Almatı qalasınıñ ädilet departamentiniñ aldında ädilet ministri «Beketaev! Täuelsiz zañgerler men advokattardan qolıñdı tart!» degen jazuı bar plakat wstap, jalğız adamdıq piket ötkizip twrğan qwqıq qorğauşı Amangeldi Şormanbaev. 23 aqpan 2021 jıl. Foto: Ol'ga Loginova / Vlast.kz

Qwqıq qorğauşı, «Halıqaralıq qwqıqtıq bastama» qorınıñ basşısı Amangeldi Şormanbaev seysenbi küni Almatı qalasınıñ ädilet departamenti ğimaratınıñ aldında rwqsat etilgen jalğız adamdıq piket ötkizdi. Akciya avtorınıñ talap-uäjin Azattıq radiosı tıñdap körgen.

Belsendi qwqıq qorğauşı qazir senatta qaralıp jatqan «Advokat qızmeti jäne zañgerlik kömek» turalı zañğa engiziletin keybir normalardı alıp tastauğa şaqırdı. Onıñ payımdauınşa, «zañgerler, advokattardıñ isin retteuge» bağıttalğan tüzetuler şın mäninde zañgerlerdi memleketke bağındırmaq. Täuelsiz sala memleketke bağınsa, elde täuelsiz zañgerler qalmaydı dep alañdaydı qwqıq qorğauşı.

«Zañ jobası boyınşa joğarı qwrılım – respublikalıq advokattar alqası men zañ jöninde keñesşilerdiñ respublikalıq palatası qwrıladı. Bizdiñ oyımızşa, bwl qwrılımdar tömendegi advokattıq keñseler men advokattar jäne zañgerler palatasın täuelsizdikten tolıq ayırudı közdeydi. Olar neni wsınadı? «Advokat jäne zañ qızmetin jetildiremiz» degen jeleumen türli jarna engizip, qanday da bir aqparat jüyelerin, derekter qorın tıqpalap jatır, onı paydalanıp, sol üşin aqşa töleu de mindetti boladı» dedi Şormanbaev.

Onıñ aytuınşa, är maman alqadan bölek qwrılatın organ – respublikalıq palatağa müşe bolu üşin ayına keminde 1 aylıq eseptik körsetkiş (1 AEK – 2917 teñge) köleminde jarna tölep otıruğa mindetti. «Bostan-bosqa ayına 1 AEK töleu. Elde keminde 9 mıñ zañger bar. Respublikalıq palata keñsesin kim üşin aşadı?» deydi.

«2018 jılı qabıldanğan zañ jobasında zañgerler advokattar alqası siyaqtı keñesşiler palatasına kiruge mindetteldi. Jaraydı, biz barlıq zañgerlerdi jinaymız. Mıñdağan zañger türli palatalarğa müşe. Zañgerler wyımdasa aldı jäne täuelsiz bolaıp qala berdi. Olarğa (ministrlikke – QT) bwl jetkiliksiz, endi zañgerlik keñesşiler palatasınıñ minimaldı müşeligin 50-den 200-ge deyin arttırğısı keledi. Nelikten? Öytkeni memlekettiñ baqılauındağı türli toptardıñ biriguine jol bermey jäne olardı bwrınğı käsipodaqtar siyaqtı joyu üşin», – dedi Şormanbaev.

Amangeldi Şormanbaev zañgerlerdiñ prezident pen senatqa ündeu joldap, zañ jobasın keri qaytaruğa küş salatının mälimdegen. Ol sonımen birge BWW-nıñ zañgerlerdi qorğau, qwqıq qorğauşılardı qorğau jäne birlesu erkindigi jönindegi arnayı bayandamaşılarına jaqın arada ündeu joldaytının habarladı.

"The Qazaq Times"