"Astana" alañına bağıt alğan belsendilerdi policiya wstağan sät. Foto: Daniyar Moldabekov

Bügin Qazaqstannıñ birqatar qalalarında miting ötedi degen küni policiya belsendilerdi küşpen wstap jatır. Ötken aptada miting qarsañında ondağan belsendiler wstalıp, äkimşilik qamauğa alındı.

09.30 Almatıda mitingke bağıt alğan on şaqtı adam wstaldı. Demokratiyalıq partiya ökili Tölegen Jükeevtiñ mälimetinşe, 70 şaqtı belsendi wstalğan.

10.24 Töle bi-Nazarbaev köşeleriniñ qiılısında «Astana» alañına bağıt alğan belsendilerdi wstau procesi «qarqındı türde» jürgizildi.

10.33 «Ural'skaya nedelya» aptalığınıñ bas redaktorı Lwqpan Ahmed'yarovtı İİM jauap aluğa şaqırğan (Qılmıstıq kodekstiñ 405-babınıñ 2-böligi boyınşa – «Qoğamdıq nemese dini birlestiktiñ nemese özge de wyımnıñ qızmetine qatısu, olarğa qatıstı ekstremizmdi nemese terrorizmdi jüzege asıru»). Bwl turalı jurnalist öziniñ Facebook-tegi paraqşasında jazdı.

10.35 «Oyan, Qazaqstan!» qozğalısınıñ belsendisi, jurnalist  Äsem Jäpişeva «Astana» alañında özin policiya äketpek bolğanın habarladı. Oğan basqa jurnalister araşa bolıp, polciya wstay almağan.

FOTO: Daniyar Moldabekov

10:46 Abılay han dañğılı men Töle bi köşesiniñ qiılısına Demokratiyalıq partiyanı jaqtauşılardıñ şağın tobı ğana jete aldı. Olardıñ işinde partiya bastamaşıları Tölegen Jükeev pen Inga Imanbay bar. tañğı uaqıtta Almatıda mitingke jol tartqan 70 şaqtı belsendini policiya wstap äketken.

Janbolat Mamaydıñ äyeli, jurnalist Inga Imanbay: «Tañğı sağat 5.00-ge deyin Janbolattıñ qayda ekenin, ne bolıp jatqanın bile almadıq. Tek tañğı beste ğana Qarasay audandıq policiya basqarmasında Janbolattıñ Äkimşilik qwqıqbwzuşılıq turalı kodekstiñ 488-babınıñ 3-tarmağı boyınşa, yağni mitingige şaqırdı degen ayıppen, üş täulikke qamalğanı turalı sot qaulısın berdi. Sot advokattıñ qatısuınsız ötken. Advokat sol mañda sağat 11.00-de boldı. Al sot 11.45-te ötken. Advokat kelip twrıp, kire almay qaldı. Janbolattıñ qorğalu qwqığı bwzıldı», – dedi.

Bwl küni Panfilov köşesi men «Astana» alañındağı tamaqtanu orındarı jabılğan.

10.50 Policiya alañdağı jurnalisterdiñ qwjat-kuälikterin teksere bastadı.

11.00 Narazı top Äliya Moldağülova men Mänşük Mämetova eskertkişi mañına jinalıp, «Janbolatqa bostandıq!» dep wrandattı. Dempartiya ökili Tölegen Jükeev: «Bilik zañsız äreket etip otır. Mwnıñ barlığın wyımdastırıp, körip otırğan Nazarbaev. Şını kerek, bilik Toqaevtıñ qolında emes. Halıqqa jekkörinişti boludan biliktegilerdiñ abıroyı arta ma? Jan-jaqta qamauda otırğan belsendi azamattar bostandıqqa şığuı tiis. Janbolatqa bostandıq!», – dedi.

Foto: Vlast'

21 aqpanda keşki uaqıtta demokratiyalıq partiyanı wyımdastıruşı bastamaşıl top ökilderi Janbolat Mamay men Nwrbol Bayterekovtıñ wstalğanı habarlandı. 22 aqpanğa qarağan tüni Almatı oblısı Qaskeleñ qalası Qarasay audanı policiya basqarmasına barğan bir top adam «Demokratiyalıq partiya» qwru jönindegi bastamaşıl toptıñ jetekşisi Janbolat Mamaydı qamaudan bosatudı talap etti. Policiya ğimaratı aldına jinalğan jiırmadan astam adam «Bostandıq» dep ayğaylap, Mamaydı şığarmasa aştıq jariyalaytındarın mälimdedi. Keyinnen top jetekşisi Janbolat Mamaydıñ «rwqsat etilmegen mitingige şaqırdı» degen ayıppen üş täulikke qamalğanı habarlandı.

19 aqpanda «Qazaqstannıñ demokratiyalıq partiyasın» qwrğısı keletin bastamaşıl top ökilderi Almatıda jiın ötkizgen. Toptıñ är aymaqtağı müşeleri bilik tarapınan qısımğa wşırap jatqanın aytqan dempartiya jetekşisi Janbolat Mamay 22 aqpanğa josparlanğan qwrıltay s'ezdiñ ötpeytinin, onıñ ornına top belsendileri mitingige şığatının habarlağan bolatın.

Halıqaralıq qwqıq qorğau wyımdarı men Batıs elderi resmi Nwr-Swltandı azamattardıñ pikir bildiru erkindigin, beybit jiındar men birlesu bostandığın paydalanu qwqığın qamtamasız etip, miting turalı zañdı halıqaralıq standartqa säykestendiruge şaqırıp keledi. Qazaqstandıq qwqıq qorğauşılar ükimeti äzirlegen beybit miting turalı jaña zañ jobasında azamattardıñ konstituciyalıq bostandıqtarın paydalanu qwqığın şekteytin bwrınnan kele jatqan erejeler barın aytadı.

"The Qazaq Times"