Körneki kollaj. Foto: Azattıq pen aşıq derekköz

Keşe, 22 qañtarda künniñ ärtürli mezgilinde Almatıdağı Qıtaydıñ konsuldığı ğimaratınıñ aldında üş qazaqstandıq jalğız adamdıq piket ötkizdi.

Almatılıq  Serik Äjibay Qıtaydan «Qazaqstannıñ azamattığın alğan» üş twrğın: Zeynolla Raqıjan, Gülbahar Jälelova jäne Asqar Azatbekti qaytarudı talap etti.

Jalğız adamdıq piket ötkizip twrğan Serik Äjibay. Almatı, 22 qañtar 2020 jıl. Foto: Azattıq / Ayan Qalmwrat

– Men jalpı Qıtaydıñ konclagerinde qinalıp jatqan Qazaqstan azamattarın dereu bosatudı talap etemin. Olar - tolıqqandı Qazaqstan azamattarı. Mine, qwjattarı. Qazaqstanda tuğan Gülbahar Jälelova Qıtayğa jeke käsippen sauda istep barğan kezde twtqınğa alınıp, sol jerde oğan jala japqan. Qıtaydıñ tölqwjatın jasap bergen. 1,5 jıl sol jerde eñ auır türmede otırğan. Meniñ qoyıp otırğan talabım - Qıtaydıñ sırtqı ister ministrligi resmi türde Gülbahar Jälelovadan, jalpı Qazaqstan halqınan keşirim swrauı tiis. Zeynolla Raqıjan da, Asqar Azatbek te Qazaqstannıñ tolıqqandı azamattarı. Olardı şarttı türde bosatudı talap etemin. Bwl bizdiñ egemendikti elemeu, täuelsizdigimizdi ayaqqa taptau dep bilemin, – deydi Serik Äjibay Azattıqqa bergen swqbatında.

İz-dereksiz baylanıs üzilgen üş azamattıñ Qazaqstandağı tuıtarı birinşi ret qarsılıq akciyasına şığıp twrğan joq. Bwğan deyin birneşe ret Qıtay konsuldığı, memlekettik mekemeler aldında naqtı talabımen piketter wyımdastırğan. Degenmen bwl jolı da  konsuldıqtan eşkim şıqpadı.

Ekinşi narazılıqtı kündiz Marat Qwrbanov esimdi twrğın jalğız adamdıq piket ötkizip, Şıñjañdağı tuıstarınıñ habarsız ketkenin aytıp, şağımdanğan.

Marat Qwrbanov Qıtaydıñ Almatıdağı konsuldığı aldında. 22 qañtar 2020 jıl. Foto: Azattıq / Ayan Qalmwrat

Al tüs aua qolına «Qıtay genocidti toqtatsın!» degen jazuı bar plakat wstap şıqqan  Baybolat Künbolatwlı esimdi azamat öziniñ bauırımen baylanıstırudı talap etti. Onıñ sözinşe, Qıtaydıñ İle-Qazaq avtonomiyalıq ölkesinde twratın inisi Baymwrat Naurızbekwlınan 1,5 jıldan beri habar üzilgen.

 – Qazaqstannıñ azamattığın «jartılay alğan» (ıqtiyarhatı bar) inimdi Qıtay sayasi lager'de wstap otır. Jaqında tuıstarımnan onı on jılğa qamap tastağanın estidim. Biraq oğan qanday ayıp taqqanın bilmeymiz. Onıñ anası telefonğa jauap bermeydi. Qıtay konsuldığınan bireu şığıp, inimniñ aman ekendigine közimdi jetkizsin, – deydi bauırın izdegen Baymwrat.

Baybolat Künbolatwlı Qıtaydıñ Almatıdağı konsuldığı aldında plakatpen twr. 22 qañtar 2020 jıl. Foto: Azattıq / Ayan Qalmwrat

Oqiğa ornınan habar taratqan Azattıqtıñ mälimdeuinşe, «elşilikten bir adam şığıp, elşilikke qwjattarın ötkizip twrğan adamdarğa «plakat wstap twrğan adam ketpeyinşe qwjat qabıldau toqtaydı» dep aytqan. Biraq ol Künbolatwlınan ne üşin piket ötkizip twrğanın swramağan». Konsuldı küzetip twrğan saqşılar onı jolatpauğa tırısıp baqqan.

"The Qazaq Times"