فوتو: The Qazaq Times

بۇگىن ساعات تۇسكى ەكىدەن بەرى الماتىداعى «استانا» الاڭىندا ءوتىپ جاتقان سانكتسيالانباعان ميتينگكە قاتىستى اۋەزوۆ اۋدانى پوليتسيا باسقارماسىنىڭ وكىلى الىشەر تۇرسىنبەكوۆ مالىمدەمە جاسادى.

تۇرسىنبەكوۆ سوزىندە: «قۇرمەتتى ازاماتتار! بۇل ورىندا سانكتسيالانباعان جانە زاڭسىز ۇيىم سانالاتىن قدت-نىڭ ۇيىمداستىرۋىمەن قانداي دا ءبىر ميتينگتەردى وتكىزۋگە رۇقسات ەتىلمەيدى. سوت شەشىمىنە سايكەس اتالعان ۇيىمعا قازاقستان اۋماعىندا تىيىم سالىنعان. كەشە باس پروكۋراتۋرا ازاماتتاردىڭ رۇقسات ەتىلمەگەن ميتينگكە شىقپاۋى، زاڭدى ساقتاۋى جونىندە رەسمي مالىمدەمە جاساعان بولاتىن. سىزدەردىڭ قاۋىپسىزدىكتەرىڭىز ءۇشىن، قوعامدىق تارتىپسىزدىكتەر ورىن الماۋى ءۇشىن تاعى دا ەسكەرتۋ جاسايمىز. ءتارتىپ بۇزۋشىلارعا زاڭ بويىنشا شارالار قولدانىلادى. تارتىپسىزدىك ورناتقان ازامات الماتىداعى پوليتسيا مەكەمەسىنە جەتكىزىلەدى»، – دەدى.

باسقارما وكىلى قازىرگى ۋاقىتتا قانشا ادامنىڭ ۇستالعانى جوىنىندە مالىمەت بەرگەن جوق. بىراق، الدىن الا اقپاراتتارعا سايكەس، ون ازامات ۇستالعان.

25 قازاندا قر باس پروكۋرورىنىڭ ورىنباسارى بولات دەمباەۆ قازاقستاندا ەكسترەميستىك دەپ تانىلعان 20 جىلعا سىرتتاي سوتتالعان ەكس-بانكير مۇحتار ءابىليازوۆتىڭ جەتەكشىلىگىندەگى «قازاقستاننىڭ دەموكراتيالىق تاڭداۋى» بەيرەسمي قوزعالىسىنىڭ حالىقتى سانكتسيالانباعان كەزەكتى قارسىلىق اكتسياسىنا قاتىسۋعا شاقىرۋىنا وراي ۇندەۋ جاريالاعان بولاتىن. وندا ەكسترەميستىك ۇيىم باتاماشىلدىق ەتەتىن رۇقسات ەتىلمەگەن شەرۋ «ۇيىمداستىرۋشىلارى مەن قاتىسۋشىلارىنا زاڭمەن بەلگىلەنگەن تارتىپتە قاتاڭ شارالار قولداناتىنى» جايلى ەسكەرتىلگەن.

"The Qazaq Times"