Qazaqstannıñ eks-prezidenti Nazarbaev pen bügingi prezident Toqaev. Foto: aşıq derekköz

Memleket basşısınıñ baspasöz hatşısı Berik Uäli qazannıñ 9-ı küşine engen, azamattıq qoğamnıñ sınına wşırağan atışulı №184 jarlıqqa qatıstı  tüsinik berdi. 

– Keybir Bwqaralıq aqparat qwraldarınıñ ökilderi mağan Memleket basşısınıñ 2019 jıldıñ 9 qazanındağı «Qazaqstan Respublikası Prezidentiniñ keybir aktilerine özgertuler men tolıqtırular engizu turalı» Jarlığına tüsindirme beru jöninde ötiniş jasadı, – dep jazdı Toqaevtıñ baspasöz hatşısı Berik Uäli Feysbuktegi paraqşasında.

«BAQ betterinde türli payımdar men pikirler tuğızğan qwjattı» prezident hatşısı Toqaevtıñ «kezekti jarlığı» ekenin aytadı. Onıñ sözinşe, bwl «qwjatqa 2018 jılğı şildede qabıldanğan Qauipsizdik keñesi turalı jaña zañnıñ erejelerine säykes qol qoyılğan». Ol atalğan alqalı organnıñ ökilettiligin küşeytu zañğa säykes qarastırılatının äri mwnı N.Nazarbaev ömir boyı basqaratının mälimdedi.

Sonday-aq, öz jazbasında lauazımdı twlğalardı tağayındaudağı kelisim tärtibi prezidenttiñ barlıq kadrlıq mäseleler boyınşa öz betinşe şeşim qabıldauına kedergi keltirmeydi dep tüsindiredi prezidenttiñ baspasöz hatşısı.
Berik Uäli söz soñında prezident Konstituciya boyınşa elimizdiñ Joğarğı Bas qolbasşısı ekenin eske tüsirip, memleket basşısınıñ Ükimetti jasaqtaytının aytqan.

«Qos bilikti» bayqap, onı söz etuşilerdi «arandatuşığa» balau küş alğan şaqta Nazarbaev juırda «Habar» arnasına swhbat berdi. Qos bilik taqırıbın «şeteldegi qaşqındar şığarğan ösek» retinde bağalap, birinşi basşığa qatıstı «Keñesti men bergenmen, şeşim qabıldauşı – keñes alğan adamnıñ özi ğoy»  degen edi «Nwr Otan» kösemi.

Nazarbaevtıñ jeke apparatı, öz keñsesi, qorı men baspasöz qızmeti bar. Aqparat ministri Däuren Abaev «Toqaev – ekinşi Nazarbaev emes, onıñ öz basqaru stili, öz közqarası bar. Sondıqtan, jaña Prezident öz jwmısında jaña format qoldanğan sayın «qos bilik» turalı şu köterudiñ qajeti joq» dep, el işindegi «Qazaqstandağı qos bilik» jaylı qauesetti joqqa şığarıp baqqan bolatın.

Osığan deyin saylau aldında, mamırda eks-prezident «Alayda, Qazaqstanda mwnday eki prezidenttik basqaru joq. Bir ğana prezident bar jäne ol – eñ bastısı» dep «nükte qoyğanday» bolıp edi. Ol Toqaevtı ayaqsız qalğan isti jalğastıratın, dayındıqtan ötken täjiribeli adam dep esepteytinin, öziniñ tek jaña prezidentke qoldau körsetetinin aytqan.

Aytpaqşı, bwğan qatıstı Mäjilis deputattarı Azattıqqa bergen swhbattarında "keñesip pişken ton kelte bolmas" degen mätelin jii tilge tiek etip, jay tiek retinde emes tipti keybiri argument retinde keltirgen. Azattıq saualına jauap bergen mäjilis deputatı Baqıtbek Smağwl prezident Toqaevtıñ "azamattıq qoğam pikirimen sanasa otırıp, öziniñ qwziretin tolıqqandı orındap, sanaulı asa mañızdı mäselemen aqıldasqanın" äbes körmeytinin aytadı.

"The Qazaq Times"