كورنەكى كوللاج. فوتو: ازاتتىق پەن اشىق دەرەككوز

كەشە، 22 قاڭتاردا كۇننىڭ ءارتۇرلى مەزگىلىندە الماتىداعى قىتايدىڭ كونسۋلدىعى عيماراتىنىڭ الدىندا ءۇش قازاقستاندىق جالعىز ادامدىق پيكەت وتكىزدى.

الماتىلىق  سەرىك ءاجىباي قىتايدان «قازاقستاننىڭ ازاماتتىعىن العان» ءۇش تۇرعىن: زەينوللا راقىجان، گۇلباھار جالەلوۆا جانە اسقار ازاتبەكتى قايتارۋدى تالاپ ەتتى.

جالعىز ادامدىق پيكەت وتكىزىپ تۇرعان سەرىك ءاجىباي. الماتى، 22 قاڭتار 2020 جىل. فوتو: ازاتتىق / ايان قالمۇرات

– مەن جالپى قىتايدىڭ كونتسلاگەرىندە قينالىپ جاتقان قازاقستان ازاماتتارىن دەرەۋ بوساتۋدى تالاپ ەتەمىن. ولار - تولىققاندى قازاقستان ازاماتتارى. مىنە، قۇجاتتارى. قازاقستاندا تۋعان گۇلباحار جالەلوۆا قىتايعا جەكە كاسىپپەن ساۋدا ىستەپ بارعان كەزدە تۇتقىنعا الىنىپ، سول جەردە وعان جالا جاپقان. قىتايدىڭ تولقۇجاتىن جاساپ بەرگەن. 1,5 جىل سول جەردە ەڭ اۋىر تۇرمەدە وتىرعان. مەنىڭ قويىپ وتىرعان تالابىم - قىتايدىڭ سىرتقى ىستەر مينيسترلىگى رەسمي تۇردە گۇلباحار جالەلوۆادان، جالپى قازاقستان حالقىنان كەشىرىم سۇراۋى ءتيىس. زەينوللا راقىجان دا، اسقار ازاتبەك تە قازاقستاننىڭ تولىققاندى ازاماتتارى. ولاردى شارتتى تۇردە بوساتۋدى تالاپ ەتەمىن. بۇل ءبىزدىڭ ەگەمەندىكتى ەلەمەۋ، تاۋەلسىزدىگىمىزدى اياققا تاپتاۋ دەپ بىلەمىن، – دەيدى سەرىك ءاجىباي ازاتتىققا بەرگەن سۇقباتىندا.

ءىز-دەرەكسىز بايلانىس ۇزىلگەن ءۇش ازاماتتىڭ قازاقستانداعى تۋىتارى ءبىرىنشى رەت قارسىلىق اكتسياسىنا شىعىپ تۇرعان جوق. بۇعان دەيىن بىرنەشە رەت قىتاي كونسۋلدىعى، مەملەكەتتىك مەكەمەلەر الدىندا ناقتى تالابىمەن پيكەتتەر ۇيىمداستىرعان. دەگەنمەن بۇل جولى دا  كونسۋلدىقتان ەشكىم شىقپادى.

ەكىنشى نارازىلىقتى كۇندىز مارات قۇربانوۆ ەسىمدى تۇرعىن جالعىز ادامدىق پيكەت وتكىزىپ، شىڭجاڭداعى تۋىستارىنىڭ حابارسىز كەتكەنىن ايتىپ، شاعىمدانعان.

مارات قۇربانوۆ قىتايدىڭ الماتىداعى كونسۋلدىعى الدىندا. 22 قاڭتار 2020 جىل. فوتو: ازاتتىق / ايان قالمۇرات

ال ءتۇس اۋا قولىنا «قىتاي گەنوتسيدتى توقتاتسىن!» دەگەن جازۋى بار پلاكات ۇستاپ شىققان  بايبولات كۇنبولاتۇلى ەسىمدى ازامات ءوزىنىڭ باۋىرىمەن بايلانىستىرۋدى تالاپ ەتتى. ونىڭ سوزىنشە، قىتايدىڭ ىلە-قازاق اۆتونوميالىق ولكەسىندە تۇراتىن ءىنىسى بايمۇرات ناۋرىزبەكۇلىنان 1,5 جىلدان بەرى حابار ۇزىلگەن.

 – قازاقستاننىڭ ازاماتتىعىن «جارتىلاي العان» (ىقتيارحاتى بار) ءىنىمدى قىتاي ساياسي لاگەردە ۇستاپ وتىر. جاقىندا تۋىستارىمنان ونى ون جىلعا قاماپ تاستاعانىن ەستىدىم. بىراق وعان قانداي ايىپ تاققانىن بىلمەيمىز. ونىڭ اناسى تەلەفونعا جاۋاپ بەرمەيدى. قىتاي كونسۋلدىعىنان بىرەۋ شىعىپ، ءىنىمنىڭ امان ەكەندىگىنە كوزىمدى جەتكىزسىن، – دەيدى باۋىرىن ىزدەگەن بايمۇرات.

بايبولات كۇنبولاتۇلى قىتايدىڭ الماتىداعى كونسۋلدىعى الدىندا پلاكاتپەن تۇر. 22 قاڭتار 2020 جىل. فوتو: ازاتتىق / ايان قالمۇرات

وقيعا ورنىنان حابار تاراتقان ازاتتىقتىڭ مالىمدەۋىنشە, «ەلشىلىكتەن ءبىر ادام شىعىپ، ەلشىلىككە قۇجاتتارىن وتكىزىپ تۇرعان ادامدارعا «پلاكات ۇستاپ تۇرعان ادام كەتپەيىنشە قۇجات قابىلداۋ توقتايدى» دەپ ايتقان. بىراق ول كۇنبولاتۇلىنان نە ءۇشىن پيكەت وتكىزىپ تۇرعانىن سۇراماعان». كونسۋلدى كۇزەتىپ تۇرعان ساقشىلار ونى جولاتپاۋعا تىرىسىپ باققان.

"The Qazaq Times"