Apat saldarın joyu jwmısı jürip jatır. Foto: Aqmola oblısınıñ TJD videosınan skrin suret

16 qaraşa küni Aqmola oblısındağı Şortandı kentinde gaz ballonı jarılıp, qayğılı jağday boldı. Üş adam qaza taptı, tağı 10 adam türli deñgeyde jaraqat aldı.

Resmi mälimetke qarağanda, apat 16 qaraşada keşki sağat 21.38-de Lineynaya köşesinde bolğan. Jataq retinde salınğan üyde gaz jarılıp, artı örtke wlasqan. Ot 350 şarşı metr aumaqtı şarpığan.

«Örtti söndiruge tötenşe jağdaylar departamentiniñ 35 qızmetkeri men 7 tehnikası, «Jer Ana» jauapkerşiligi şekteuli seriktesigi memlekettik emes örtke qarsı qızmetiniñ 4 qızmetkeri men 1 tehnikası tartıldı. Tüngi sağat 23.55-te ört tolıq söndirildi»,  – dedi tötenşe jağdaylar ministrliginiñ resmi ökili Talğat Uäli.

Baspasöz qızmetiniñ habarlauınşa, oqiğa ornınan 3 adamnıñ denesi tabıldı. Tağı on adam türli dene jaraqattarmen audandıq ortalıq auruhanağa jetkizild

«Qazirgi kezde oqiğanıñ män-jayı men sebepteri anıqtalıp jatır. Aqmola oblıstıq policiya departamentinde jedel tergeu tobı qwrıldı. Ört zerthanasınıñ mamandarı da tartılıp otır», – dep tolıqtırdı ministrlik ökili.

Vedomstvo azamattarğa twrmıstıq gaz ballonın qoldanuda ört qauipsizdigi talaptarın qatañ saqtauğa ündedi.

Särsenbi tañda Aqmola oblısınıñ öñirlik kommunikaciyalar qızmetinde oqiğanıñ män-jayına arnalğan brifing ötti. Naqtılanğan aqparatqa säykes, eki eresek adam men bir bala köz jwmğan. Örtengen twrğın üyde qonaqtıqta adamdar bolğan.

«Zardap şekkender bir otbası müşesi emes, şaqırılğan qonaqtar da bar. Eki otbası zardap şekti, 5 eresek adam, qalğanı bala. Üy ieleriniñ özderi — üş eresek, tört bala. Olarğa tağı bir otbası qonaqqa kelgen, eki eresek jäne üş bala. Barlığı 12 adam päterde boldı, onıñ üşeui qaza taptı», – dedi oblıstıñ tötenşe jağdaylar departamentiniñ ökili.

Departament dereginşe, 2009 jäne 2012 jılı tuğan eki bala jansaqtau böliminde jasandı tınıs alu apparatında jatır. Olardıñ jağdayı auır. Policiya tergeu jürgize bastadı. Aldın ala jasalğan boljam boyınşa, apattıq oqiğağa gaz ballonın erejege say boyınşa paydalanbau sebep boluı mümkin.

Aqparat tolıqtırıldı

The Qazaq Times