Sergey Lavrov pen Mevlut Şavşoğlw Ankarada kezdesti. Foto: YAndeks

Keşe, 8 mausım küni Türkiyanıñ ortalıq qalasında türik jäne orıs SİM basşıları kezdesti. Ankaradağı kezdesu Resey-Ukraina arasındağı mäseleni şeşude igilikti alğa jılju bolmasa da astıq eksportın qalpına keltiru boyınşa birqatar nätijeni körsetkendey boldı.

Qazirge deyin BWW tarabı Ukrainanıñ astıq eksportınıñ twralauı jahandıq azıq-tülik tapşılığın küşeytip jatqanın aytıp, qos taraptan Qara teñiz arqılı şığatın astıq eksportına jol aşudı swrap keldi. Ankaradağı kezekti kezdesude de Ukrainanıñ astıq eksportı bastı taqırıp retinde ortağa qoyılğan.

Türkiya sırtqı ister ministri Mevut Şavuşoğlw men Resey SİM basşısı Sergey Lavrov ortasındağı kezdesudi Resey men Ukrainanıñ, sonday-aq, BWW men Türkiyanıñ ökilderi ortasında astıq eksportı boyınşa kezlissözge jol aştı. Tört taraptı kelissöz aldağı uaqıtta Stambulda ötedi dep josparlanuda.

Reseydiñ bas diplomatı bolsa Ukraina porttarınıñ jabıluı düniejüzilik azıq-tülik tapşılığın tudırıp jatır degen uäjdi joqqa şığaradı. Onıñ aytuınşa, bwl «jahandıq dağdarıs» deuge kelmeydi jäne Ukraina porttarında twrğan astıq älemdegi astıq qorınıñ 1 payızın ğana ieleydi. Ol astıq eksportın qalpına keltiru üşin Ukrainadağı porttardı minadan tazartu kerektigin alğa tartadı. Al, Ukraina jaq Resey bwl äreketti äskeri maqsatta paydalanbauı kerek degen talaptarın alğa qoyadı.

Baspasöz jiını kezinde Lavrov Resey men Türkiya äskeri küşteri porttardı minadan tazartu boyınşa äreketterdi talqılap jatqandarın ayttı. Ol jäne kelissözderden keyin Reseydiñ jağdaydı äskeri maqsatta paydalanbauğa kepildik beretinin ayttı.

«Eger Ukraina kemelerdiñ şığuına rwqsat berip, minalardı tazalaytın bolsa, biz bwl jağdaydı arnayı jürgizilip jatqan äskeri operaciyanıñ müddesine paydalanbaymız. Bwl prezidenttiñ kepildigi. Biz bwl kepildikti jazbaşa hattauğa da dayınbız», – dedi Lavrov sözindi.

Kezdesude belgili bolğanday, Türkiya men Resey äskeri küşteri Qara teñizdegi porttardan astıq alıp şığatın kemelerdiñ qauipsizdigin qamtamasız etuge dayın ekendikterin bildirdi. Sonday-aq, eki el SİM jetekşileriniñ kezdesui naurızdan beri toqtap qalğan Resey-Ukraina kelissözine de jol aştı.

The Qazaq Times