Almatınıñ äleumettik-ekonomikalıq damuına arnalğan keñeste Sağıntaev prezident Toqaevtı «Almatı – 2050» damu strategiyasınıñ jobasımen tanıstırıp twr. 29 qazan 2019 jıl. Almatı. Foto: Aqorda

Toqaevtıñ qatısuımen ötken keñeste Sağıntaev qalanı damıtudağı nätijelerimen bölisip, prezidentten jaña eki elektr stansa saluğa kömektesuin swradı. Söz alğan memleket basşısı Almatınıñ üştoqsandıq tabısına şolıp, soñına qaray büy dedi...  

Bügin prezident Qasım-Jomart Toqaev Almatı qalasına eki kündik jwmıs saparımen kelgenin habarlağan edik. Almatınıñ  äleumettik-ekonomikalıq damuına arnalğan keñeste Baqıtjan Sağıntaev 2019 jıldıñ 9 ayındağı damudıñ negizgi nätijelerin tizbektep berdi:

«Qazirgi körsetkişter äleumettik-ekonomikalıq damudıñ oñ dinamikasın körsetip otır:

  • İ-şi jartıjıldıqta jalpı öñirlik önim ösimi 4,1%-dı qwradı.
  • Önerkäsip 5,9%-ğa arttı.
  • Investiciya – 5,5%-ğa,
  • qwrılıs – 3,1%-ğa,
  • twrğın üydi paydalanuğa beru – 2,8%-ğa östi.
  • Inflyaciya 3,3%-dan aspaydı.
  • Jwmıssızdıq deñgeyi 5,1%-ğa deyin tömendedi.
  • Jıl basınan beri 29 200 jaña jwmıs ornı aşıldı.
  • Salıqtıq äkimşilendirudi jaqsartu esebinen memlekettik byudjetke tüsetin salıq ötken jılğa qarağanda 12,4%-ğa

köp jinaldı», – degen şahar äkimi künde kele bermeytin sıylı qonağı prezident Toqaevtan jaña jobağa kömektesuin swradı:

– Almatı qalası elektr energiyasın twraqtı twtınudı qajet etetin iri twtınuşılardıñ biri bolıp tabıladı. Büginde Almagül jäne Twzdıbastau ıqşamaudandarında 100 mıñ adamğa arnalğan 850 mıñ şarşı metr twrğın üyler salu josparda bar. Osı ıqşamaudandardı elektr quatımen üzdiksiz qamtamasız etu üşin jalpı qwnı 20 milliard teñgege 2 elektr stansısın salu qajet. Bwl nısandardıñ jobalıq-smetalıq qwjattaması bar. Sizden 2020 jılı byudjetti naqtılau kezinde mäseleni şeşuge kömektesuiñizdi swraymız,  – dep.

Almatınıñ äleumettik-ekonomikalıq damuına arnalğan keñeste prezident Toqaev Almatınıñ jetistikteri turalı söz etti. 29 qazan 2019 jıl. Almatı. Foto: Aqorda

«Almatı – Täuelsiz Qazaqstannıñ irgesi qalanğan qasterli meken. Bärimiz üşin bwl şahardıñ ornı bölek. Mwnda el tağdırına qatıstı mañızdı äri tarihi şeşimder qabıldandı. Ata zañımız, memlekettik rämizder, wlttıq valyutamız osında bekitildi. Büginde Almatı bilim, ğılım, mädeniet jäne iskerlik ortalığı retinde damıp keledi. Soñğı jıldarı qalağa jaña aumaqtar qosılıp, kölemi 2 esege wlğaydı. Halqınıñ sanı 20%-ğa ösip, 1,8 million adamğa jetti. Qalada basqa öñirlerden kelgen jäne osı töñirekte twratın jartı millionğa juıq adam jwmıspen qamtılıp otır», – dedi prezident.

Sonımen qatar, Toqaev büginde düniejüzindegi 600 qalalıq aglomeraciya älemdik işki jalpı önimniñ üşten ekisin öndirip otırğandığın söz etti.

  • «Bizdiñ şaharlarımız da wlttıq ekonomikanı damıtuğa zor üles qosıp keledi.
  • Bügingi tañda elimizdiñ işki jalpı öniminiñ 3/1-i Almatı qalası men elordağa tiesili.
  • Almatı täuelsizdik jıldarı iri ekonomikalıq ortalıqqa jäne respublikalıq byudjettiñ donorına aynaldı. Şahar:  işki jalpı önimniñ 5/1-in;
  • memlekettik byudjetke tüsetin tüsimniñ 20%-dan astamın;
  • bankter beretin nesieniñ 60%-ın qamtamasız etip otır.
  • Sonday-aq, elimizdegi köterme jäne bölşek saudanıñ 40%-dan astamı,
  • sırtqı sauda aynalımınıñ 15%-ğa juığı osı qalada jürgiziledi.

Osında aşılğan Birikken Wlttar Wyımınıñ 17 mekemesiniñ ökildikteri Ortalıq Aziyanıñ öñirlik habına aynalıp otır», – dedi memleket basşısı. Ol «aldağı uaqıtta atalğan bastamalar jalğasın tabuı tiis» ekenin ayttı söz soñında.

Almatınıñ äleumettik-ekonomikalıq damuına arnalğan keñeste Sağıntaev prezident Toqaevqa jobalardı tanıstırıp twr. 29 qazan 2019 jıl. Almatı. Foto: Aqorda

"The Qazaq Times"