Almatıdağı sankciyalanbağan "bolmağan" mitingte onnan köp azamat wstaldı. Almatı. 26 qazan 2019 jıl. Foto: QT

Bügin qwzırlı organdar tarapınan «rwqsat etilmegen», biraq «bolmağan» mitingilerge baylanıstı  İİM baspasöz qızmeti «Jağdaydı anıqtau üşin jäne äkimşilik jauapkerşilikke tartu mäselesin qarastıru maqsatında policiyağa 26 adam jetkizildi» dep habarladı.

Almatıdağı Töle bi men Panfilov köşeleriniñ qiılısında ornalasqan Astana alañında onnan astam adam wstaldı. Policiya olardıñ sözin ayaqtatpay birden avtozkaqa salıp äketti. Küştik qwrılımdarmen qatañ rejimde küzetke alınğan aymaqta arnayı jasaq «öz betimşe seyildep jürmin» degen azamattardı da alıp ketti. Äkimdik qızmetkerleri «Äbilyazov belgilegen mitingi ornında» jürgenderge tarau qajettigin aytıp eskertu jasadı.

Panfilov jäne Töle bi köşelerinde qarauılda twrğan Wlttıq Wlan sarbazdarı. Almatı. 26 qazan 2019 jıl. Foto: QT

Tüsten keyin bastalsa da «bolmağan mitingiler» özge öñirlerde jalğasqan. Azattıq dereginşe policiya elorda, Şımkent jäne Aqtöbede de azamattardı wstağan.

Osığan deyin QR aumağında ekstremistik wyım retinde tanılıp, tıyım salınğan «Qazaqstannıñ demokratiyalıq tañdauı» («QDT») qozğalısınıñ basşısı, sırttay 20 jılğa sottalıp, artınan jazası ömir boyına bas bostandığın ayıru türine auıstırılğan ekonomist, eks-bankir Mwhtar Äblyazov azamattardı internet arqılı 26 qırküyek jappay narazılıq şarasına şaqırğan edi.

Küştik qwrılımdarğa Konstituciyadan üzindi oqıp twrğan azamat Şorağali Äljanov. Almatı. 26 qazan 2019 jıl. Foto: QT

Miting ötedi dep josparlanğan aymaqta özin Şorağali Äljanov Jwmadenwlı dep tanıstırğan belsendilerdiñ biri arnayı jasaq pen qwqıq qorğauşı organdardıñ ökilderine qarata Konstituciyadan üzindi oqıp berdi. Jartı sağatqa juıq el işindegi sayasi-äleumettik "ahualdıñ şielenisuine" qatıstı bilik basşıları men äskerilerdi "eldiñ, bolaşaq wrpağınıñ tağdırına beyjay qaramauğa" şaqırdı.

Äuezov audanı policiya basqarmasınıñ ökili Älişer Twrsınbekov BAQ ökilderiniñ qazaqşa aytuın swrağanına qaramastan tek orıs tilinde:

–…Bwl orında sankciyalanbağan jäne zañsız wyım sanalatın QDT-nıñ wyımdastıruımen qanday da bir mitingterdi ötkizuge rwqsat etilmeydi. Sot şeşimine säykes atalğan wyımğa Qazaqstan aumağında tıyım salınğan. Keşe Bas prokuratura azamattardıñ rwqsat etilmegen mitingke şıqpauı, zañdı saqtauı jöninde resmi mälimdeme jasağan bolatın. Sizderdiñ qauipsizdikteriñiz üşin, qoğamdıq tärtipsizdikter orın almauı üşin tağı da eskertu jasaymız. Tärtip bwzuşılarğa zañ boyınşa şaralar qoldanıladı. Tärtipsizdik ornatqan azamat Almatıdağı policiya mekemesine jetkiziledi», – dep mälimdeme jasadı.

Äuezov audanı policiya basqarmasınıñ ökili Älişer Twrsınbekov öz sözinen keyin jurnalisterdiñ swrağına jauap bermey, qaşıp ketti. Almatı. 26 qazan 2019 jıl. Foto: QT

Keşe, qırküyektiñ 25-i ötui ıqtimal sankciyalanbağan mitingke qatıstı Qazaqstannıñ Bas prokuraturası el azamattarına «qatañ eskertu» türinde ündeu jasağan edi. Sonday-aq, küştik qwrılımdar profilaktika retinde QDT akciyaları qarsañında ädettegidey qwzırlı organdar azamattıq qoğam belsendileriniñ tüs-atın tügendep, eskertip, şaqırtıp, habarlasıp, keybirin qamap, rwqsat etilmegen jiınnıñ bolmauına barınşa «eñbek etip» jatır.

Mwnıñ däleli retinde facebook jelisindegi #IHaveAChoise#ActivistsNotExtremists tobınıñ jetekşisi,  «Otkrıtıy dialog» qorınıñ prezidenti  Lyudmila Kozlovska wsınğan mälimet boyınşa, 17-25 qazan aralığında eldegi 10 qalada belsendilerge 50 qısım körsetu oqiğası anıqtalğan. Olardıñ 12-si äkimşilik wstau-qamauğa alınsa, 3 belsendige äkimşilik ayıppwl jazasın tağayındağan.

Qwqıq qorğauşı Lyudmyla Kozlovska-nıñ facebook paraqşasındağı «belsendilerdi qudalau» jönindegi jazbası. Foto: Lyudmyla Kozlovska paraqşasınan skrinşot-qiındı

Şeteldegi Qazaqstandıq oppoziciya men bilik teketiresiniñ arasında qağaju körgen azamattıq qoğamnıñ üni men bolaşağı jaylı sarapşılar  «Alañğa şıqqandardıñ bärin Äbiläzovtıñ jaqtastarı dep sanau biliktiñ ülken qateligi» degen bolatın.

Eş tüsindirmesiz wstalğan azamat. Almatı. 26 qazan 2019 jıl. Foto: QT

Alañ mañında jürgen azamattar eş tüsindirmesiz wstaldı. Almatı. 26 qazan 2019 jıl. Foto: QT

Policiyanıñ azamattardı "tarpa bas salıp" wstauı. Almatı, 26 qazan 2019 jıl. Foto: Azattıq/Petr Trocenko

Sauıt-saymanımen qarulanğan arnayı jasaq ta rwqsat etilmegen jiındı taratuğa "atsalısuda". Elorda. 26 qazan 2019 jıl. Foto: Sputnik/Vladislav Vodnev

Jinalğandardıñ tügelderligi BAQ pen küştik qwrılım ökilderi, sonday-aq sırttan azamattıq formada baqılap, beyneqwrılğılarğa tartıp jürgen belgisiz adamdar da köp boldı.

El işinde "Üş äriptilerdi añditın üş äriptiler" dep atalıp ketken beymälim "agentter". Almatı. 26 qazan 2019 jıl. Foto: QT

"Bülikşilerdi" qwrıqtauğa "saqaday say" küştik qwrılımdar. Almatı. 26 qazan 2019 jıl. Foto: QT

"The Qazaq Times"