Foto: http://rabkor.ru

Gruziyalıq djaz änşisi Nino Katamadze «Putin – bizdiñ ortaq jauımız!» dep, Reseyde koncert beruden bas tarttı.

Katamadze öziniñ Feysbuk paraqşasında: «Meniñ ömirimdegi eñ auır kün – 20 mausım, al eñ auır koncert 22 mausımda Reseyde ötti. Közi körmeytin kişkentay qız üşin koncertten bas tarta almadım. Endigi aytarım, bwl meniñ Resey jerindegi eñ soñğı koncertim. Men gruzinmin, demek, europalıqpın. Gruziyanıñ bolaşağı Europa elderimen birge bastaluı tiis», – dep jazğan.

Sonımen qatar, änşi Gruziyadağı ereuil kezinde gruzin halqımen birge bola almağanı üşin, Reseyge qarsı wrandamağanı üşin keşirim swradı. Gruziyanıñ İşki ister ministri Georgiy Gahariyanıñ otstavkağa ketuin talap etip, «Resey – okkupant, Putin – bizdiñ ortaq jauımız!» – dep jazdı.

Eske sala keteyik, Gruziyada narazılıq akciyaları mausımnıñ 20-sınan beri jalğasıp keledi. Oğan Resey memlekettik dumasınıñ deputatı Sergey Gavrilovtıñ parlamentaralıq kezdesude Gruziya spikeriniñ ornına otırıp söz söyleui sebep boldı. Oppoziciya mwnday ärketke narazılığın bildirip, onıñ soñı tärtipsizdikterge wlastı. Öytkeni reseylik deputat bwğan deyin Gruziyadan bölingen aymaqtardıñ täuelsizdigine qoldau bildirip kelgen.

Bügin mıñdağan twrğın Tbilisidiñ ortalıq köşelerimen jürip, eldiñ işki ister ministri Georgiy Gahariyanıñ otstavkağa ketuin talap etip otır. Şeruşiler halıqqa küş qoldanğan ministr qızmetin jalğastıruğa qwqı joq dep wrandattı.

"The Qazaq Times"