ساعىنتاەۆتىڭ توقاەۆتان كومەك سۇراۋى جانە «دامۋ جونىندەگى ناتيجەلەر» كەڭەسى

توقاەۆتىڭ قاتىسۋىمەن وتكەن كەڭەستە ساعىنتاەۆ قالانى دامىتۋداعى ناتيجەلەرىمەن ءبولىسىپ، پرەزيدەنتتەن جاڭا ەكى ەلەكتر ستانسا سالۋعا كومەكتەسۋىن سۇرادى. ءسوز العان مەملەكەت باسشىسى الماتىنىڭ ۇشتوقساندىق تابىسىنا شولىپ، سوڭىنا قاراي ءبۇي دەدى...  

بۇگىن پرەزيدەنت قاسىم-جومارت توقاەۆ الماتى قالاسىنا ەكى كۇندىك جۇمىس ساپارىمەن كەلگەنىن حابارلاعان ەدىك. الماتىنىڭ  الەۋمەتتىك-ەكونوميكالىق دامۋىنا ارنالعان كەڭەستە باقىتجان ساعىنتاەۆ 2019 جىلدىڭ 9 ايىنداعى دامۋدىڭ نەگىزگى ناتيجەلەرىن تىزبەكتەپ بەردى:

«قازىرگى كورسەتكىشتەر الەۋمەتتىك-ەكونوميكالىق دامۋدىڭ وڭ ديناميكاسىن كورسەتىپ وتىر:

• ءى-ءشى جارتىجىلدىقتا جالپى وڭىرلىك ءونىم ءوسىمى 4,1%-دى قۇرادى.
• ونەركاسىپ 5,9%-عا ارتتى.
• ينۆەستيتسيا – 5,5%-عا،
• قۇرىلىس – 3,1%-عا،
• تۇرعىن ءۇيدى پايدالانۋعا بەرۋ – 2,8%-عا ءوستى.
• ينفلياتسيا 3,3%-دان اسپايدى.
• جۇمىسسىزدىق دەڭگەيى 5,1%-عا دەيىن تومەندەدى.
• جىل باسىنان بەرى 29 200 جاڭا جۇمىس ورنى اشىلدى.
• سالىقتىق اكىمشىلەندىرۋدى جاقسارتۋ ەسەبىنەن مەملەكەتتىك بيۋدجەتكە تۇسەتىن سالىق وتكەن جىلعا قاراعاندا 12,4%-عا

كوپ جينالدى»، – دەگەن شاھار اكىمى كۇندە كەلە بەرمەيتىن سىيلى قوناعى پرەزيدەنت توقاەۆتان جاڭا جوباعا كومەكتەسۋىن سۇرادى:

– الماتى قالاسى ەلەكتر ەنەرگياسىن تۇراقتى تۇتىنۋدى قاجەت ەتەتىن ءىرى تۇتىنۋشىلاردىڭ ءبىرى بولىپ تابىلادى. بۇگىندە الماگۇل جانە تۇزدىباستاۋ ىقشاماۋداندارىندا 100 مىڭ ادامعا ارنالعان 850 مىڭ شارشى مەتر تۇرعىن ۇيلەر سالۋ جوسپاردا بار. وسى ىقشاماۋدانداردى ەلەكتر قۋاتىمەن ۇزدىكسىز قامتاماسىز ەتۋ ءۇشىن جالپى قۇنى 20 ميلليارد تەڭگەگە 2 ەلەكتر ستانسىسىن سالۋ قاجەت. بۇل نىسانداردىڭ جوبالىق-سمەتالىق قۇجاتتاماسى بار. سىزدەن 2020 جىلى بيۋدجەتتى ناقتىلاۋ كەزىندە ماسەلەنى شەشۋگە كومەكتەسۋىڭىزدى سۇرايمىز،  – دەپ.

الماتىنىڭ الەۋمەتتىك-ەكونوميكالىق دامۋىنا ارنالعان كەڭەستە پرەزيدەنت توقاەۆ الماتىنىڭ جەتىستىكتەرى تۋرالى ءسوز ەتتى. 29 قازان 2019 جىل. الماتى. فوتو: اقوردا

«الماتى – تاۋەلسىز قازاقستاننىڭ ىرگەسى قالانعان قاستەرلى مەكەن. ءبارىمىز ءۇشىن بۇل شاھاردىڭ ورنى بولەك. مۇندا ەل تاعدىرىنا قاتىستى ماڭىزدى ءارى تاريحي شەشىمدەر قابىلداندى. اتا زاڭىمىز، مەملەكەتتىك رامىزدەر، ۇلتتىق ۆاليۋتامىز وسىندا بەكىتىلدى. بۇگىندە الماتى ءبىلىم، عىلىم، مادەنيەت جانە ىسكەرلىك ورتالىعى رەتىندە دامىپ كەلەدى. سوڭعى جىلدارى قالاعا جاڭا اۋماقتار قوسىلىپ، كولەمى 2 ەسەگە ۇلعايدى. حالقىنىڭ سانى 20%-عا ءوسىپ، 1,8 ميلليون ادامعا جەتتى. قالادا باسقا وڭىرلەردەن كەلگەن جانە وسى توڭىرەكتە تۇراتىن جارتى ميلليونعا جۋىق ادام جۇمىسپەن قامتىلىپ وتىر»، – دەدى پرەزيدەنت.

سونىمەن قاتار، توقاەۆ بۇگىندە دۇنيەجۇزىندەگى 600 قالالىق اگلومەراتسيا الەمدىك ىشكى جالپى ءونىمنىڭ ۇشتەن ەكىسىن ءوندىرىپ وتىرعاندىعىن ءسوز ەتتى.

• «ءبىزدىڭ شاھارلارىمىز دا ۇلتتىق ەكونوميكانى دامىتۋعا زور ۇلەس قوسىپ كەلەدى.
• بۇگىنگى تاڭدا ەلىمىزدىڭ ىشكى جالپى ءونىمىنىڭ 3/1-ءى الماتى قالاسى مەن ەلورداعا تيەسىلى.
• الماتى تاۋەلسىزدىك جىلدارى ءىرى ەكونوميكالىق ورتالىققا جانە رەسپۋبليكالىق بيۋدجەتتىڭ دونورىنا اينالدى. شاھار:  ىشكى جالپى ءونىمنىڭ 5/1-ءىن;
• مەملەكەتتىك بيۋدجەتكە تۇسەتىن ءتۇسىمنىڭ 20%-دان استامىن;
• بانكتەر بەرەتىن نەسيەنىڭ 60%-ىن قامتاماسىز ەتىپ وتىر.
• سونداي-اق، ەلىمىزدەگى كوتەرمە جانە بولشەك ساۋدانىڭ 40%-دان استامى،
• سىرتقى ساۋدا اينالىمىنىڭ 15%-عا جۋىعى وسى قالادا جۇرگىزىلەدى.

وسىندا اشىلعان بىرىككەن ۇلتتار ۇيىمىنىڭ 17 مەكەمەسىنىڭ وكىلدىكتەرى ورتالىق ازيانىڭ وڭىرلىك حابىنا اينالىپ وتىر»، – دەدى مەملەكەت باسشىسى. ول «الداعى ۋاقىتتا اتالعان باستامالار جالعاسىن تابۋى ءتيىس» ەكەنىن ايتتى ءسوز سوڭىندا.

الماتىنىڭ الەۋمەتتىك-ەكونوميكالىق دامۋىنا ارنالعان كەڭەستە ساعىنتاەۆ پرەزيدەنت توقاەۆقا جوبالاردى تانىستىرىپ تۇر. 29 قازان 2019 جىل. الماتى. فوتو: اقوردا

"The Qazaq Times"