ۋكراينا رەسەيلىك جۋرناليست سولوۆەۆكە قارسى قىلمىستىق ءىس قوزعادى

ۋكراينانىڭ ەكس-پرەزيدەنتى پەتر پوروشەنكو باسقاراتىن «ەۋروپالىق ىنتىماقتاستىق» پارتياسىنىڭ دەپۋتاتى الەكسەي گونچارەنكو ۋكراينا قاۋىپسىزدىك قىزمەتى رەسەيلىك جۋرناليست ۆلاديمير سولوۆەۆكە قارسى ەكى قىلمىستىق ءىس قوزعاعانىن مالىمدەدى.

گونچارەنكو Facebook-تەگى پاراقشاسىنا سبۋ جاۋابىنىڭ كوشىرمەسىن قويىپ: «مەنىڭ وتىنىشىمە ۋكراينا قاۋىپسىزدىك قىزمەتىنەن جاۋاپ كەلدى. ماريۋپول جانە سەۆەرودونەتسكىدەگى تەرگەۋ بولىمدەرى سوتقا دەيىنگى تەرگەۋدى جۇرگىزەتىن ەكى قىلمىستىق ءىس باستادى» – دەپ جازدى.

گونچارەنكو سولوۆەۆ ۋكراينانىڭ اۋماقتىق تۇتاستىعى تۋرالى وزدەرىنىڭ باتىل سوزدەرى ءۇشىن زاڭ الدىندا جاۋاپ بەرىپ، ەۋروپانىڭ سانكتسيالىق تىزىمىنە ەنگىزىلەتىنىن ايتتى.

رەسەيلىك بەلگىلى جۋرناليست پوزنەردىڭ تەڭەۋىمەن «جۋرناليستيكانىڭ ناشار بەلگىسى» نەمەسە وپپوزيتسيا وكىلى ناۆالنىي «ءۇشىنشى سورتتى جۋرناليست» سانايتىن ۆلاديمير سولوۆەۆ قازاق قوعامىنا دا رەسەي پروپاگانداسىنىڭ وكىلى رەتىندە تانىس.

2018 جىلى قازاقستان بۇۇ-نىڭ قاۋىپسىزدىك كەڭەسىندە ءسۇريا ماسەلەسىنە قاتىستى رەسەيدىڭ رەزوليۋتسياسىنا قول قويۋدان باس تارتقان كەزدە ورىس باق-تارى ۇلارداي شۋلادى. قازاقستاننىڭ كوپۆەكتورلى ساياساتىمەن سايكەسەتىن بۇل قادامدى جۋرناليست ۆلاديمير سولوۆەۆ «ۆوسكرەسنىي ۆەچەر» توك-شوۋىندا ابدەن سىناعان ەدى.

تىكەلەي ەفير بارىسىندا ول: «قازاقستانمەن ءبىزدىڭ اليانس قانداي ءوزى؟ ولار نەگە بىزگە قولداۋ بىلدىرمەي، ءۇنسىز قالدى؟ ءبىز بىلمەيتىن شىعارمىز، بالكىم ارامىزدى قارا مىسىق كەسىپ وتكەن شىعار؟ الدە كەلەسى «مايدان» قازاقستاندا بولادى دەپ كۇتەمىز بە؟– دەگەن ەدى سولوۆەۆ. بۇل قىجىرتپاعا «رەسەيلىك جۋرناليست سولوۆەۆ؟ جوق، مەن ەفيردى كورمەدىم. بۇل تانىمال شوۋ ما؟ شىنىمدى ايتسام، مۇنداي ءجۋرناليستى تانىمايمىن»، – دەپ جاۋاپ بەرگەن اقپارات جانە كوممۋنيكاتسيا ءمينيسترى داۋرەن اباەۆ تا سىن استىندا قالعان.

ءار حابارىندا ۋكراينا مەن ورتا ازيا ەلدەرىنە كوز الارتپاستان وتە المايتىن سولوۆەۆتى كيەۆتىڭ سوتقا بەرۋى – ادىلدىك ۇعىمىنا جارقىن مىسال بولعانى انىق.

"The Qazaq Times"