Foto: Google

«Astana LRT» jeñil rel'sti kölik jüyesiniñ qwrılısı kezinde 400 million teñge jımqırılğan. Bwl turalı Sıbaylas jemqorlıqqa qarsı is-qimıl agenttiginiñ ekinşi departamentiniñ jetekşisi Sergey Perov mälimdedi.

Sergey Perovtıñ aytuınşa, memlekettik saraptama nätijesinde jalpı qwnı 2,6 milliard teñge bolatın qwrılıstıñ kelisimi 4,2 milliardqa jasalğan. Onıñ 3 milliardın merdigerler tölegen. Al 412 million teñge jalğan käsiporındardıñ kömegimen jımqırılğan. Tergeu barısında jobağa qatısı bar degen küdikke «Astana LRT» seriktestiginiñ, Astana qalası äkimdiginiñ jäne basqa da wyımdardıñ qızmetkerleri ilindi.
Qazirgi uaqıtta atalğan iske qatıstı qwjattardıñ barlığı tärkilenegen jäne osığan qatısı bar degen onnan astam küdiktiniñ elden şığuına tıyım salındı.

"Astana LRT" qwrılısı. Äleumettik jeli qoldanuşıları bwl suretti "Qazaqstandağı jemqorlıqqa arnalğan eskertkiş" dep atağan. Foto: https://astanatimes.com

«Astana LRT» qwrılısı 2016 jılı bastalğan. Bastapqı jospar boyınşa qwrılıs jwmıstarı 2019 jılı 31 jeltoqsanda ayaqtalıp, 2020 jılı jazda paydalanuğa berilui tiis edi. 22 kilometrden asatın joldı saluğa 1 milliard 887 million dollar bölingen. Biraq keyin qwrılıs jwmıstarı toqtap qalğan. Biıl 30 şildede «Astana LRT» JŞS-niñ bwrınğı basqarma törağası Talğat Ardanğa halıqaralıq izdeu jariyalanğan. Qazirgi uaqıtta Interpol osı mäseleni nazarda wstap otır.

Küni keşe prezident Qasım-Jomart Toqaev elordanı äri qaray damıtu mäseleleri boyınşa keñeste QR Sıbaylas jemqorlıqqa qarsı is-qimıl agenttigine LRT qwrılısı isin tergeudi jedeldetudi tapsırdı. Memleket basşısı sözinde: «LRT qwrılısı – sätsiz joba. Ükimet pen äkimdik onıñ qwrılısın jalğastıru şeşimin qabıldadı. Mağan bayandağanday, özge amal joq. Öytkeni biraz şarua atqarıldı. Sıbaylas jemqorlıqqa qarsı is-qimıl agenttigine tergeudi jedeldetu tapsırmasımen jügingim keledi. Bireulerdiñ şetelge qaşıp ketkendigin aytıp, üstimen jüruge bolmaydı. Bwl josparlanğan qaşıp ketu ekendigi tüsinikti. Özgelerdi, onıñ işinde şeşim qabıldağan äkimdiktiñ basşıların nazardan tıs qaldırmau kerek», – dedi. Bwl jobanıñ «öte daulı» ekenin aytqan Q.Toqaev: «Bwl öte daulı joba, ekonomikalıq twrğıda tüsiniksiz. LRT wzındığı 22,5 km, 18 stanciya josparlağan. Marafon kezinde sizder 22 şaqırımnan artıq jügiresizder. 18 stanciya bolsa, ayaldamalardıñ arası 1 şaqırımnan säl artığıraq. Jayau jürgenniñ özinde biraz jürip ötemiz. Mwnday jobanı qalay iske qosqanın tüsinbeymin», – dedi.

"The Qazaq Times"