قازاقستانداعى ميتينگ حرونولوگياسى: جاپپاي ۇستالۋدىڭ رەكوردتىق كۇنى

بۇگىن قازاقستاننىڭ بىرقاتار قالالارىندا ميتينگ وتەدى دەگەن كۇنى پوليتسيا بەلسەندىلەردى كۇشپەن ۇستاپ جاتىر. وتكەن اپتادا ميتينگ قارساڭىندا ونداعان بەلسەندىلەر ۇستالىپ، اكىمشىلىك قاماۋعا الىندى.

09.30 الماتىدا ميتينگكە باعىت العان ون شاقتى ادام ۇستالدى. دەموكراتيالىق پارتيا وكىلى تولەگەن جۇكەەۆتىڭ مالىمەتىنشە، 70 شاقتى بەلسەندى ۇستالعان.

10.24 تولە بي-نازارباەۆ كوشەلەرىنىڭ قيىلىسىندا «استانا» الاڭىنا باعىت العان بەلسەندىلەردى ۇستاۋ پروتسەسى «قارقىندى تۇردە» جۇرگىزىلدى.

10.33 «ۋرالسكايا نەدەليا» اپتالىعىنىڭ باس رەداكتورى لۇقپان احمەدياروۆتى ءىىم جاۋاپ الۋعا شاقىرعان (قىلمىستىق كودەكستىڭ 405-بابىنىڭ 2-بولىگى بويىنشا – «قوعامدىق نەمەسە ءدىني بىرلەستىكتىڭ نەمەسە وزگە دە ۇيىمنىڭ قىزمەتىنە قاتىسۋ، ولارعا قاتىستى ەكسترەميزمدى نەمەسە تەرروريزمدى جۇزەگە اسىرۋ»). بۇل تۋرالى جۋرناليست ءوزىنىڭ Facebook-تەگى پاراقشاسىندا جازدى.

10.35 «Oyan, Qazaqstan!» قوزعالىسىنىڭ بەلسەندىسى، جۋرناليست  اسەم جاپىشەۆا «استانا» الاڭىندا ءوزىن پوليتسيا اكەتپەك بولعانىن حابارلادى. وعان باسقا جۋرناليستەر اراشا بولىپ، پولتسيا ۇستاي الماعان.

فوتو: دانيار مولدابەكوۆ

10:46 ابىلاي حان داڭعىلى مەن تولە بي كوشەسىنىڭ قيىلىسىنا دەموكراتيالىق پارتيانى جاقتاۋشىلاردىڭ شاعىن توبى عانا جەتە الدى. ولاردىڭ ىشىندە پارتيا باستاماشىلارى تولەگەن جۇكەەۆ پەن ينگا يمانباي بار. تاڭعى ۋاقىتتا الماتىدا ميتينگكە جول تارتقان 70 شاقتى بەلسەندىنى پوليتسيا ۇستاپ اكەتكەن.

جانبولات مامايدىڭ ايەلى، جۋرناليست ينگا يمانباي: «تاڭعى ساعات 5.00-گە دەيىن جانبولاتتىڭ قايدا ەكەنىن، نە بولىپ جاتقانىن بىلە المادىق. تەك تاڭعى بەستە عانا قاراساي اۋداندىق پوليتسيا باسقارماسىندا جانبولاتتىڭ اكىمشىلىك قۇقىقبۇزۋشىلىق تۋرالى كودەكستىڭ 488-بابىنىڭ 3-تارماعى بويىنشا، ياعني ميتينگىگە شاقىردى دەگەن ايىپپەن، ءۇش تاۋلىككە قامالعانى تۋرالى سوت قاۋلىسىن بەردى. سوت ادۆوكاتتىڭ قاتىسۋىنسىز وتكەن. ادۆوكات سول ماڭدا ساعات 11.00-دە بولدى. ال سوت 11.45-تە وتكەن. ادۆوكات كەلىپ تۇرىپ، كىرە الماي قالدى. جانبولاتتىڭ قورعالۋ قۇقىعى بۇزىلدى»، – دەدى.

بۇل كۇنى پانفيلوۆ كوشەسى مەن «استانا» الاڭىنداعى تاماقتانۋ ورىندارى جابىلعان.

10.50 پوليتسيا الاڭداعى جۋرناليستەردىڭ قۇجات-كۋالىكتەرىن تەكسەرە باستادى.

11.00 نارازى توپ ءاليا مولداعۇلوۆا مەن مانشۇك مامەتوۆا ەسكەرتكىشى ماڭىنا جينالىپ، «جانبولاتقا بوستاندىق!» دەپ ۇرانداتتى. دەمپارتيا وكىلى تولەگەن جۇكەەۆ: «بيلىك زاڭسىز ارەكەت ەتىپ وتىر. مۇنىڭ بارلىعىن ۇيىمداستىرىپ، كورىپ وتىرعان نازارباەۆ. شىنى كەرەك، بيلىك توقاەۆتىڭ قولىندا ەمەس. حالىققا جەككورىنىشتى بولۋدان بيلىكتەگىلەردىڭ ابىرويى ارتا ما؟ جان-جاقتا قاماۋدا وتىرعان بەلسەندى ازاماتتار بوستاندىققا شىعۋى ءتيىس. جانبولاتقا بوستاندىق!»، – دەدى.

فوتو: ۆلاست

21 اقپاندا كەشكى ۋاقىتتا دەموكراتيالىق پارتيانى ۇيىمداستىرۋشى باستاماشىل توپ وكىلدەرى جانبولات ماماي مەن نۇربول بايتەرەكوۆتىڭ ۇستالعانى حابارلاندى. 22 اقپانعا قاراعان ءتۇنى الماتى وبلىسى قاسكەلەڭ قالاسى قاراساي اۋدانى پوليتسيا باسقارماسىنا بارعان ءبىر توپ ادام «دەموكراتيالىق پارتيا» قۇرۋ جونىندەگى باستاماشىل توپتىڭ جەتەكشىسى جانبولات مامايدى قاماۋدان بوساتۋدى تالاپ ەتتى. پوليتسيا عيماراتى الدىنا جينالعان جيىرمادان استام ادام «بوستاندىق» دەپ ايعايلاپ، مامايدى شىعارماسا اشتىق جاريالايتىندارىن مالىمدەدى. كەيىننەن توپ جەتەكشىسى جانبولات مامايدىڭ «رۇقسات ەتىلمەگەن ميتينگىگە شاقىردى» دەگەن ايىپپەن ءۇش تاۋلىككە قامالعانى حابارلاندى.

19 اقپاندا «قازاقستاننىڭ دەموكراتيالىق پارتياسىن» قۇرعىسى كەلەتىن باستاماشىل توپ وكىلدەرى الماتىدا جيىن وتكىزگەن. توپتىڭ ءار ايماقتاعى مۇشەلەرى بيلىك تاراپىنان قىسىمعا ۇشىراپ جاتقانىن ايتقان دەمپارتيا جەتەكشىسى جانبولات ماماي 22 اقپانعا جوسپارلانعان قۇرىلتاي سەزدىڭ وتپەيتىنىن، ونىڭ ورنىنا توپ بەلسەندىلەرى ميتينگىگە شىعاتىنىن حابارلاعان بولاتىن.

حالىقارالىق قۇقىق قورعاۋ ۇيىمدارى مەن باتىس ەلدەرى رەسمي نۇر-سۇلتاندى ازاماتتاردىڭ پىكىر ءبىلدىرۋ ەركىندىگىن، بەيبىت جيىندار مەن بىرلەسۋ بوستاندىعىن پايدالانۋ قۇقىعىن قامتاماسىز ەتىپ، ميتينگ تۋرالى زاڭدى حالىقارالىق ستاندارتقا سايكەستەندىرۋگە شاقىرىپ كەلەدى. قازاقستاندىق قۇقىق قورعاۋشىلار ۇكىمەتى ازىرلەگەن بەيبىت ميتينگ تۋرالى جاڭا زاڭ جوباسىندا ازاماتتاردىڭ كونستيتۋتسيالىق بوستاندىقتارىن پايدالانۋ قۇقىعىن شەكتەيتىن بۇرىننان كەلە جاتقان ەرەجەلەر بارىن ايتادى.

"The Qazaq Times"