Wlttıq qoğamdıq senim keñesiniñ alğaşqı otrısı. Astana. Täuelsizdik sarayı. 6 qırküyek. 2019 jıl. Foto: baq.kz/B.Juasbaev

Astanada ötip jatqan 45 müşesi bar Wlttıq qoğamdıq senim keñesiniñ alğaşqı otırısında on şaqtı spiker birqatar özekti mäseleler turalı mälimdeme jasadı.  

QR prezidenti janındağı konsul'tativtik-keñesşi organı retinde qwrılğan Wlttıq keñes qızmetiniñ negizgi maqsatı – bilik pen bwqara arasında dialog ornatu. Keñes qwramın Prezident äkimşiligi iriktep jasaqtağan. Parlamenttiñ jügin arqalağan keñes törağası prezidenttiñ özi, al törağa orınbasarı – prezident äkimşiliginiñ basşısı Qırımbek Köşerbaev, hatşısı – prezident keñesşisi Erlan Qarin. Keñes jwmısı nätijesinde Toqaevqa arnayı wsınıstar paketi dayındalatın boladı. Täuelsiz sarapşılar prezident törağalıq etetin jwmıs tobı prezidenttiñ özine wsınıs äzirleytinin «kosmetikalıq reformalar», «aldarqatu» dep bağalağan bolatın.

Jiın barısında Qazıbek Isa memlekettik tildi wltaralıq deñgeyge köteru äri 7 baptı redakciyalau, latın grafikasındağı olqılıqtar turalı, Rahım Oşaqbaev prezidentke "Gruziya modelin" wsındı. Sonday-aq, Mwhtar Tayjan ekonomikadağı memlekettiñ ülesin azaytu qajettiligin, sot jüyesiniñ käsibiligi, jwmıssızdıq, şeteldik qarızdardı jariyalau mäselelerin köterse, Sayasat Nwrbek adam kapitalı turalı söz qozğadı. Bwdan bölek saylau zañın demokratiyalandıru talabı, mitingterdi halıqaralıq mindettemelerge säykestendiru turalı äri parlamenttiñ «ıqpaldı» arılıp, täuelsizdigin qamtamasız etiluine Aydos Sarım pikir bildirdi.

Belgili qwqıq qorğauşı-zañger Ayman Omarova BAQ-qa jasalatın qısım men zorlıq-zombılıq, sot jüyesindegi bılıqtar jayında, Ermek Twrsınov mädeniet salasına köñil bölu jaylı keñinen tolğadı. Jänibek Qojıqov jañaözendikterdiñ amanatın jetkizip, eldiñ tolquınıñ mäni «bolaşağına alañdauşılığınan» tuğan patriottıq sezimi ekenin, Mañğıstaudağı jwmıssızdıq, şeteldik kompaniyalardağı kadrdı alalau, jwmıssızdıq, zeynet jası mäselelerin tarqatıp berdi. Söz alğan spikerlerdiñ biri Seydahmet Qwttıqadam prezidentke rizaşılığın bildirip, oğan «oñay emestigin», biliktiñ «jaña betbwrısına» oñ bağa beretinin ayttı.

Keñes müşeleri söyleu barısında Toqaevtıñ közinşe oğan erekşe  maqtau-madaqtau lebizin tanıttı. Täuelsizdik sarayında ötken alqalı otırısta  üş jwmıs tobınıñ ärqaysısınan 2 kisiden söylese, bwdan özge erikti türde 5-6 spiker öz uäjin bildirdi.

Ayta keterlik bir jayt, jiınğa qatısadı dep josparlanğan jurnalister kirgizilmegen, tek baqılau zalınıñ monitorınan habar taratuğa mäjbür boldı.

"The Qazaq Times"