«Peş tübindegi ajal iisi» – körneki suret. Foto: Pixabay

Keşe, qaraşanıñ 22-si Almatı jäne Soltüstik Qazaqstan oblıstarında 6 adam, sonıñ işinde 5 bala ıs tiip (kömirqışqıl gazına ulanu)  auruhanağa tüsti.

İİM Tötenşe jağdaylar komitetinen mälimdeuinşe, Almatı oblısınıñ Talğar qalasında ekiqabattı köppäterli twrğın üyde kömir jağılatın peşti paydalanu erejelerin saqtamau (mwrjası tazalanbağan) saldarınan 9, 6, 4 jäne 2 jastağı balalar kömirqışqıl gazına ulanıp, auruhanağa tüsti. Qazir olar därigerlerdiñ baqılauında.

Al SQO Timiryazev audanınıñ Sulı temirjol stanciyasında jeke twrğın üyde peşti paydalanu erejesiniñ saqtalmauınan 34 jastağı äyel men onıñ 11 jastağı qızı ıstı gazdan ulanıp, küyik şalğan.

Mwrjası tütindegen Qazaqstan jwrtınıñ aymaqtarında äli künge deyin jılıtu jüyesine qosılmağan eldi mekenderdiñ qatarı köp. Säykesinşe üy jağdayında öz betimen peş jağıp, otın jaratatın twrğındarı bar aymaqtardı ört oqiğaları jii bolıp twradı. Biıl jılıtu mausımı bastalğalı beri 1700-den astam ört bolıp, saldarınan 47 adam qaza tapqan. İşki ister ministrliginiñ vice-ministri YUriy Il'inniñ aytuınşa, bıltır respublika boyınşa 14 567 ört oqiğası tirkelip, saldarınan 434 adam köz jwmğan. Odan bölek 412 adam jaraqat alıp, jalpı materialdıq şığınnıñ kölemi 3,5 milliard teñgeden asqan. Al 2017 jılı elimizde 15 mıñ ört oqiğası tirkelip, 352 adam köz jwmıp, 816 adam türli dene jaraqattarın alğan. Demek qızıl jannıñ qwşağında jan tapsırğandar sanı jıldan-jalğa artıp keledi. Ölim sanı 352-den 434-ke ösken. 82 azamat tilsiz jaudıñ qwrbanına aynalğan. Biıl şe?.. «Bwl tiisti vedomstvolar qızmetiniñ därmensizdigin bildirmey me?». Qoğam belsendileri men täuelsiz sarapşılardıñ pikiri osı.

Qazaqstanda ört oqiğaları öte jii bolıp twradı. Biıl 4 aqpan küni tünde elordanıñ Sarıarqa audanındağı Köktal-1 twrğın alabında ornalasqan şağın üyinen ört şığıp, saldarınan 2006, 2008, 2014, 2016, 2018 jılı düniege kelgen bes bala jan tapsırğan edi. Qoğamdıq rezonans tudırğan tragediya eldegi äleumettik, qauipsizdik salasında jüyeli mäselelerdiñ barın körsetken. Biraq bwl jwrt nazarına ilikken bir ğana oqiğa. Osı siyaqtı elimizde jıl sayın qanşama oqiğa bolıp jatır.

"The Qazaq Times"