بۇگىن قۇزىرلى ورگاندار تاراپىنان «رۇقسات ەتىلمەگەن»، بىراق «بولماعان» ميتينگىلەرگە بايلانىستى ىىم ءباسپاسوز قىزمەتى «جاعدايدى انىقتاۋ ءۇشىن جانە اكىمشىلىك جاۋاپكەرشىلىككە تارتۋ ماسەلەسىن قاراستىرۋ ماقساتىندا پوليتسياعا 26 ادام جەتكىزىلدى» دەپ حابارلادى.
الماتىداعى تولە بي مەن پانفيلوۆ كوشەلەرىنىڭ قيىلىسىندا ورنالاسقان استانا الاڭىندا وننان استام ادام ۇستالدى. پوليتسيا ولاردىڭ ءسوزىن اياقتاتپاي بىردەن اۆتوزكاقا سالىپ اكەتتى. كۇشتىك قۇرىلىمدارمەن قاتاڭ رەجيمدە كۇزەتكە الىنعان ايماقتا ارنايى جاساق «ءوز بەتىمشە سەيىلدەپ ءجۇرمىن» دەگەن ازاماتتاردى دا الىپ كەتتى. اكىمدىك قىزمەتكەرلەرى «ءابىليازوۆ بەلگىلەگەن ميتينگى ورنىندا» جۇرگەندەرگە تاراۋ قاجەتتىگىن ايتىپ ەسكەرتۋ جاسادى.
پانفيلوۆ جانە تولە بي كوشەلەرىندە قاراۋىلدا تۇرعان ۇلتتىق ۇلان ساربازدارى. الماتى. 26 قازان 2019 جىل. فوتو: QT
تۇستەن كەيىن باستالسا دا «بولماعان ميتينگىلەر» وزگە وڭىرلەردە جالعاسقان. ازاتتىق دەرەگىنشە پوليتسيا ەلوردا، شىمكەنت جانە اقتوبەدە دە ازاماتتاردى ۇستاعان.
وسىعان دەيىن قر اۋماعىندا ەكسترەميستىك ۇيىم رەتىندە تانىلىپ، تىيىم سالىنعان «قازاقستاننىڭ دەموكراتيالىق تاڭداۋى» («قدت») قوزعالىسىنىڭ باسشىسى، سىرتتاي 20 جىلعا سوتتالىپ، ارتىنان جازاسى ءومىر بويىنا باس بوستاندىعىن ايىرۋ تۇرىنە اۋىستىرىلعان ەكونوميست، ەكس-بانكير مۇحتار ءابليازوۆ ازاماتتاردى ينتەرنەت ارقىلى 26 قىركۇيەك جاپپاي نارازىلىق شاراسىنا شاقىرعان ەدى.
كۇشتىك قۇرىلىمدارعا كونستيتۋتسيادان ءۇزىندى وقىپ تۇرعان ازامات شوراعالي ءالجانوۆ. الماتى. 26 قازان 2019 جىل. فوتو: QT
ميتينگ وتەدى دەپ جوسپارلانعان ايماقتا ءوزىن شوراعالي ءالجانوۆ جۇمادەنۇلى دەپ تانىستىرعان بەلسەندىلەردىڭ ءبىرى ارنايى جاساق پەن قۇقىق قورعاۋشى ورگانداردىڭ وكىلدەرىنە قاراتا كونستيتۋتسيادان ءۇزىندى وقىپ بەردى. جارتى ساعاتقا جۋىق ەل ىشىندەگى ساياسي-الەۋمەتتىك "احۋالدىڭ شيەلەنىسۋىنە" قاتىستى بيلىك باسشىلارى مەن اسكەريلەردى "ەلدىڭ، بولاشاق ۇرپاعىنىڭ تاعدىرىنا بەيجاي قاراماۋعا" شاقىردى.
اۋەزوۆ اۋدانى پوليتسيا باسقارماسىنىڭ وكىلى الىشەر تۇرسىنبەكوۆ باق وكىلدەرىنىڭ قازاقشا ايتۋىن سۇراعانىنا قاراماستان تەك ورىس تىلىندە:
–…بۇل ورىندا سانكتسيالانباعان جانە زاڭسىز ۇيىم سانالاتىن قدت-نىڭ ۇيىمداستىرۋىمەن قانداي دا ءبىر ميتينگتەردى وتكىزۋگە رۇقسات ەتىلمەيدى. سوت شەشىمىنە سايكەس اتالعان ۇيىمعا قازاقستان اۋماعىندا تىيىم سالىنعان. كەشە باس پروكۋراتۋرا ازاماتتاردىڭ رۇقسات ەتىلمەگەن ميتينگكە شىقپاۋى، زاڭدى ساقتاۋى جونىندە رەسمي مالىمدەمە جاساعان بولاتىن. سىزدەردىڭ قاۋىپسىزدىكتەرىڭىز ءۇشىن، قوعامدىق تارتىپسىزدىكتەر ورىن الماۋى ءۇشىن تاعى دا ەسكەرتۋ جاسايمىز. ءتارتىپ بۇزۋشىلارعا زاڭ بويىنشا شارالار قولدانىلادى. تارتىپسىزدىك ورناتقان ازامات الماتىداعى پوليتسيا مەكەمەسىنە جەتكىزىلەدى»، – دەپ مالىمدەمە جاسادى.
اۋەزوۆ اۋدانى پوليتسيا باسقارماسىنىڭ وكىلى الىشەر تۇرسىنبەكوۆ ءوز سوزىنەن كەيىن جۋرناليستەردىڭ سۇراعىنا جاۋاپ بەرمەي، قاشىپ كەتتى. الماتى. 26 قازان 2019 جىل. فوتو: QT
كەشە، قىركۇيەكتىڭ 25-ءى ءوتۋى ىقتيمال سانكتسيالانباعان ميتينگكە قاتىستى قازاقستاننىڭ باس پروكۋراتۋراسى ەل ازاماتتارىنا «قاتاڭ ەسكەرتۋ» تۇرىندە ۇندەۋ جاساعان ەدى. سونداي-اق، كۇشتىك قۇرىلىمدار پروفيلاكتيكا رەتىندە قدت اكتسيالارى قارساڭىندا ادەتتەگىدەي قۇزىرلى ورگاندار ازاماتتىق قوعام بەلسەندىلەرىنىڭ ءتۇس-اتىن تۇگەندەپ، ەسكەرتىپ، شاقىرتىپ، حابارلاسىپ، كەيبىرىن قاماپ، رۇقسات ەتىلمەگەن جيىننىڭ بولماۋىنا بارىنشا «ەڭبەك ەتىپ» جاتىر.
مۇنىڭ دالەلى رەتىندە facebook جەلىسىندەگى #IHaveAChoiسe#ActivistsNotExtremists توبىنىڭ جەتەكشىسى، «وتكرىتىي ديالوگ» قورىنىڭ پرەزيدەنتى ليۋدميلا كوزلوۆسكا ۇسىنعان مالىمەت بويىنشا، 17-25 قازان ارالىعىندا ەلدەگى 10 قالادا بەلسەندىلەرگە 50 قىسىم كورسەتۋ وقيعاسى انىقتالعان. ولاردىڭ 12-ءسى اكىمشىلىك ۇستاۋ-قاماۋعا الىنسا، 3 بەلسەندىگە اكىمشىلىك ايىپپۇل جازاسىن تاعايىنداعان.
قۇقىق قورعاۋشى Lyudmyla Kozlovska-نىڭ facebook پاراقشاسىنداعى «بەلسەندىلەردى قۋدالاۋ» جونىندەگى جازباسى. فوتو: Lyudmyla Kozlovska پاراقشاسىنان سكرينشوت-قيىندى
شەتەلدەگى قازاقستاندىق وپپوزيتسيا مەن بيلىك تەكەتىرەسىنىڭ اراسىندا قاعاجۋ كورگەن ازاماتتىق قوعامنىڭ ءۇنى مەن بولاشاعى جايلى ساراپشىلار «الاڭعا شىققانداردىڭ ءبارىن ءابىلازوۆتىڭ جاقتاستارى دەپ ساناۋ بيلىكتىڭ ۇلكەن قاتەلىگى» دەگەن بولاتىن.
ەش تۇسىندىرمەسىز ۇستالعان ازامات. الماتى. 26 قازان 2019 جىل. فوتو: QT
الاڭ ماڭىندا جۇرگەن ازاماتتار ەش تۇسىندىرمەسىز ۇستالدى. الماتى. 26 قازان 2019 جىل. فوتو: QT
پوليتسيانىڭ ازاماتتاردى "تارپا باس سالىپ" ۇستاۋى. الماتى، 26 قازان 2019 جىل. فوتو: ازاتتىق/پەتر تروتسەنكو
ساۋىت-سايمانىمەن قارۋلانعان ارنايى جاساق تا رۇقسات ەتىلمەگەن جيىندى تاراتۋعا "اتسالىسۋدا". ەلوردا. 26 قازان 2019 جىل. فوتو: Sputnik/ۆلاديسلاۆ ۆودنەۆ
جينالعانداردىڭ تۇگەلدەرلىگى باق پەن كۇشتىك قۇرىلىم وكىلدەرى، سونداي-اق سىرتتان ازاماتتىق فورمادا باقىلاپ، بەينەقۇرىلعىلارعا تارتىپ جۇرگەن بەلگىسىز ادامدار دا كوپ بولدى.
ەل ىشىندە ء"ۇش ارىپتىلەردى اڭديتىن ءۇش ارىپتىلەر" دەپ اتالىپ كەتكەن بەيمالىم "اگەنتتەر". الماتى. 26 قازان 2019 جىل. فوتو: QT
"بۇلىكشىلەردى" قۇرىقتاۋعا "ساقاداي ساي" كۇشتىك قۇرىلىمدار. الماتى. 26 قازان 2019 جىل. فوتو: QT
شەرزاتتىڭ ءولىمى ىسىنە قاتىستى قۇپيا ۆيدەونى جاريالاۋ كىمگە كەرەك بولدى؟ – ساراپشىلار مەديا سىنى
24 قازان – كىتاپحاناشىلار مەرەكەسى قۇتتى بولسىن!
«ۋچاسكەدەن ارۋاققا كوك حات»: الماتىدا مارقۇمعا كەلگەن شاقىرتۋ
كوميسسيا مەن باقىلاۋشى ەسەبىندەگى ايىرماشىلىق: الماتىدا رەفەرەندۋم قالاي ءوتىپ جاتىر؟
ء"ادىل قازاقستان، ەستيتىن مەملەكەت" ەندى ادۆوكاتتارعا قىسىم جاساي باستادى ما؟
«پسەۆدو-بايقاۋشى» الدە كاسىبي باقىلاۋشى: رەفەرەندۋمدى كىم باقىلايدى؟