جۋرناليستەردىڭ قاتىسۋىنسىز وتكەن كەڭەس وتىرىسىندا ايتىلعان ماسەلەلەر

استانادا ءوتىپ جاتقان 45 مۇشەسى بار ۇلتتىق قوعامدىق سەنىم كەڭەسىنىڭ العاشقى وتىرىسىندا ون شاقتى سپيكەر بىرقاتار وزەكتى ماسەلەلەر تۋرالى مالىمدەمە جاسادى.  

قر پرەزيدەنتى جانىنداعى كونسۋلتاتيۆتىك-كەڭەسشى ورگانى رەتىندە قۇرىلعان ۇلتتىق كەڭەس قىزمەتىنىڭ نەگىزگى ماقساتى – بيلىك پەن بۇقارا اراسىندا ديالوگ ورناتۋ. كەڭەس قۇرامىن پرەزيدەنت اكىمشىلىگى ىرىكتەپ جاساقتاعان. پارلامەنتتىڭ جۇگىن ارقالاعان كەڭەس توراعاسى پرەزيدەنتتىڭ ءوزى، ال توراعا ورىنباسارى – پرەزيدەنت اكىمشىلىگىنىڭ باسشىسى قىرىمبەك كوشەرباەۆ، حاتشىسى – پرەزيدەنت كەڭەسشىسى ەرلان قارين. كەڭەس جۇمىسى ناتيجەسىندە توقاەۆقا ارنايى ۇسىنىستار پاكەتى دايىندالاتىن بولادى. تاۋەلسىز ساراپشىلار پرەزيدەنت توراعالىق ەتەتىن جۇمىس توبى پرەزيدەنتتىڭ وزىنە ۇسىنىس ازىرلەيتىنىن «كوسمەتيكالىق رەفورمالار»، «الدارقاتۋ» دەپ باعالاعان بولاتىن.

جيىن بارىسىندا قازىبەك يسا مەملەكەتتىك ءتىلدى ۇلتارالىق دەڭگەيگە كوتەرۋ ءارى 7 باپتى رەداكتسيالاۋ، لاتىن گرافيكاسىنداعى ولقىلىقتار تۋرالى، راحىم وشاقباەۆ پرەزيدەنتكە "گرۋزيا مودەلىن" ۇسىندى. سونداي-اق، مۇحتار تايجان ەكونوميكاداعى مەملەكەتتىڭ ۇلەسىن ازايتۋ قاجەتتىلىگىن، سوت جۇيەسىنىڭ كاسىبيلىگى، جۇمىسسىزدىق، شەتەلدىك قارىزداردى جاريالاۋ ماسەلەلەرىن كوتەرسە، ساياسات نۇربەك ادام كاپيتالى تۋرالى ءسوز قوزعادى. بۇدان بولەك سايلاۋ زاڭىن دەموكراتيالاندىرۋ تالابى، ميتينگتەردى حالىقارالىق مىندەتتەمەلەرگە سايكەستەندىرۋ تۋرالى ءارى پارلامەنتتىڭ «ىقپالدى» ارىلىپ، تاۋەلسىزدىگىن قامتاماسىز ەتىلۋىنە ايدوس سارىم پىكىر ءبىلدىردى.

بەلگىلى قۇقىق قورعاۋشى-زاڭگەر ايمان وماروۆا باق-قا جاسالاتىن قىسىم مەن زورلىق-زومبىلىق، سوت جۇيەسىندەگى بىلىقتار جايىندا، ەرمەك تۇرسىنوۆ مادەنيەت سالاسىنا كوڭىل ءبولۋ جايلى كەڭىنەن تولعادى. جانىبەك قوجىقوۆ جاڭاوزەندىكتەردىڭ اماناتىن جەتكىزىپ، ەلدىڭ تولقۋىنىڭ ءمانى «بولاشاعىنا الاڭداۋشىلىعىنان» تۋعان پاتريوتتىق سەزىمى ەكەنىن، ماڭعىستاۋداعى جۇمىسسىزدىق، شەتەلدىك كومپانيالارداعى كادردى الالاۋ، جۇمىسسىزدىق، زەينەت جاسى ماسەلەلەرىن تارقاتىپ بەردى. ءسوز العان سپيكەرلەردىڭ ءبىرى سەيداحمەت قۇتتىقادام پرەزيدەنتكە ريزاشىلىعىن ءبىلدىرىپ، وعان «وڭاي ەمەستىگىن»، بيلىكتىڭ «جاڭا بەتبۇرىسىنا» وڭ باعا بەرەتىنىن ايتتى.

كەڭەس مۇشەلەرى سويلەۋ بارىسىندا توقاەۆتىڭ كوزىنشە وعان ەرەكشە  ماقتاۋ-ماداقتاۋ لەبىزىن تانىتتى. تاۋەلسىزدىك سارايىندا وتكەن القالى وتىرىستا  ۇش جۇمىس توبىنىڭ ارقايسىسىنان 2 كىسىدەن سويلەسە، بۇدان وزگە ەرىكتى تۇردە 5-6 سپيكەر ءوز ءۋاجىن ءبىلدىردى.

ايتا كەتەرلىك ءبىر جايت، جيىنعا قاتىسادى دەپ جوسپارلانعان جۋرناليستەر كىرگىزىلمەگەن، تەك باقىلاۋ زالىنىڭ مونيتورىنان حابار تاراتۋعا ءماجبۇر بولدى.

"The Qazaq Times"