Qazaqstan sırtqı ister ministrligi Qıtaydıñ soltüstik batısındağı Şıñjañ aymağındağı "sayasi qayta tärbieleu lagerinde" qanşa etnikalıq qazaq bar ekendigin bilmeytinin jetkizdi. Onıñ sebebi lagerdeginiñ barlığı - Qıtay azamattarı - dep habarlaydı Ortalıq Aziya jañalıqtar qızmeti.

SİM 1963 jılı qabıldanğan Vena konvenciyasına silteme jasap, bwl qwjat boyınşa halıqaralıq qarım-qatınasta özge memleket bir memlekettiñ işki isine aralaspaydı dedi. «Qazaqstan Qıtay azamattarı bolıp tabılatın etnikalıq qazaqtardıñ problemasına aralasa almaydı» dep jauap berdi.

Sonımen birge SİM mälimetinşe, 2018 jılı Qıtayda twratın 14324 etnikalıq qazaq, 2019 jıldıñ alğaşqı tört ayında 1929 etnikalıq qazaq Qazaqstan azamattığın alğan.

"Qazaqstan sırtqı ister ministrligi konsuldıq qızmet departamentiniñ dereginşe, 2019 jıldıñ 1-şi qañtarı men 15-şi mamırı aralığında Qıtaydağı 6506 etnikalıq qazaq (Qıtay azamattarı) Qazaqstanda twratın tuıstarına kelu üşin viza aldı. Al ministrlikke Qıtaydan Qazaqstanğa kelu üşin kömek swrağan 343 ötiniş tüsti" dep jazılğan Sırtqı ister ministrliginiñ jauabında.

Ministrliktiñ mälimdeuinşe, "Qıtay köşi-qon zañnamasın bwzğan etnikalıq qazaqtar Qazaqstanğa şığa almay otır. Qıtay köşi-qon rejimin bwzbağan etnikalıq qazaqtarğa Beyjiñ tarapınan kedergi joq".

2017 jıldan bastap Şıñjañ aymağında twratın etnikalıq qazaqtar sayasi tärbieleu ortalıqtarına qamalıp jatqanı jaylı habar taray bastağan. Qazaqstandağı qazaqtar Qıtayda qalğan tuıstarına qısım jasalıp jatqanın aytıp, bilikten kömek swrağan. Qazaqstan sırtqı ister ministrligi Qıtaydağı qazaqtarğa kömek qolın sozatının mälimdegen.

"The Qazaq Times"