كورنەكى سۋرەت. فوتو: اشىق دەرەككوز

قازاقستاندا جىلىتۋ ماۋسىمى باستالعالى بەرى 1700-دەن استام ءورت بولىپ، سالدارىنان 47 ادام قازا تاپقان.

استانالىق توتەنشە جاعدايلار دەپارتامەنتى باستىعىنىڭ ورىنباسارى مارعۇلان امانباەۆ:

– ۇيىنە كىرگىزبەيتىن ادامدار بولادى. يتتەرىن جىبەرەدى، ەسىكتەرىن اشپايدى، بالاعاتتايتىن ادامدار دا بار. ولار «ۇيلەرىڭىزگە ءبىزدىڭ ماماندارىمىزدى قورىقپاي كىرگىزىڭىزدەر، تجد قىزمەتكەرلەرى ءورت قاۋىپسىزدىگى ەرەجەلەرىن ۇيرەتىپ، ناسيحاتتاپ، ءتۇسىندىرىپ ءجۇر» دەيمىز. ءۇي ەسىگىن اشپاعاندارعا ۇيعارىمداما تولتىرىلىپ، ايىپپۇل سالىنبايدى. ءبىز تەك ۇگىت-ناسيحات، تۇسىندىرمە جۇمىستارىن جۇرگىزەمىز، – دەيدى.

ەكى مىڭعا تارتا ءورت وقيعالارىنان 57 ازامات ءار ءتۇرلى جاراقات العان. توتەنشە جاعدايلار كوميتەتى تاراتقان اقپاراتقا قاراعاندا، قايعىلى وقيعا كوبىنە تۇرعىنداردىڭ سالعىرتتىعىنان بولاتىن كورىنەدى. دالىرەك ايتقاندا، پەشتى جاعۋ بارىسىندا قاراپايىم ءورت قاۋىپسىزدىگىن ساقتامايتىندار بارشىلىق دەيدى ماماندار.

ىشكى ىستەر مينيسترلىگىنىڭ ۆيتسە-ءمينيسترى يۋري ءيليننىڭ ايتۋىنشا، بىلتىر رەسپۋبليكا بويىنشا 14 567 ءورت وقيعاسى تىركەلىپ، سالدارىنان 434 ادام كوز جۇمعان. ودان بولەك 412 ادام جاراقات الىپ، جالپى ماتەريالدىق شىعىننىڭ كولەمى 3,5 ميلليارد تەڭگەدەن اسقان.

قازاقستاندا ءورت وقيعالارى وتە ءجيى بولىپ تۇرادى. بيىل 4 اقپان كۇنى تۇندە ەلوردانىڭ سارىارقا اۋدانىنداعى كوكتال-1 تۇرعىن الابىندا ورنالاسقان شاعىن ۇيىنەن ءورت شىعىپ، سالدارىنان 2006, 2008, 2014, 2016, 2018 جىلى دۇنيەگە كەلگەن بەس بالا جان تاپسىرعان ەدى. قوعامدىق رەزونانس تۋدىرعان تراگەديا ەلدەگى الەۋمەتتىك، قاۋىپسىزدىك سالاسىندا جۇيەلى ماسەلەلەردىڭ بارىن كورسەتكەن.

"The Qazaq Times"