«Batısqa bağıt alu»: Qazaqstan üşin Şveycariya – perspektivalı äriptes

Şveycariya Konfederaciyasınıñ prezidenti, qarjı ministri Uli Maurerdiñ Qazaqstanğa resmi issaparı bastaldı. Aqorda» rezidenciyasında qonaqtı saltanattı türde qarsı alu räsimi ötip, taraptar ekijaqtı kelissözder jürgizdi. Basqa jiındardan erekşeligi, kelissözder tikeley efirden körsetildi. Qazaqstan prezidenti Qasım-Jomart Toqaev Uli Maurerdi qırküyekte N'yu-Yorkte ötken BWW Bas assambleyasınıñ 74-şi sessiyasında şaqırğan bolatın.

Taraptar sauda-ekonomikalıq, investiciyalıq, tranzittik-kölik, auıl şaruaşılığı, aqparattıq-kommunikaciyalıq, cifrlıq, turistik, zergerlik salalarda, farmacevtikada, densaulıq saqtau jäne bilim berude, jasıl ekonomika men su şaruaşılığı salasında, sonday-aq AHQO, Düniejüzilik bank, HVQ, DSW boyınşa ıntımaqtastıq perspektivaların talqıladı.

Kezdesu barısında Şveycariya prezidenti: «Qazaqstan biz üşin sayasi äri ekonomikalıq twrğıdan Aziya men Europa arasın jalğastıruşı köpir sanaladı. Sizderdiñ elderiñizdiñ älemdegi jäne halıqaralıq qoğamdastıqtağı röli artıp keledi. Biz Aziya men Europa arasındağı qarım-qatınastardı şınayı, aşıq jäne tikeley talqılay alatın, sonday-aq, qwrlıqtar arasındağı özara ıqpaldastıqtı qamtamasız etuge, ekonomikalıq qatınastardı nığaytuğa birlese üles qosatın Qazaqstan siyaqtı seriktesimizdiñ bar ekenine quanıştımız», – dedi. Öz kezeginde memleket basşısı Şveycariya – Qazaqstan ekonomikasındağı mañızdı investorlardıñ jäne negizgi sauda seriktesteriniñ biri ekenin atap ötti.

Şveycariya-Qazaqstan delegaciyası kelissözder barısında. Elorda, 22 qaraşa, 2019 jıl. Foto: https://www.inform.kz

Qazaqstan Şveycariyamen 1992 jılı 1 mausımda diplomatiyalıq qarım-qatınas ornatu turalı qwjatqa qol qoyğan. Şveycariya sauda aynalımınıñ kölemi boyınşa Resey, Qıtay, Italiya, Gollandiya jäne Franciyadan keyingi orında. Negizinen elimiz Şveycariyanı energiya tasımaldau közderi, asıl tastar jäne metalmen qamtamasız etip otır. Al Şveycariya importı Qazaqstanğa himiya öndirisi, sağat, optika jäne farmacevtika önimderin wsınıp keledi.

Şveycariya Qazaqstannıñ asa iri sauda seriktesteriniñ ondığına jäne negizgi investorlarınıñ üştigine kiredi. Wlttıq bank statistikası boyınşa, 2005-2015 jıldar aralığında Şveycariyanıñ tikeley investiciyalarınıñ kölemi 14,5 mlrd. AQŞ dollarına jetken. Atalğan merim işinde Qazaqstannıñ investiciyalarınıñ kölemi 802,8 mln. AQŞ dolların qwradı. 2005 jıldan beri Şveycariya Qazaqstan ekonomikasına $24 mlrd-tan astam qarjı investiciyaladı. QR-da şveycariyalıq kapitaldıñ qatısuımen 324 kompaniya tirkelgen, onıñ işinde «Glencore International AG», «Philip Morris», «Nestle», «Ammann Asphalt GmbH» jäne t.b. bar.

2018 jılı tauar aynalımı $3,1 mlrd, al biıl 9 ayda $1,9 mlrd qwradı, osı jıldıñ birinşi jartıjıldığında körsetiletin qızmetter saudası ötken jıldıñ osınday kezeñimen salıstırğanda 40%-ğa artqan. Qazirgi uaqıtta Qazaqstanda 40-qa juıq şveycariyalıq kompaniyalar jwmıs isteydi.

Osığan deyin Q.Toqaev AQŞ prezidentimen jäne birqatar Europa elderiniñ basşılarımen kezdesu ötkizdi. Aldağı uaqıtta Franciya prezidenti Emmanuel' Makronnıñ Qazaqstanğa saparı jäne Q.Toqaevtıñ Germaniyağa resmi issaparı josparlanıp jatır. Key sarapşılar prezidenttik qızmetke biıl kirisken Toqaev damığan elderdiñ ülgisin almaq niette dese, key sarapşılarda prezidenttiñ Resey jäne Qıtayğa «büyregi bwradı» degen gipoteza tuındağan. Bwl oy-pikirlerdiñ qanşalıqtı säykes keletindigi is jüzinde belgili bola jatar.

Söz soñında ayta keter bolsaq, Şveycariya biligi Qazaqstannıñ ekonomikalıq seriktesi Reseydiñ äreketin qatañ sınğa alatın memleketterdiñ biri. Bıltır şveycariyalıq «Sonntags Zeitung» gazeti qauipsizdik jönindegi jergilikti agenttikterdiñ biriniñ bağalauı boyınşa Şveycariyadağı ärbir törtinşi reseylik diplomat elge arnayı tapsırmamen kelip, astırtın äreketterdi jüzege asıratının jariyaladı. Sol jılı Niderlandı, Wlıbritaniyada, Austriya sındı birqatar Europa elderinde arnayı maqsatpen tıñşılıq jasadı degen küdikpen reseylik azamattar wstalğan bolatın.

"The Qazaq Times"