QR prezidenti Qasım-Jomart Toqaev pen Wkimet basşısınıñ orınbasarı Berdibek Saparbaev. Foto: aşıq derekköz

Prem'er-ministr orınbasarı Berdibek Saparbaev memleket basşısı Qasım-Jomart Toqaevtıñ Qazaqstan halqına joldauı boyınşa qolğa alınatın şaralardı mälimdedi.  

Bügin tañğı Ükimet otırısında ükimet basşısınıñ orınbasarı Saparbaev «Halıqtıñ baspasözge qoljetimdiligin arttıru üşin qoldanıstağı normativtik-qwqıqtıq qwjattarğa özgerister engiziledi. Azamattıq qoğamnıñ 2025 jılğa deyingi twjırımdaması dayındaladı. Qoğamdıq wyımdardı arttıru üşin olardıñ normativtik-qwqıqtıq aktilerine özgerister enedi. Özderiñiz biletindey, kelesi jılı äl-Farabidiñ 1150 jıldığın, Abay Qwnanbaywlınıñ 175 jıldığın, elimiz egemendik aluınıñ 30 jıldığın, Altın Ordanıñ 750 jıldığın atap ötedi. Soğan baylanıstı tiisti is-şaralar qabıldanadı», – dedi.

Berdibek Saparbaevtıñ sözinşe qoldanıstağı til jönindegi jäne «Diplommen auılğa» bağdarlamalarına özgerister engiziledi. Sonday-aq zaman talabına say mañızdı mamandıqtar qayta qaralıp, auıl men qala mektepterindegi bilim sapasın teñestiru şaraları qabıldanatının, mektep pen mwğalimniñ, bilimdi oquşılardıñ jağdayın jaqsartu boyınşa Ükimetke tapsırmalar berildi. Toqaev kelgeli Ükimet tapsırmağa «kenelgeni» sonşalıq, är mälimdeme mindetteme jükteumen ayaqtaladı. Bwl sayasi sarapşılardıñ aldıñğı prezidentten qalğan «mwralarmen» korrekciyalıq jwmıs jürgizu degen pikirine sayatın siyaqtı.

«Osı jöninde Jol kartasın dayındaymız. JOO-larğa taldau jasalıp, ekonomikağa kerek emes mamandardı azaytu turalı tapsırma berildi. Qarjılandıru salasında da özgerister boladı. Negizgi qarjılandırular oblıstıq deñgeyge ötkiziledi. Kelesi mäsele – ğılımdı damıtu. Qasım-Jomart Kemelwlı ğılımdı damıtu jöninde tapsırma berdi. Soğan oray üylesim keñesinde özgerister boladı. Sonday-aq, balalardı, otbası institutın qorğau jöninde 2030 jılğa deyingi twjırımdama dayındaladı. Balalardıñ arasındağı qılmıs, öz-özine qol jwmsau mäseleleri boyınşa jergilikti atqaruşı organdarmen tığız jwmıs jürgiziledi», – degen Saparbaev. Tamız keñesinde de Toqaev wlttıq ğılımdı damıtu jöninde birqatar özekti mäselelerdi qozğap, arnayı bağdarlama qabıldanatının jariyalap edi.

«Özderiñiz estigendey, Memleket basşısı mädeniet salasına erekşe köñil bölip otır. Äsirese, mädeniet salası qızmetkerleriniñ jalaqısın köbeytuge mañız berildi. Sport salasınıñ materialdıq-tehnikalıq bazasın damıtu jöninde naqtı tapsırma bar. Qazir salınıp jatqan 100 sport keşenin ayaqtau jwmısı bar. Osı salağa demeuşilerdi tartu mindeti bar», – dedi ol.

Atalğan şaralarğa qatıstı keybir sarapşılar men täuelsiz sayasatkerler äzirge Toqaevtı tüpkilikti reformalarğa bata almaytının, tek «kosmetikalıq özgeristermen» şekteledi dep boljaydı.

"The Qazaq Times"