 

كارانتين كۇشىنە ەنگەن كەزدە قالادان كىمدەر كىرىپ-شىعا الادى؟

19 ناۋرىز كۇنى ساعات 00.00-دەن باستاپ ەنگىزىلەتىن الماتى قالاسىنىڭ اۋماعىنا ادامداردىڭ كىرىپ-شىعۋى شەكتەۋ كەلەسى ساناتتاعى تۇلعالار ءۇشىن قولدانىلمايدى:

  • بۇعان دەيىن قالادان شىعىپ كەتكەن استانا جانە الماتى قالاسىنىڭ تۇرعىندارى قالاعا ورالعان جاعدايدا;
  • بۇعان دەيىن قالاعا كىرگەن باسقا وڭىرلەردىڭ تۇرعىندارى قالادان شىعاتىن بولسا;
  • بۇعان دەيىن شەتەلدەرگە شىعىپ كەتكەن قر ازاماتتارى (ولار قر-عا ورالعان جاعدايدا);
  • بۇعان دەيىن ەلدەن شىعۋ ءۇشىن ەل اۋماعىنا كىرگەن جانە ەلدەن شىعىپ كەتۋ ماقساتىندا اۋە كولىگىمەن شىعاتىن شەتەلدىكتەرگە;
  • شەتەلدىكتەر (ازاماتتىعى جوق تۇلعالار), قر-دا تۇرۋعا ىقتيارحاتى بار تۇلعالارعا;
  • بۇعان دەيىن شەتەل مەملەكەتىنىڭ اۋماعىنا شىعىپ كەتكەن قر ازاماتتارى قازاقستان رەسپۋبليكاسىنا ورالعان جاعدايدا;
  • ەمدەلۋ ءۇشىن شەتەلگە شىعاتىن قر ازاماتتارىنا، ولاردىڭ دەنساۋلىق ساقتاۋ مەكەمەلەرىنىڭ راستاۋشى قۇجاتتارى بولعان جاعدايدا;
  • ەلدىڭ جانە شەتەل مەملەكەتتەرىنىڭ ديپلوماتيالىق قىزمەتىنىڭ پەرسونالى جانە ولاردىڭ وتباسى مۇشەلەرىنە، سونداي-اق قازاقستانعا سىرتقى ىستەر مينيسترلىگىنىڭ شاقىرۋى بويىنشا باعىت العان شەتەل مەملەكەتتەرىنىڭ جانە حالىقارالىق ۇيىمداردىڭ دەلەگاتسيا مۇشەلەرىنە;
  • پويىز جانە لوكوماتيۆ بريگادالارىنىڭ مۇشەلەرىنە، سونداي-اق تەمىرجول تاسىمالى پروتسەسىنە قاتىساتىن تۇلعالارعا، اۋە، تەڭىز كولىكتەرىنىڭ ەكيپاجىنا، حالىقارالىق جۇك تاسىمالىن جۇزەگە اسىراتىن جۇك اۆتوكولىگى قۇرالدارىنىڭ جۇرگىزۋشىلەرىنە;
  • قازاقستان رەسپۋبليكاسى ازاماتتارىنىڭ وتباسى مۇشەلەرى بولىپ سانالاتىن شەتەلدىكتەرگە (تۋىستىق بايلانىس فاكتىسى – ەرى (زايىبى), ولاردىڭ اتا-انالارى مەن بالالارى ەكەنى راستالعان جاعدايدا);
  • استانا جانە الماتى قالاسىندا جۇمىس ىستەيتىن، قالا ماڭى اۋماعىندا تۇراتىن تۇرعىندارعا;
  • اۋە جانە تەمىر جول ءترانزيتى قاتىناسىمەن جۇرگەن قازاقستان ازاماتتارىنا;
  • باسقا دا ەرەكشە جاعدايلاردا، مۇنداي جاعدايلار COVID-19-بەن كۇرەسۋ جونىندەگى قالالىق شتابتاردا دەربەس تارتىپتە قارالادى.

اپتا باسىندا مەملەكەت باسشىسى توقاەۆ دۇنيەجۇزىلىك دەنساۋلىق ساقتاۋ ۇيىمىنىڭ جاڭا COVID-19 كوروناۆيرۋسىنىڭ پاندەمياعا ۇلاسۋىن راستاعاننان رەسپۋبليكا شەڭبەرىندە 16 ناۋرىز بەن 15 ءساۋىر ارالىعىنا توتەنشە جاعداي جاريالادى.

 

الەمدەگى احۋال

توتەنشە جاعداي مەن كارانتيندىك رەجيم تەك قازاقستاندا عانا ەمەس، الەمنىڭ كوپتەگەن ەلىندە قولعا الىنىپ جاتىر. Dadax كومەرتسيالىق ەمەس كومپانياسىنا قاراستى Worldometer ستاتيستيكالىق اقپاراتتار بازاسىنىڭ سوڭعى دەرەگى بويىنشا، الەم جۇرتشىلىعىن ەلەڭدەتىپ، ەكونوميكاسىن تۇرالاتقان COVID-19 ىندەتىنە شالدىققاندار سانى – 200 مىڭعا تاياپ، قازا بولعاندار 8 مىڭعا جۋىقتاعان. وتكەن تاۋلىكتە قىتايدا 21 جاڭا ناۋقاس، 13 ءولىم جاعدايى تىركەلگەن، ال قازىرگى تاڭدا وندا 3226 ادامنىڭ ءحالى اۋىر كورىنەدى.

سونىمەن قوسا كەشە ەڭ كوپ كوروناۆيرۋس فاكتىسى تىركەلگەن يتاليادا 3526 ناۋقاس، 345 ءولىم جاعدايى انىقتالعان. جاپپاي كارانتينگە جابىلعان ەلدەگى ەكى مىڭداي ناۋقاستىڭ جاعدايى تىم قيىن دەڭگەيدە.

ءۇشىنشى ەڭ كوپ ناۋقاس ەسەپكە الىنعان ەل گەرمانيا. مۇندا دا 2100-گە تارتا ادامعا كوروناۆيرۋس دياگنوزى قويىلعان، 7-ەۋى كوز جۇمعان.

ەپيدەميا باستالعالى بەرى قىتايدا 3300-دەي، يتاليادا 2500 جانە يراندا مىڭعا تارتا ادام قاتەرلى ىندەتتەن قايتىس بولدى.

"The Qazaq Times"