Körneki suret. Foto: aşıq derekköz

Qazaqstanda jılıtu mausımı bastalğalı beri 1700-den astam ört bolıp, saldarınan 47 adam qaza tapqan.

Astanalıq Tötenşe jağdaylar departamenti bastığınıñ orınbasarı Marğwlan Amanbaev:

– Üyine kirgizbeytin adamdar boladı. Itterin jiberedi, esikterin aşpaydı, balağattaytın adamdar da bar. Olar «Üyleriñizge bizdiñ mamandarımızdı qorıqpay kirgiziñizder, TJD qızmetkerleri ört qauipsizdigi erejelerin üyretip, nasihattap, tüsindirip jür» deymiz. Üy esigin aşpağandarğa wyğarımdama toltırılıp, ayıppwl salınbaydı. Biz tek ügit-nasihat, tüsindirme jwmıstarın jürgizemiz, – deydi.

Eki mıñğa tarta ört oqiğalarınan 57 azamat är türli jaraqat alğan. Tötenşe jağdaylar komiteti taratqan aqparatqa qarağanda, qayğılı oqiğa köbine twrğındardıñ salğırttığınan bolatın körinedi. Dälirek aytqanda, peşti jağu barısında qarapayım ört qauipsizdigin saqtamaytındar barşılıq deydi mamandar.

İşki ister ministrliginiñ vice-ministri YUriy Il'inniñ aytuınşa, bıltır respublika boyınşa 14 567 ört oqiğası tirkelip, saldarınan 434 adam köz jwmğan. Odan bölek 412 adam jaraqat alıp, jalpı materialdıq şığınnıñ kölemi 3,5 milliard teñgeden asqan.

Qazaqstanda ört oqiğaları öte jii bolıp twradı. Biıl 4 aqpan küni tünde elordanıñ Sarıarqa audanındağı Köktal-1 twrğın alabında ornalasqan şağın üyinen ört şığıp, saldarınan 2006, 2008, 2014, 2016, 2018 jılı düniege kelgen bes bala jan tapsırğan edi. Qoğamdıq rezonans tudırğan tragediya eldegi äleumettik, qauipsizdik salasında jüyeli mäselelerdiñ barın körsetken.

"The Qazaq Times"