گرۋزيالىق دجاز ءانشىسى نينو كاتامادزە «پۋتين – ءبىزدىڭ ورتاق جاۋىمىز!» دەپ، رەسەيدە كونتسەرت بەرۋدەن باس تارتتى.

كاتامادزە ءوزىنىڭ فەيسبۋك پاراقشاسىندا: «مەنىڭ ومىرىمدەگى ەڭ اۋىر كۇن – 20 ماۋسىم، ال ەڭ اۋىر كونتسەرت 22 ماۋسىمدا رەسەيدە ءوتتى. كوزى كورمەيتىن كىشكەنتاي قىز ءۇشىن كونتسەرتتەن باس تارتا المادىم. ەندىگى ايتارىم، بۇل مەنىڭ رەسەي جەرىندەگى ەڭ سوڭعى كونتسەرتىم. مەن گرۋزينمىن، دەمەك، ەۋروپالىقپىن. گرۋزيانىڭ بولاشاعى ەۋروپا ەلدەرىمەن بىرگە باستالۋى ءتيىس»، – دەپ جازعان.

سونىمەن قاتار، ءانشى گرۋزياداعى ەرەۋىل كەزىندە گرۋزين حالقىمەن بىرگە بولا الماعانى ءۇشىن، رەسەيگە قارسى ۇرانداماعانى ءۇشىن كەشىرىم سۇرادى. گرۋزيانىڭ ىشكى ىستەر ءمينيسترى گەورگي گاحاريانىڭ وتستاۆكاعا كەتۋىن تالاپ ەتىپ، «رەسەي – وككۋپانت، پۋتين – ءبىزدىڭ ورتاق جاۋىمىز!» – دەپ جازدى.

ەسكە سالا كەتەيىك، گرۋزيادا نارازىلىق اكتسيالارى ماۋسىمنىڭ 20-سىنان بەرى جالعاسىپ كەلەدى. وعان رەسەي مەملەكەتتىك دۋماسىنىڭ دەپۋتاتى سەرگەي گاۆريلوۆتىڭ پارلامەنتارالىق كەزدەسۋدە گرۋزيا سپيكەرىنىڭ ورنىنا وتىرىپ ءسوز سويلەۋى سەبەپ بولدى. وپپوزيتسيا مۇنداي اركەتكە نارازىلىعىن ءبىلدىرىپ، ونىڭ سوڭى تارتىپسىزدىكتەرگە ۇلاستى. ويتكەنى رەسەيلىك دەپۋتات بۇعان دەيىن گرۋزيادان بولىنگەن ايماقتاردىڭ تاۋەلسىزدىگىنە قولداۋ ءبىلدىرىپ كەلگەن.

بۇگىن مىڭداعان تۇرعىن ءتبيليسيدىڭ ورتالىق كوشەلەرىمەن ءجۇرىپ، ەلدىڭ ىشكى ىستەر ءمينيسترى گەورگي گاحاريانىڭ وتستاۆكاعا كەتۋىن تالاپ ەتىپ وتىر. شەرۋشىلەر حالىققا كۇش قولدانعان مينيستر قىزمەتىن جالعاستىرۋعا قۇقى جوق دەپ ۇرانداتتى.

"The Qazaq Times"