اقوردا قوعامدا ءدۇمپۋ تۋدىرعان پرەزيدەنت جارلىعى جونىندە تۇسىنىك بەردى

مەملەكەت باسشىسىنىڭ ءباسپاسوز حاتشىسى بەرىك ءۋالي قازاننىڭ 9-ى كۇشىنە ەنگەن، ازاماتتىق قوعامنىڭ سىنىنا ۇشىراعان اتىشۋلى №184 جارلىققا قاتىستى  تۇسىنىك بەردى. 

– كەيبىر بۇقارالىق اقپارات قۇرالدارىنىڭ وكىلدەرى ماعان مەملەكەت باسشىسىنىڭ 2019 جىلدىڭ 9 قازانىنداعى «قازاقستان رەسپۋبليكاسى پرەزيدەنتىنىڭ كەيبىر اكتىلەرىنە وزگەرتۋلەر مەن تولىقتىرۋلار ەنگىزۋ تۋرالى» جارلىعىنا تۇسىندىرمە بەرۋ جونىندە ءوتىنىش جاسادى، – دەپ جازدى توقاەۆتىڭ ءباسپاسوز حاتشىسى بەرىك ءۋالي فەيسبۋكتەگى پاراقشاسىندا.

«باق بەتتەرىندە ءتۇرلى پايىمدار مەن پىكىرلەر تۋعىزعان قۇجاتتى» پرەزيدەنت حاتشىسى توقاەۆتىڭ «كەزەكتى جارلىعى» ەكەنىن ايتادى. ونىڭ سوزىنشە، بۇل «قۇجاتقا 2018 جىلعى شىلدەدە قابىلدانعان قاۋىپسىزدىك كەڭەسى تۋرالى جاڭا زاڭنىڭ ەرەجەلەرىنە سايكەس قول قويىلعان». ول اتالعان القالى ورگاننىڭ وكىلەتتىلىگىن كۇشەيتۋ زاڭعا سايكەس قاراستىرىلاتىنىن ءارى مۇنى ن.نازارباەۆ ءومىر بويى باسقاراتىنىن مالىمدەدى.

سونداي-اق، ءوز جازباسىندا لاۋازىمدى تۇلعالاردى تاعايىنداۋداعى كەلىسىم ءتارتىبى پرەزيدەنتتىڭ بارلىق كادرلىق ماسەلەلەر بويىنشا ءوز بەتىنشە شەشىم قابىلداۋىنا كەدەرگى كەلتىرمەيدى دەپ تۇسىندىرەدى پرەزيدەنتتىڭ ءباسپاسوز حاتشىسى.
بەرىك ءۋالي ءسوز سوڭىندا پرەزيدەنت كونستيتۋتسيا بويىنشا ەلىمىزدىڭ جوعارعى باس قولباسشىسى ەكەنىن ەسكە ءتۇسىرىپ، مەملەكەت باسشىسىنىڭ ۇكىمەتتى جاساقتايتىنىن ايتقان.

«قوس بيلىكتى» بايقاپ، ونى ءسوز ەتۋشىلەردى «ارانداتۋشىعا» بالاۋ كۇش العان شاقتا نازارباەۆ جۋىردا «حابار» ارناسىنا سۇحبات بەردى. قوس بيلىك تاقىرىبىن «شەتەلدەگى قاشقىندار شىعارعان وسەك» رەتىندە باعالاپ، ءبىرىنشى باسشىعا قاتىستى «كەڭەستى مەن بەرگەنمەن، شەشىم قابىلداۋشى – كەڭەس العان ادامنىڭ ءوزى عوي»  دەگەن ەدى «نۇر وتان» كوسەمى.

نازارباەۆتىڭ جەكە اپپاراتى، ءوز كەڭسەسى، قورى مەن ءباسپاسوز قىزمەتى بار. اقپارات ءمينيسترى داۋرەن اباەۆ «توقاەۆ – ەكىنشى نازارباەۆ ەمەس، ونىڭ ءوز باسقارۋ ءستيلى، ءوز كوزقاراسى بار. سوندىقتان، جاڭا پرەزيدەنت ءوز جۇمىسىندا جاڭا فورمات قولدانعان سايىن «قوس بيلىك» تۋرالى شۋ كوتەرۋدىڭ قاجەتى جوق» دەپ، ەل ىشىندەگى «قازاقستانداعى قوس بيلىك» جايلى قاۋەسەتتى جوققا شىعارىپ باققان بولاتىن.

وسىعان دەيىن سايلاۋ الدىندا، مامىردا ەكس-پرەزيدەنت «الايدا، قازاقستاندا مۇنداي ەكى پرەزيدەنتتىك باسقارۋ جوق. ءبىر عانا پرەزيدەنت بار جانە ول – ەڭ باستىسى» دەپ «نۇكتە قويعانداي» بولىپ ەدى. ول توقاەۆتى اياقسىز قالعان ءىستى جالعاستىراتىن، دايىندىقتان وتكەن تاجىريبەلى ادام دەپ ەسەپتەيتىنىن، ءوزىنىڭ تەك جاڭا پرەزيدەنتكە قولداۋ كورسەتەتىنىن ايتقان.

ايتپاقشى، بۇعان قاتىستى ءماجىلىس دەپۋتاتتارى ازاتتىققا بەرگەن سۇحباتتارىندا "كەڭەسىپ پىشكەن تون كەلتە بولماس" دەگەن ماتەلىن ءجيى تىلگە تيەك ەتىپ، جاي تيەك رەتىندە ەمەس ءتىپتى كەيبىرى ارگۋمەنت رەتىندە كەلتىرگەن. ازاتتىق ساۋالىنا جاۋاپ بەرگەن ءماجىلىس دەپۋتاتى باقىتبەك سماعۇل پرەزيدەنت توقاەۆتىڭ "ازاماتتىق قوعام پىكىرىمەن ساناسا وتىرىپ، ءوزىنىڭ قۇزىرەتىن تولىققاندى ورىنداپ، ساناۋلى اسا ماڭىزدى ماسەلەمەن اقىلداسقانىن" ابەس كورمەيتىنىن ايتادى.

"The Qazaq Times"