Dempartiya belsendileri men qoldauşıları. Foto: Facebook / Janbolat Mamay onlayn paraqşasınan skrinşot

Ädilet ministrligi tirkemegen Dempartiya jetekşisi Janbolat Mamay özine qatıstı qozğalğan qılmıstıq is turalı pikir bildirdi. Belsendi 26 qazanda keşkisin Azattıq radiosına is aşuğa türtki bolğan sebebin tüsindirgen.  

Janbolat Mamay Almatı qalalıq policiya departamenti belsendiniñ üstinen 18 qırküyekte Abay eskertkişi tübinde ötken şerude policiyağa til tigizdi degen ayıppen «Bilik ökilin qorlau» (378-bap, 2-bölim) babı boyınşa is qozğağanın mälimdedi.

«18 qırküyek küngi mitingide Abzal Dostiyarovtı tura sol jerde arnayı jasaq wstağan bolatın. Meni jerge qwlatqan. Sosın men şığıp ayttım: «Osı äreketti jasap twrğan policiya qızmetkerleri otanına opasızdıq jasaydı. Erteñ Qazaqstanda Qıtay ekspansiyası bastalsa, bwlar Qıtayğa da qızmet jasaytın nağız satqındar» dedim. Mine, osı sözder üşin 17 qazanda is qozğağan. Filologiyalıq saraptamanıñ bärin dayındap qoyğan», – degen Janbolat Mamay Azattıq tilşisine.

Oppoziciya ökiliniñ aytuınşa, aytqan sözinen bas tartpaydı, bwl oqiğa nağız «sayasi qısım». Ol «bwl biliktiñ dempartiya mitingige şıqpasın, narazılıq tanıtpasın dep qasaqana jasap otırğan äreketi, basqaşa tüsindiru mümkin emes» degen pikirde.

«Narazılıq akciyasına şıqqan kezde basbwzarlıqpen, bolmasa zañdı bwzayıq, bolmasa tärtipsizdik jasayıq, teris äreket jasayıq dep şıqqanımız joq. Biz wlttıq müddeni qorğap şıqtıq. Täuelsizdikti qorğap şıqtıq. Aron Atabekke bostandıq talap ettik. «Sberbankpen» jasalıp jatqan kelisimge qarsı şıqtıq. Qolımızda megafonnan basqa eşteñe bolğan joq. Biz tüsken bette policiya tarpa bas salıp, küş körsetti. Abzaldı wrıp-soğıp, policiya departamentine alıp ketti. Irısbek Toqtasın ağamızdı eki-üş kün bwrın wstadı. Däuren men Temirtastı eki kün bwrın qamap tastadı. Mwnıñ bäri zañsız. Eşqanday is-äreket jasamay twrıp, osınday zañsızdıqtarğa bardı. Sondıqtan men solay dep ayttım. Olar endi «qoğamdıq tärtipti qorğağan» policiya qızmetkerlerin qorladı dep ayıptap otır», – deydi Janbolat Mamay.

Belsendiniñ aqparat qwralına habarlauınşa, öz qwqığı ayasında tergeuşiniñ swraqtarına jauap beruden bas tartqan. Mamay policiyağa advokatı Janar Balğabaevamen kirip şıqqan. Almatı policiyası äzirge is boyınşa tüsinikteme bermedi.

Seysenbi, 26 qazanda kündiz Janbolat Mamay özine qılmıstıq is qozğalğanın, policiyağa şaqırtılğanın habarlağan. Tüsten keyin qalalıq policiya departamenti ğimaratınıñ aldına onı qoldağan jaqtastarı jinaldı.

The Qazaq Times