Reseylik jurnalist Vladimir Solov'ev. Foto: https://hotgeo.ru

Ukrainanıñ eks-prezidenti Petr Poroşenko basqaratın «Europalıq ıntımaqtastıq» partiyasınıñ deputatı Aleksey Gonçarenko Ukraina qauipsizdik qızmeti reseylik jurnalist Vladimir Solov'evke qarsı eki qılmıstıq is qozğağanın mälimdedi.

Gonçarenko Facebook-tegi paraqşasına SBU jauabınıñ köşirmesin qoyıp: «Meniñ ötinişime Ukraina qauipsizdik qızmetinen jauap keldi. Mariupol' jäne Severodoneckidegi tergeu bölimderi sotqa deyingi tergeudi jürgizetin eki qılmıstıq is bastadı» – dep jazdı.

Gonçarenko Solov'ev Ukrainanıñ aumaqtıq twtastığı turalı özderiniñ batıl sözderi üşin zañ aldında jauap berip, Europanıñ sankciyalıq tizimine engiziletinin ayttı.

Reseylik belgili jurnalist Poznerdiñ teñeuimen «jurnalistikanıñ naşar belgisi» nemese oppoziciya ökili Naval'nıy «üşinşi sorttı jurnalist» sanaytın Vladimir Solov'ev qazaq qoğamına da Resey propagandasınıñ ökili retinde tanıs.

2018 jılı Qazaqstan BWW-nıñ qauipsizdik keñesinde Süriya mäselesine qatıstı Reseydiñ rezolyuciyasına qol qoyudan bas tartqan kezde orıs BAQ-tarı wlarday şuladı. Qazaqstannıñ köpvektorlı sayasatımen säykesetin bwl qadamdı jurnalist Vladimir Solov'ev «Voskresnıy veçer» tok-şouında äbden sınağan edi.

Tikeley efir barısında ol: «Qazaqstanmen bizdiñ al'yans qanday özi? Olar nege bizge qoldau bildirmey, ünsiz qaldı? Biz bilmeytin şığarmız, bälkim aramızdı qara mısıq kesip ötken şığar? Älde kelesi «maydan» Qazaqstanda boladı dep kütemiz be?– degen edi Solov'ev. Bwl qıjırtpağa «Reseylik jurnalist Solov'ev? Joq, men efirdi körmedim. Bwl tanımal şou ma? Şınımdı aytsam, mwnday jurnalisti tanımaymın», – dep jauap bergen aqparat jäne kommunikaciya ministri Däuren Abaev ta sın astında qalğan.

Är habarında Ukraina men Orta Aziya elderine köz alartpastan öte almaytın Solov'evti Kievtiñ sotqa berui – ädildik wğımına jarqın mısal bolğanı anıq.

"The Qazaq Times"