Foto: The Qazaq Times

Bügin sağat tüski ekiden beri Almatıdağı «Astana» alañında ötip jatqan sankciyalanbağan mitingke qatıstı Äuezov audanı policiya basqarmasınıñ ökili Älişer Twrsınbekov mälimdeme jasadı.

Twrsınbekov sözinde: «Qwrmetti azamattar! Bwl orında sankciyalanbağan jäne zañsız wyım sanalatın QDT-nıñ wyımdastıruımen qanday da bir mitingterdi ötkizuge rwqsat etilmeydi. Sot şeşimine säykes atalğan wyımğa Qazaqstan aumağında tıyım salınğan. Keşe Bas prokuratura azamattardıñ rwqsat etilmegen mitingke şıqpauı, zañdı saqtauı jöninde resmi mälimdeme jasağan bolatın. Sizderdiñ qauipsizdikteriñiz üşin, qoğamdıq tärtipsizdikter orın almauı üşin tağı da eskertu jasaymız. Tärtip bwzuşılarğa zañ boyınşa şaralar qoldanıladı. Tärtipsizdik ornatqan azamat Almatıdağı policiya mekemesine jetkiziledi», – dedi.

Basqarma ökili qazirgi uaqıtta qanşa adamnıñ wstalğanı jöininde mälimet bergen joq. Biraq, aldın ala aqparattarğa säykes, on azamat wstalğan.

25 qazanda QR Bas prokurorınıñ orınbasarı Bolat Dembaev Qazaqstanda ekstremistik dep tanılğan 20 jılğa sırttay sottalğan eks-bankir Mwhtar Äbilyazovtıñ jetekşiligindegi «Qazaqstannıñ demokratiyalıq tañdauı» beyresmi qozğalısınıñ halıqtı sankciyalanbağan kezekti qarsılıq akciyasına qatısuğa şaqıruına oray ündeu jariyalağan bolatın. Onda ekstremistik wyım batamaşıldıq etetin rwqsat etilmegen şeru «wyımdastıruşıları men qatısuşılarına zañmen belgilengen tärtipte qatañ şaralar qoldanatını» jaylı eskertilgen.

"The Qazaq Times"