Qırğızstan eks-prezidenti Almazbek Atambaev Aqaev pen Bakiev tağdırın qaytalay ma?

Birneşe künnen beri Qırğızstan qoğamı Almazbek Atambaevtıñ elden ketuin talqılauda. Biri «Atambaev Aqaev pen Bakievtiñ jolımen Reseyge ketpek» dese, endi biri «eks-prezident Qırğızstannan eşqayda ketpeydi» degen pikirde.

«Jel twrmasa şöptiñ bası qozğalmaydı» degen söz bar qazaqta. Sol aytpaqşı, «Atambaev şetel asuı mümkin» - degen äñgime de beker emes. Osıdan birneşe kün bwrın BAQ betterinde «Atambevtı Reseydiñ Federaldı keden qızmetiniñ eks-basşısı Andrey Bel'yaninov Mäskeuge şaqırdı» - degen aqparat taradı. Atambaevtıñ özi atalmış aqparatqa baylanıstı :«Meniñ şetelge baruım mümkin. Biraq tek birneşe künge ğana» dep qısqa qayırdı. Bwl onsızda qızıp twrğan talqılaulardı odan arı qozdırdı. Onıñ üstine jaqında prezident Sooronbay Jeenbekov Reseyge issaparmen barıp, Kreml' basşısı Vladimir Putinmen kezdesti. Wzın qwlaqtardıñ boljamı boyınşa, atalmış kezdesude memleket basşıları Atambaev jöninde äñgime qozğağan. Qırğızstandıq sayasattanuşı Mars Sarievtiñ sözinşe, Atambaevtıñ oyında Reseyge tübegeyli qonıs audaru josparı joq.

«Qazir Atambaevtıñ Mäskeuge şaqırtu aluı oğan belgili bir därejede sayasi salmaq qosadı. Sol sebepti de qazir onıñ köñil-küyi jaqsı. Biraq ol Reseyde qaladı degenge senbeymin. Eger ol Mäskeude qalatın bolsa, bwl onıñ sayasi imidjine soqqı boladı jäne ol Aqaev pen Bakievterdiñ qatarına qosıladı. Ol Reseyge qısqa uaqıtqa baradı» - dep esepteydi Sariev.

Bwğan deyin Resey biligi Atambaev pen Jeenbekov arasında bolıp jatqan jağdaylarğa «bwl Qırğızstannıñ işki mäseleleri» degen bağa bergen. Biraq Jeenbekov-Putin kezdesui men Bel'yaninovtıñ Atambaevtı Mäskeuge şaqıruı sinhrondı türde jürip jatqandığına qarağanda, Kreml' Bişkek mañındağı tartıstı jiti baqılauda wstap otırğan tärizdi.

Jalpı, Almazbek Atambaev Mäskeu üşin öte qolaylı figura. Bwlay deytin sebebimiz däl osı Atambaevtıñ bilik basına keluimen Qırğızstandağı AQŞ äskeri bazası jabılıp, Reseymen qarım-qatınas qalpına keltirilgen. Bwğan qosa Atambaev Jeenbekov tärizdi körşiles Qazaqstan jäne Özbekstan prezidentterimen anau aytqanday jaqsı baylanısta bolğan joq. Bwl Mäskeu üşin öte tiimdi ekendigi aytpasa da tüsinikti. Tipti ol bir uaqıttarı Qazaqstannıñ sol kezdegi basşısı Nwrswltan Nazarbaevtı eldiñ işki isterine aralastı dep ayıptap, jerden alıp, jerge salğan. Saldarınan qazaq-qırğız şekarasında birqatar qiındıqtar orın alıp, keyinnen bilik basına Jeenbekovtıñ keluimen jağday qalpına kelgen.

"The Qazaq Times"