Şımkentte jol boyında avtokölikpen qaqtığısqan jolauşılar avtobusı audarıldı. 16 qırküyek 2019 jıl. Foto: aşıq derekköz

16 qırküyek tañğı sağat 8:00-der kezinde Şımkentte jolauşılar avtobusı jol apatına wşırap, saldarınan 13 adam zardap şegip, 1 kisi qaytıs bolğan.

Belgili bolğanınday, tañerteñgisin №40 bağıttağı qoğamdıq kölik  jeñil kölikpen qattı soqtığısıp, saldarınan avtobus audarılıp ketken. Kuägerlerdiñ aytuınşa, zardap şekkender köp.  Astana dañğılı men Bäyterekov köşeleriniñ qiılısında orın alğan JKO 5 jedel-järdem brigadası kömek körsetken. Otırar jergilikti arnasınıñ habarlauınşa, jol apatı ornında 13 adam zardap şekken, olardıñ üşeui – balalar, toğızı – eresekter. Ökinişke oray, kondutor äyel köz jwmğan. Atalğan oqiğa boyınşa äzirge resmi aqparat berilgen joq.

Esteriñizge sala ketsek, osıdan üş kün bwrın el astanasında da №53 bağdarındağı avtobus pen teplovoz soqtığısqan bolatın. Küni keşe, qırküyektiñ 15-i keşkilik Almatı oblısında Aqseñgir-Şamalğan stanciyasında ötkelde twralap qalğan avtobustı poezd soğıp ötip, bir adam (avtobus jürgizuşisi) qaza tapqan edi.

Üş künniñ işinde elimizdiñ eñ iri üş megapolisinde orın alğan qoğamdıq kölikterdiñ jol apatına wşırau faktileri qazaqstandıqtardıñ alañdauşılığın tudıruda.

Elimizde qoğamdıq kölik türlerine qatıstı jol apatı faktileri jiiley tüsken. Aldıñğı jılğı Şu stanciyasındağı temir jol apatı, jıl sayınğı jeñil kölikter men avtobustardıñ qatısuımen bolatın san aluan qaqtığıstar köbine adam şığınına alıp keledi. Wlttıq ekonomika ministrligi Statistika komitetiniñ derekterine süyensek, Qazaqstanda jıl sayın jol-kölik apatınan şamamen eki mıñnan astam adam qaza tabadı. Mäselen, 2017 jılı 17019 jol-kölik apatı tirkelip, 22 256 adam jaraqat alıp, 2086 adam qaytıs bolğan. Al, bıltır (2018 jılı) Qazaqstanda 15 821 jol-kölik apatı tirkelip, onda 20 445 adam jaraqat alsa, 2096 adam qaza tapqan.

The World Bank-tıñ mälimetinşe, Qazaqstanda 100 000 adamğa şaqqanda jol-kölik apatınan qaza tabatındar sanı 23,8 koefficientti qwraydı. Bwl körsetkiş Europa elderimen salıstırğanda äldeqayda köp.

Qoğamdıq kölikpen soqtığısqan jeñil köliktiñ körinisi. 16 qırküyek 2019 jıl. Foto: aşıq derekköz

"The Qazaq Times"