Türkistan oblısındağı jürgizuşiler narazılığı. Foto: Azattyq.org

Türkistan oblısında jürgizuşiler janarmaydıñ qımbattauına, balalarğa vakcina saluğa, aqılı joldarğa qarsılıq bildirip jatır. Bwl aqparattı Azattıq radiosı habarladı.

Basılım mälimetinşe, 30 qırküyekte Türkistan qalasınan Qızılordağa qaray şığatın jolda Qaraşıq auılı mañında elu şaqtı jürgizuşi qarsılıq bildiruge jinalğan, biraq policiya olardı qaytaruğa tırısıp jatır. Azattıq bwl habardı oqiğa ornında jürgen jürgizuşilerdiñ biri Abay Törehanov aytqanın jazdı.

"Qarapayım halıq, basım böligi şopırlar twrmız. Joldıñ aqılı boluına qarsımız, balalarğa vakcina saluğa, janarmaydıñ qımbattauına qarsımız. Eşqanday töbeles joq. Biraq policiya "qaytıñdar, üytiñder, büytiñder" dep jatır" dedi jürgizuşi Abay Törehanov Azattıq tilşisine.

"Onıñ Azattıqqa jibergen videosında trassa mañında jük kölikterdiñ toqtap twrğanı, ondağan adam men birneşe policiya qızmetkeriniñ jürgeni bayqaladı. Aqparatqa qarağanda, policiya olarğa foto-video tüsiruge tıyım salğan. Berik Erdenov esimdi jürgizuşiniñ Azattıqqa aytuınşa, "policiya mazalay bergen soñ jürgizuşiler kölikterine kirip alıp, narazılıqtı sonda jalğastırğan". Äzirge jürgizuşiler taramağan. Narazılar oqiğa ornında baylanıstıñ naşarlağanın da aytıp jatır" dep jazdı Azattıq radiosı.

Basılımnıñ jazuınşa, elde keyingi künderi jürgizuşilerdiñ narazılıqqa şığıp, janar-jağar may bağasın qımbattatpaudı talap etetini jaylı aqparat tarağan. Osı aptada Şımkentte jürgizuşiler belsendisi wstalıp, olardı qoldağandardan policiya tüsinikteme alğan.

The Qazaq Times