ءساتسىز جانە داۋلى جوبا: «استانا لرت» قۇرىلىسىنان جىمقىرىلعان قارجى قانشا؟

«استانا لرت» جەڭىل رەلستى كولىك جۇيەسىنىڭ قۇرىلىسى كەزىندە 400 ميلليون تەڭگە جىمقىرىلعان. بۇل تۋرالى سىبايلاس جەمقورلىققا قارسى ءىس-قيمىل اگەنتتىگىنىڭ ەكىنشى دەپارتامەنتىنىڭ جەتەكشىسى سەرگەي پەروۆ مالىمدەدى.

سەرگەي پەروۆتىڭ ايتۋىنشا، مەملەكەتتىك ساراپتاما ناتيجەسىندە جالپى قۇنى 2,6 ميلليارد تەڭگە بولاتىن قۇرىلىستىڭ كەلىسىمى 4,2 ميللياردقا جاسالعان. ونىڭ 3 ميللياردىن مەردىگەرلەر تولەگەن. ال 412 ميلليون تەڭگە جالعان كاسىپورىنداردىڭ كومەگىمەن جىمقىرىلعان. تەرگەۋ بارىسىندا جوباعا قاتىسى بار دەگەن كۇدىككە «استانا لرت» سەرىكتەستىگىنىڭ، استانا قالاسى اكىمدىگىنىڭ جانە باسقا دا ۇيىمداردىڭ قىزمەتكەرلەرى ءىلىندى.
قازىرگى ۋاقىتتا اتالعان ىسكە قاتىستى قۇجاتتاردىڭ بارلىعى تاركىلەنەگەن جانە وسىعان قاتىسى بار دەگەن وننان استام كۇدىكتىنىڭ ەلدەن شىعۋىنا تىيىم سالىندى.

"استانا لرت" قۇرىلىسى. الەۋمەتتىك جەلى قولدانۋشىلارى بۇل سۋرەتتى "قازاقستانداعى جەمقورلىققا ارنالعان ەسكەرتكىش" دەپ اتاعان. فوتو: https://astanatimes.com

«استانا LRT» قۇرىلىسى 2016 جىلى باستالعان. باستاپقى جوسپار بويىنشا قۇرىلىس جۇمىستارى 2019 جىلى 31 جەلتوقساندا اياقتالىپ، 2020 جىلى جازدا پايدالانۋعا بەرىلۋى ءتيىس ەدى. 22 كيلومەتردەن اساتىن جولدى سالۋعا 1 ميلليارد 887 ميلليون دوللار بولىنگەن. بىراق كەيىن قۇرىلىس جۇمىستارى توقتاپ قالعان. بيىل 30 شىلدەدە «استانا LRT» جشس-ءنىڭ بۇرىنعى باسقارما توراعاسى تالعات اردانعا حالىقارالىق ىزدەۋ جاريالانعان. قازىرگى ۋاقىتتا ينتەرپول وسى ماسەلەنى نازاردا ۇستاپ وتىر.

كۇنى كەشە پرەزيدەنت قاسىم-جومارت توقاەۆ ەلوردانى ءارى قاراي دامىتۋ ماسەلەلەرى بويىنشا كەڭەستە قر سىبايلاس جەمقورلىققا قارسى ءىس-قيمىل اگەنتتىگىنە لرت قۇرىلىسى ءىسىن تەرگەۋدى جەدەلدەتۋدى تاپسىردى. مەملەكەت باسشىسى سوزىندە: «لرت قۇرىلىسى – ءساتسىز جوبا. ۇكىمەت پەن اكىمدىك ونىڭ قۇرىلىسىن جالعاستىرۋ شەشىمىن قابىلدادى. ماعان بايانداعانداي، وزگە امال جوق. ويتكەنى ءبىراز شارۋا اتقارىلدى. سىبايلاس جەمقورلىققا قارسى ءىس-قيمىل اگەنتتىگىنە تەرگەۋدى جەدەلدەتۋ تاپسىرماسىمەن جۇگىنگىم كەلەدى. بىرەۋلەردىڭ شەتەلگە قاشىپ كەتكەندىگىن ايتىپ، ۇستىمەن جۇرۋگە بولمايدى. بۇل جوسپارلانعان قاشىپ كەتۋ ەكەندىگى تۇسىنىكتى. وزگەلەردى، ونىڭ ىشىندە شەشىم قابىلداعان اكىمدىكتىڭ باسشىلارىن نازاردان تىس قالدىرماۋ كەرەك»، – دەدى. بۇل جوبانىڭ «وتە داۋلى» ەكەنىن ايتقان ق.توقاەۆ: «بۇل وتە داۋلى جوبا، ەكونوميكالىق تۇرعىدا تۇسىنىكسىز. لرت ۇزىندىعى 22,5 كم، 18 ستانتسيا جوسپارلاعان. مارافون كەزىندە سىزدەر 22 شاقىرىمنان ارتىق جۇگىرەسىزدەر. 18 ستانتسيا بولسا، ايالدامالاردىڭ اراسى 1 شاقىرىمنان ءسال ارتىعىراق. جاياۋ جۇرگەننىڭ وزىندە ءبىراز ءجۇرىپ وتەمىز. مۇنداي جوبانى قالاي ىسكە قوسقانىن تۇسىنبەيمىن»، – دەدى.

"The Qazaq Times"