قر پرەزيدەنتى قاسىم-جومارت توقاەۆ پەن ۇكىمەت باسشىسىنىڭ ورىنباسارى بەردىبەك ساپارباەۆ. فوتو: اشىق دەرەككوز

پرەمەر-مينيستر ورىنباسارى بەردىبەك ساپارباەۆ مەملەكەت باسشىسى قاسىم-جومارت توقاەۆتىڭ قازاقستان حالقىنا جولداۋى بويىنشا قولعا الىناتىن شارالاردى مالىمدەدى.  

بۇگىن تاڭعى ۇكىمەت وتىرىسىندا ۇكىمەت باسشىسىنىڭ ورىنباسارى ساپارباەۆ «حالىقتىڭ باسپاسوزگە قولجەتىمدىلىگىن ارتتىرۋ ءۇشىن قولدانىستاعى نورماتيۆتىك-قۇقىقتىق قۇجاتتارعا وزگەرىستەر ەنگىزىلەدى. ازاماتتىق قوعامنىڭ 2025 جىلعا دەيىنگى تۇجىرىمداماسى دايىندالادى. قوعامدىق ۇيىمداردى ارتتىرۋ ءۇشىن ولاردىڭ نورماتيۆتىك-قۇقىقتىق اكتىلەرىنە وزگەرىستەر ەنەدى. وزدەرىڭىز بىلەتىندەي، كەلەسى جىلى ءال-ءفارابيدىڭ 1150 جىلدىعىن، اباي قۇنانبايۇلىنىڭ 175 جىلدىعىن، ەلىمىز ەگەمەندىك الۋىنىڭ 30 جىلدىعىن، التىن وردانىڭ 750 جىلدىعىن اتاپ وتەدى. سوعان بايلانىستى ءتيىستى ءىس-شارالار قابىلدانادى»، – دەدى.

بەردىبەك ساپارباەۆتىڭ سوزىنشە قولدانىستاعى ءتىل جونىندەگى جانە «ديپلوممەن اۋىلعا» باعدارلامالارىنا وزگەرىستەر ەنگىزىلەدى. سونداي-اق زامان تالابىنا ساي ماڭىزدى ماماندىقتار قايتا قارالىپ، اۋىل مەن قالا مەكتەپتەرىندەگى ءبىلىم ساپاسىن تەڭەستىرۋ شارالارى قابىلداناتىنىن، مەكتەپ پەن مۇعالىمنىڭ، ءبىلىمدى وقۋشىلاردىڭ جاعدايىن جاقسارتۋ بويىنشا ۇكىمەتكە تاپسىرمالار بەرىلدى. توقاەۆ كەلگەلى ۇكىمەت تاپسىرماعا «كەنەلگەنى» سونشالىق، ءار مالىمدەمە مىندەتتەمە جۇكتەۋمەن اياقتالادى. بۇل ساياسي ساراپشىلاردىڭ الدىڭعى پرەزيدەنتتەن قالعان «مۇرالارمەن» كوررەكتسيالىق جۇمىس جۇرگىزۋ دەگەن پىكىرىنە ساياتىن سياقتى.

«وسى جونىندە جول كارتاسىن دايىندايمىز. جوو-لارعا تالداۋ جاسالىپ، ەكونوميكاعا كەرەك ەمەس مامانداردى ازايتۋ تۋرالى تاپسىرما بەرىلدى. قارجىلاندىرۋ سالاسىندا دا وزگەرىستەر بولادى. نەگىزگى قارجىلاندىرۋلار وبلىستىق دەڭگەيگە وتكىزىلەدى. كەلەسى ماسەلە – عىلىمدى دامىتۋ. قاسىم-جومارت كەمەلۇلى عىلىمدى دامىتۋ جونىندە تاپسىرما بەردى. سوعان وراي ۇيلەسىم كەڭەسىندە وزگەرىستەر بولادى. سونداي-اق، بالالاردى، وتباسى ينستيتۋتىن قورعاۋ جونىندە 2030 جىلعا دەيىنگى تۇجىرىمداما دايىندالادى. بالالاردىڭ اراسىنداعى قىلمىس، ءوز-وزىنە قول جۇمساۋ ماسەلەلەرى بويىنشا جەرگىلىكتى اتقارۋشى ورگاندارمەن تىعىز جۇمىس جۇرگىزىلەدى»، – دەگەن ساپارباەۆ. تامىز كەڭەسىندە دە توقاەۆ ۇلتتىق عىلىمدى دامىتۋ جونىندە بىرقاتار وزەكتى ماسەلەلەردى قوزعاپ، ارنايى باعدارلاما قابىلداناتىنىن جاريالاپ ەدى.

«وزدەرىڭىز ەستىگەندەي، مەملەكەت باسشىسى مادەنيەت سالاسىنا ەرەكشە كوڭىل ءبولىپ وتىر. اسىرەسە، مادەنيەت سالاسى قىزمەتكەرلەرىنىڭ جالاقىسىن كوبەيتۋگە ماڭىز بەرىلدى. سپورت سالاسىنىڭ ماتەريالدىق-تەحنيكالىق بازاسىن دامىتۋ جونىندە ناقتى تاپسىرما بار. قازىر سالىنىپ جاتقان 100 سپورت كەشەنىن اياقتاۋ جۇمىسى بار. وسى سالاعا دەمەۋشىلەردى تارتۋ مىندەتى بار»، – دەدى ول.

اتالعان شارالارعا قاتىستى كەيبىر ساراپشىلار مەن تاۋەلسىز ساياساتكەرلەر ازىرگە توقاەۆتى تۇپكىلىكتى رەفورمالارعا باتا المايتىنىن، تەك «كوسمەتيكالىق وزگەرىستەرمەن» شەكتەلەدى دەپ بولجايدى.

"The Qazaq Times"